ချန်ပီယံလိဂ်မှာ ဘိုင်ယန်မြူးနစ်ကို (၄-၁)ဂိုးနဲ့အနိုင်ယူပြီး (၃)ရက်အကြာမှာပဲ ဘာစီလိုနာအသင်းဟာ လာလီဂါမဟာပြိုင်ဘက် ရီးယဲလ်မက်ဒရစ်အသင်းကို ဘာနေဗျူးကွင်းထဲမှာ (၄-ဝ)ဂိုးနဲ့ ဂိုးပြတ်ခြေပြတ်အနိုင်ရခဲ့ပြန်တယ်။ ဘိုင်ယန်မြူးနစ်နဲ့ ရီးယဲလ်မက်ဒရစ်ဆိုတာ ဒီဘက်နောက်ပိုင်းရာသီတွေမှာ ဘာစီလိုနာကို ငယ်နိုင်အသင်းတစ်သင်းလို ပြတ်ပြတ်သားသားအသာစီးယူထားတဲ့အသင်းတွေဖြစ်ပြီး ဒီလိုအသင်းတွေကိုပဲ လက်ရှိ ဟန်ဆီဖလစ်ခ်ရဲ့ ဘာစီလိုနာက ရက်ပိုင်းအတွင်းမှာပဲ သက်သောင့်သက်သာနဲ့ ဆက်တိုက်အနိုင်ယူပြခဲ့တာပါ။