![](https://news-eleven.com/sites/news-eleven.com/files/styles/news_detail_image/public/news-images/14_49.jpg?itok=zC-_S8a4)
နေ့စားဝန်ထမ်းများနှင့် နေ့စားအလုပ်သမားများ၏ အနိမ့်ဆုံးလုပ်ခလစာကို ထောက်ပံ့ကြေး ကျပ် ၁၀၀၀ ထပ်မံ ခံစားခွင့်ပြုမည်ဖြစ်သဖြင့် အနည်းဆုံးအခကြေးငွေ ကျပ် ၆၈၀၀ ရရှိမည်ကြောင်း အနည်းဆုံးအခကြေးငွေ သတ်မှတ်ရေးဆိုင်ရာအမျိုးသားကော်မတီကထုတ်ပြန်မှုအရ သိရသည်။
နေ့စားဝန်ထမ်းများနှင့် နေ့စားအလုပ်သမားများကို လက်ရှိထောက်ပံ့လျက်ရှိသည့် အပိုထောက်ပံ့ကြေး ကျပ် ၁၀၀၀ အပြင် ထပ်မံ၍ ကျပ် ၁၀၀၀ ကို အပို ထောက်ပံ့ကြေးအဖြစ် ခံစားခွင့်ပြုရန်ဖြစ်သဖြင့် နေ့စား အလုပ်သမားများအား အနည်းဆုံးအခကြေးငွေ နေ့စဉ်လုပ်ခ ကျပ် ၆၈၀၀ /- (ကျပ်ခြောက်ထောင့်ရှစ်ရာတိတိ) ရရှိမည်ဖြဝ်ကြောင်း အနည်းဆုံးအခကြေးငွေ သတ်မှတ်ရေးဆိုင်ရာအမျိုးသားကော်မတီက သြဂုတ် ၉ရက် တွင် အမိန့်ကြော်ငြာစာအမှတ်၊ ၁/ ၂ဝ၂၄ ကို ထုတ်ပြန်ခဲ့သည်။
အနည်းဆုံးအခကြေးငွေနှုန်းထားများကို ၂၀၁၃ ခုနှစ်၊ အနည်းဆုံးအခကြေးငွေဥပဒေ ပုဒ်မ ၁၀၊ ၊ ပုဒ်မခွဲ(ဃ)နှင့်အညီ သုံးပွင့်ဆိုင်ကိုယ်စားလှယ်များနှင့် ညှိနှိုင်းဆွေးနွေးပွဲများ ပြုလုပ်၍ ဆုံးဖြတ်ခဲ့သည့် “ မြန်မာနိုင်ငံရှိ အလုပ်သမားများအတွက် နေရာဒေသနှင့် လုပ်ငန်းအမျိုးအစား မခွဲခြားဘဲ တစ်နိုင်ငံလုံး တစ်ပြေးညီ တစ်နာရီလျှင် ၆ဝဝ ကျပ်(ခြောက်ရာကျပ်) နှုန်းဖြင့် အလုပ်ချိန် ၈ နာရီ (တစ်ရက်) အတွက် ၄,၈ဝဝ ကျပ် (လေးထောင့်ရှစ်ရာကျပ်)" ကို ပြည်ထောင်စုအစိုးရ အဖွဲ့၏ အတည်ပြုချက်ဖြင့် အမျိုးသားကော်မတီ က ၂၀၁၈ ခုနှစ် မေလ ၁၄ ရက်တွင် အမိန့်ကြော်ငြာစာ အမှတ် (၂/၂၀၁၈)ဖြင့် ထုတ်ပြန်သတ်မှတ် ထားသည်။
