အသစ်ပြင်ဆင်ဖွဲ့စည်းထားသည့် အဂတိလိုက်စားမှုတိုက်ဖျက်ရေးကော်မရှင်သို့ နိုဝင်ဘာ ၂၂ ရက်မှ ဒီဇင်ဘာလကုန်အထိ တင်ပြတိုင်တန်းစာပေါင်း ၃၉၂ စောင်ရှိပြီး စိစစ်ဆဲအမှု ၁၈၈ မှုရှိကြောင်း ဇန်နဝါရီ ၆ ရက်က အဂတိလိုက်စားမှု တိုက်ဖျက်ရေးကော် မရှင်ရုံးတွင်ပြုလုပ်သည့် သတင်းစာရှင်းလင်းပွဲမှ သိရသည်။ အဂတိလိုက်စားမှုတိုက်ဖျက်ရေး ကော်မရှင်သို့ တိုင်ကြားသည့်တိုင်စာ အမျိုးအစားများတွင် အဂတိလိုက်စားမှုကြောင့် တိုင်တန်းခြင်းသုံးမှု၊ လွဲမှားတင်ပြ ၃၉ မှု၊ မြေယာစီမံခန့်ခွဲမှု တင်ပြ တိုင်တန်းခြင်း ၂၇ မှု၊ တရားစီရင်ရေး တင်ပြတိုက်တန်းခြင်း ၃၇ မှု၊ ဌာနတွင်း ပုဂ္ဂိုလ်ရေး တင်ပြတိုင်တန်းခြင်း အမှု ၉၀၊ အထွေထွေရှစ်မှုနှင့် စိစစ်ဆဲအမှု ၁၈၈ မှုရှိကြောင်း သိရသည်။ အသစ်ပြင်ဆင် ဖွဲ့စည်းထားသည့် အဂတိလိုက်စားမှု တိုက်ဖျက်ရေးကော်မရှင်မှ စုံစမ်းစစ်ဆေးရေး အဖွဲ့ နှင့် သွားရောက်စစ်ဆေးနေသည့် အမှု သုံးမှုရှိပြီး လက်ရှိတွင် အဆိုပါအမှုများမှာ ပြီးပြတ်မှု မရှိသေးကြောင်း သိရသည်။
ယုံကြည်စွာအပ်နှင်းထားသည့် အာဏာကို မိမိကိုယ်ကျိုးစီးပွားအတွက် အလွဲသုံးစား ပြုလုပ်ခြင်းကို အဂတိလိုက်စားမှုဟု ယေဘုယျခေါ်ဆိုကြသည်။ အဂတိလိုက်စားမှုကို ဆုံးရှုံးရသည့် ငွေကြေးပမာဏနှင့် ၎င်း ဖြစ်ပွားသည့်ကဏ္ဍကို မူတည်လျက် အကြီးစား အဂတိလိုက်စားမှု၊ အသေးစား အဂတိလိုက်စားမှုနှင့် နိုင်ငံရေးဆိုင်ရာ အဂတိလိုက်စားမှု ဟူ၍ အမျိုးအစားခွဲခြားထားသည်။ အကြီးစား အဂတိလိုက်စားမှုသည် ပြည်သူပိုင်ပစ္စည်းများကို ခေါင်းဆောင်များက မိမိတို့အကျိုးအတွက် သုံးစွဲနိုင်ရန် အဆင့်မြင့်အဆင့် အစိုးရ အရာရှိများက မူဝါဒများ သို့မဟုတ် နိုင်ငံ၏ ဗဟိုလုပ်ငန်းဆောင်တာများကို ပုံဖျက်ခြင်း ဖြစ်သည်။ အသေးစား အဂတိလိုက်စားမှုတွင် သာမန်ပြည်သူများနှင့် အပြန်အလှန်ဆက်ဆံရာ၌ အဆင့်နိမ့်နှင့် အလယ်အလတ်အဆင့် အစိုးရအရာရှိများက ယုံကြည်စွာအပ်နှင်း ထားသည့်အာဏာကို အလွဲသုံးစားလုပ်မှု အားလုံးပါဝင်သည်။ ယင်းတွင် ဆေးရုံများ၊ ကျောင်းများ၊ ရဲဌာနများနှင့် အခြားအစိုးရဌာနများကဲ့သို့သော အခြေခံကုန်ပစ္စည်း သို့မဟုတ် ဝန်ဆောင်မှုပေးသည့် လုပ်ငန်းအားလုံး ပါဝင်သည်။ နိုင်ငံရေးဆိုင်ရာ အဂတိလိုက် စားမှုဟူသည် ရင်းမြစ်များ ခွဲဝေချထားရေးနှင့် ဘဏ္ဍာငွေ ခွဲဝေရေးတို့အား နိုင်ငံရေးဆိုင်ရာ ဆုံးဖြတ်ချက်ချသူများက ဆောင်ရွက်ရာတွင် လုပ်ငန်းစဉ်တို့၏ မူဝါဒများ၊ အင်စတီကျူးရှင်းများနှင့် စည်းကမ်းဥပဒေများကို ကိုင်တွယ်ရာ၌ မိမိတို့၏ အာဏာ၊ အနေအထားနှင့် ချမ်းသာကြွယ်ဝမှုတို့အား အလွဲသုံးစား ပြုလုပ်ခြင်းဖြစ်သည်။
