ပရီးမီးယားလိဂ်အသင်းများစွာကို ကိုင်တွယ်ခဲ့ဖူးသည့် အင်္ဂလိပ်လူမျိုး နည်းပြ ဟယ်ရီရက်နက်ပ်က အင်္ဂလန်လက်ရွေးစင်အသင်း၏ နည်းပြဖြစ်လာပါက အင်္ဂလိပ်လူမျိုးမဟုတ်လျှင်ပင် နိုင်ငံတော်သီချင်းကို သီဆိုရမည်ဟု ပြောကြားခဲ့သည်။
အင်္ဂလန်လက်ရွေးစင်အသင်း၏ ယာယီနည်းပြအဖြစ် ဆောင်ရွက်နေသော လီကာစလေသည် အိုင်ယာလန် အသင်းနှင့် ယှဉ်ပြိုင်ကစားခဲ့သည့် Nations League ပွဲတွင် နိုင်ငံတော်သီချင်းကို လိုက်မဆိုခဲ့သဖြင့် ဝေဖန် ပြစ်တင်မှုများနှင့် ရင်ဆိုင်နေရသည်။
၎င်းသည် အင်္ဂလန်နိုင်ငံတွင် မွေးဖွားသူဖြစ်သော်လည်း အိုင်ယာလန်လူမျိုးဖြစ်ပြီး အိုင်ယာလန်လက်ရွေးစင်အသင်းအတွက် ပွဲပေါင်း(၄၀) ပါဝင်ကစားခဲ့သူလည်းဖြစ်သည်။ ထို့ကြောင့် ဟယ်ရီရက်နက်ပ်က မည်သည့်လူမျိုးပင်ဖြစ်စေ နိုင်ငံတော်သီချင်း ဆိုသင့် ကြောင်း ပြောကြားခဲ့ခြင်းဖြစ်သည်။
"ဂုဏ်ယူဖွယ် အင်္ဂလိပ်လူမျိုးတစ်ယောက်၊ မျိုးချစ်ပုဂ္ဂိုလ်တစ်ယောက်အနေနဲ့ နိုင်ငံတော်သီချင်း သီဆိုခြင်းဟာ အရေးကြီးတယ်လို့ ထင်ပါတယ်။ ဘယ်အားကစားမှာပဲဖြစ်ဖြစ် ကစားသမားတွေနဲ့ နည်းပြတွေ နိုင်ငံတော်သီချင်း အော်ဟစ်သီဆိုတာမြင်တွေ့ရရင် ကျွန်တော် သဘောကျပါတယ်။ အင်္ဂလိပ်အသင်းတစ်သင်းကို ကိုင်တွယ်နေတယ်ဆိုရင် ဘယ်ကပဲလာလာ သီဆိုသင့်ပါတယ်"ဟု ရက်နက်ပ်က ဆိုခဲ့သည်။