ထိုသို့ အနည်းဆုံးအခကြေးငွေနှုန်း အလုပ်ချိန် (၈) နာရီ တစ်ရက်အတွက် ကျပ် ၄၈၀၀ သတ်မှတ်ခဲ့ခြင်းအပေါ် ၂၀၂၃ ခုနှစ်၊ အောက်တိုဘာ ၁ ရက်နေ့မှစ၍ အပိုထောက်ပံ့ကြေး တစ်ထောင်ကျပ်တိတိကို အလုပ် လုပ်သောရက်များနှင့် ၁၉၅၁ ခုနှစ်၊ ခွင့်ရက်နှင့် အလုပ်ပိတ်ရက်အက်ဥပဒေအရ ၂၀၂၃ အောက်တိုဘာ ၉ ရက် ရက်စွဲပါအမိန့်ကြော်ငြာစာအမှတ် (၂/၂၀၂၃) ဖြင့် ခံစားခွင့်ပြုပြီးဖြစ်သည်။
အစိုးရဌာနများနှင့်အဖွဲ့အစည်းများရှိ နေ့စားဝန်ထမ်းများနှင့် နေ့စားအလုပ်သမားများ၏ လုပ်ခကို အလုပ်ချိန် တစ်နေ့ ရှစ် နာရီအတွက် လက်ရှိသတ်မှတ်ထားသော လုပ်ခ ကျပ် ၄၈၀၀ အပေါ်တွင် အပိုထောက်ပံ့ကြေးကျပ် တစ်ထောင် ကို ၂၀၂၃ ခုနှစ်၊ အောက်တိုဘာလမှစတင်၍ လစဉ် ခံစားခွင့်ပြုထားပြီး ယခုအခါ ထပ်မံ၍ ကျပ် တစ်ထောင်ကို အပိုထောက်ပံ့ကြေးအဖြစ် ခံစားခွင့်ပြုရန်ဖြစ်သဖြင့် နေ့စား အလုပ်သမားများအား နေ့စဉ်လုပ်ခ ကျပ် ၆၈၀၀ ကို ခွင့်ပြု ရန်ဖြစ်ကြောင်း စီမံကိန်းနှင့်ဘဏ္ဍာရေးဝန်ကြီးဌာန၏ ၂၀၂၄ ခုနှစ် ဇူလိုင် ၂၆ ရက်တွင် အမိန့်ကြော်ငြာ စာအမှတ်(၅၄/၂ဝ၂၄) ဖြင့် ထုတ်ပြန်သတ်မှတ်ထားသည်။
၂၀၂၄ ခုနှစ်၊ ဩဂုတ်လ ၁ ရက်နေ့မှစ၍ လက်ရှိထောက်ပံ့လျက်ရှိသည့် အပိုထောက်ပံ့ ကြေးကျပ် ၁၀၀၀/- အပြင် ထပ်မံ၍ ကျပ် တစ်ထောင် ကို အပိုထောက်ပံ့ကြေးအဖြစ် အလုပ်လုပ်သော ရက်များနှင့် ၁၉၅၁ ခုနှစ်၊ ခွင့်ရက်နှင့် အလုပ်ပိတ်ရက်အက်ဥပဒေအရ ခံစားခွင့်ပြုရန်ဖြစ်ပါသည်။
ဤသတ်မှတ်ချက်သည် အလုပ်သမား ၁၀ ဦးအောက်ရှိလုပ်ငန်းငယ်များ၊ မိသားစုတစ်ပိုင် တစ်နိုင်လုပ်ငန်းများနှင့်သက်ဆိုင်ခြင်းမရှိစေရဟုလည်း ထုတ်ပြန်ချက်တွင် ဖော်ပြ ထားသည်။
အနည်းဆုံးအခကြေးငွေသတ်မှတ်ရေးဆိုင်ရာအမျိုးသားကော်မတီ၏ ၂၀၂၃ ခုနှစ် အောက်တိုဘာ ၉ ရက် ရက်စွဲပါ အမိန့်ကြော်ငြာစာအမှတ် (၂/၂ဝ၂၃) ကို ဤအမိန့်ကြော်ငြာစာဖြင့် လွှမ်းမိုး ပယ်ဖျက်လိုက်ကြောင်း သိရသည်။