အဂတိလိုက်စားခြင်းသည် လူ့အဖွဲ့အစည်း အသီးသီးတို့အား များစွာသောနည်းလမ်းများအားဖြင့် ထိခိုက်စေနိုင်သည်။ အဆိုးရွားဆုံးကိစ္စများ၌ အသက်သေဆုံးမှုများပင် ဖြစ်ပွားတတ်သည်။ အများပြည်သူတို့အနေဖြင့် မိမိတို့၏ လွတ်လပ်ခွင့်၊ ကျန်းမာရေးနှင့် ငွေကြေးတို့ ဆုံးရှုံးရသည်။ အဂတိလိုက်စားမှုကြောင့် ထိခိုက်မှုများကို အဓိကအားဖြင့် နိုင်ငံရေး၊ စီးပွားရေး၊ လူမှုရေးနှင့် ပတ်ဝန်းကျင်ဆိုင်ရာတို့အဖြစ် လေးပိုင်းခွဲခြားထားနိုင်သည်။ နိုင်ငံရေးကဏ္ဍတွင် အဂတိလိုက်စားမှုသည် ဒီမိုကရေစီနှင့် တရားဥပဒေ စိုးမိုးရေးအတွက် အဓိက အတားအဆီးတစ်ရပ်ဖြစ်သည်။ ဒီမိုကရေစီစနစ်တွင် ရုံးများနှင့် အင်စတီကျူးရှင်းများသည် ကိုယ်ကျိုးအတွက် အာဏာကို အလွဲသုံးစားပြုလုပ်သည့်အခါ အများပြည်သူတို့၏ ယုံကြည်အားကိုးမှုကို ဆုံးရှုံးကြရသည်။ အဂတိလိုက်စားမှု ထူပြောသည့်အနေအထား တစ်ရပ်၌ တာဝန်ခံမှုရှိသော နိုင်ငံရေးဦးဆောင်မှု ဖွံ့ဖြိုးလာရန် မဖြစ်နိုင်ပေ။ စီးပွားရေးကဏ္ဍတွင် အဂတိလိုက်စားမှုသည် နိုင်ငံတော်ဘဏ္ဍာများကို အလဟဿဖြစ်စေသည်။ အဂတိလိုက်စားသော နိုင်ငံရေးသမားများသည် ရှားပါးလှသည့် ပြည်သူပိုင်ရင်းမြစ်များကို အများပြည်သူ အကျိုးစီးပွားအတွက် ရင်းနှီးမြှုပ်နံှမည့်အစား မိမိတို့၏ အိတ်ကပ်ထဲသို့သာ ထည့်လိုက်ကြသောကြောင့်ဖြစ်သည်။ အဂတိလိုက်စားမှုသည် တရားမျှတသော ဈေးကွက်အဆောက်အအုံ ဖွံ့ဖြိုးရေးကို အဟန့်အတားဖြစ်စေပြီး လွတ်လပ်စွာယှဉ်ပြိုင်မှုကို ပုံဖျက်ပစ်သောကြောင့် စီးပွားရေးဖွံ့ဖြိုးမှုနှင့် ရင်းနှီးမြှုပ်နှံမှုများကို အကြီးအကျယ် ထိခိုက်စေသည်။ ထို့ကြောင့် နိုင်ငံဖွံ့ဖြိုးရေးနှင့် အများပြည်သူတို့၏ အကျိုးစီးပွားအတွက် နံပါတ်-၁ ရန်သူဖြစ်သော အဂတိလိုက်စားမှုကို စနစ်တကျ ထိရောက်စွာ တိုက်ဖျက်နိုင်ရေးသည် အရေးအကြီးဆုံး ဖြစ်ပါကြောင်း The Daily Eleven သတင်းစာက ရေးသားအပ်ပါသည်။
(ဇန်နဝါရီ ၉ ရက်ထုတ် The Daily Eleven သတင်းစာ၏ အယ်ဒီတာ့အာဘော်)
