‘ဝ’ လူမျိုးများအား ကျိုင်းတုံလမ်းကြောင်းတွင် သွားလာမှုကန့်သတ်ခြင်းသည် စစ်ရေးဆိုင်ရာကိစ္စရပ်များကြောင့်ဖြစ်ပြီး ညှိနှိုင်းဆွေးနွေးနေကြောင်း နိုင်ငံတော်အတိုင်ပင်ခံရုံးဝန်ကြီးဌာန ညွှန်ကြားရေးမှူးချုပ် ဦးဇော်ဌေးက ဖေဖော်ဝါရီ ၂၁ ရက်တွင် ပြောကြားသည်။

နေပြည်တော်တွင် ဖေဖော်ဝါရီ ၂၁ ရက်ကပြုလုပ်သည့် မဏ္ဍိုင်ကြီးလေးရပ် အလုပ်ရုံဆွေးနွေးပွဲ ခေတ္တရပ်နားချိန်တွင် သတင်းထောက်တစ်ဦး၏ နိုင်ငံသားစိစစ်ရေးကတ်ပြား (မှတ်ပုံတင်) ကိုင်ဆောင်ထားသည့် ‘ဝ’ လူမျိုးများ ကျိုင်းတုံလမ်းကြောင်းတွင် သွားလာခွင့်မရှိသည့်ကိစ္စရပ်အပေါ် မေးမြန်းရာတွင် ၎င်းက ထိုသို့ပြောကြားခြင်းဖြစ်သည်။

“အဲဒါက ဟိုဘက်မှာ စစ်ရေးဆိုင်ရာကိစ္စရပ်တွေလည်းပါတယ်။ စစ်ရေးဆိုင်ရာကိစ္စရပ်ဆိုတာ မိုင်းလားမှာတပ်စွဲထားတဲ့ ‘ဝ’ တပ်ဖွဲ့ ၄၀၀ လောက်ရှိတာဟာလည်း ရှိသေးတယ်။ အဲဒါတော့ ကျွန်တော်တို့ ညှိနှိုင်းဆွေးနွေးနေတယ်ပေါ့နော်။ အဲဒီလိုပဲပြောလို့ရမယ်” ဟု ညွှန်ကြားရေးမှူးချုပ် ဦးဇော်ဌေးက ဆိုသည်။

ရှမ်းပြည်နယ်မြောက်ပိုင်းရှိ ‘ဝ’ ကိုယ်ပိုင်အုပ်ချုပ်ခွင့်ရတိုင်းနှင့် ရှမ်းပြည်နယ်အရှေ့ပိုင်း ကျိုင်းတုံမြို့သို့ သွားလာသည့်လမ်းကြောင်းပေါ်တွင် နိုင်ငံသားစိစစ်ရေးကတ်ပြားတွင် ‘ဝ’ လူမျိုးဟုရေးသားထားပါက ကန့်သတ်စိစစ်မှုများ ပြုလုပ်ခြင်းဖြစ်သည်။ ထိုသို့ကန့်သတ်မှုများသည် ‘ဝ’ သွေးစည်းညီညွတ်ရေးပါတီ (UWSP/UWSA) အဖွဲ့အား NCA တွင် ပါဝင်လက်မှတ်ရေးထိုးရန် တပ်မတော်ဘက်မှ ဖိအားပေးဆောင်ရွက်လာခြင်းဖြစ်နိုင်ကြောင်း တိုင်းရင်းသားအရေး လေ့လာသူအချို့က သုံးသပ်ကြသည်။

UWSP/UWSA သည် အစိုးရနှင့်အပစ်အခတ်ရပ်စဲထားသည်မှာ နှစ် ၂၀ ကျော်ကြာပြီဖြစ်ပြီး ၂၀၁၁ ခုနှစ်တွင် အစိုးရသစ်နှင့် အပစ်အခတ်ရပ်စဲရေး ထပ်မံပြုလုပ်ထားသော်လည်း NCA ရေးထိုးခြင်းမရှိသေးဘဲ NCA စာချုပ်အား လက်မခံကြောင်း ကြေညာထားသည့် မြောက်ပိုင်းတိုင်းရင်းသား လက်နက်ကိုင်အဖွဲ့များနှင့် ဖွဲ့စည်းထားသော FPNCC ကော်မတီဝင်အဖွဲ့ဝင်ဖြစ်ပြီး တရုတ်နိုင်ငံအစိုးရနှင့်လည်း ဆက်ဆံရေးကောင်းမွန်သည့်အဖွဲ့ဖြစ်သည်။

ငြိမ်းချမ်းရေးကော်မရှင်မှ ကိုယ်စားလှယ်အချို့သည် ၂၀၁၇ ခုနှစ် ဒီဇင်ဘာလအတွင်း တရုတ်နိုင်ငံ၊ ယူနန်ပြည်နယ်၊ ကူမင်းမြို့တွင် မြောက်ပိုင်းတိုင်းရင်းသားလက်နက်ကိုင်အဖွဲ့ဖြစ်သည့် ကချင်လက်နက်ကိုင်အဖွဲ့ (KIO/KIA)၊ ‘ဝ’ သွေးစည်းညီညွတ်ရေးပါတီ (UWSP/UWSA) တို့မှ တာဝန်ရှိသူများအား သီးခြားစီတွေ့ဆုံခဲ့သည်။

ယင်းသို့တွေ့ဆုံမှုအပြီး NCA ကိုလက်မခံသော မြောက်ပိုင်းတိုင်းရင်းသား လက်နက်ကိုင်အဖွဲ့များအနေဖြင့် NCA အား လက်ခံစဉ်းစားမည်ဖြစ်သော်လည်း ၎င်းတို့ဖွဲ့စည်းထားသော ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ (FPNCC) ကိုလက်ခံဆွေးနွေးရမည်ဟု သတင်းထွက်ပေါ်ခဲ့သော်လည်း သီးခြားအတည်ပြုနိုင်ခြင်းမရှိပေ။

“‘ဝ’ နဲ့ ငြိမ်းချမ်းရေးကော်မရှင်ပေါ့နော်။ ဆွေးနွေးမှုတွေ ဒီနောက်ပိုင်းမှာစိပ်လာတယ်။ ဆွေးနွေးနေတယ်။ သို့သော်လောလောဆယ်တော့ ဆွေးနွေးမှုအခြေအနေက ကောင်းမွန်တယ်။ အပြုသဘောဆောင်တယ်။ NCA လက်မှတ်ထိုးဖို့ထိ ကျွန်တော်တို့မျှော်မှန်းပြီးတော့ ဆွေးနွေးနေတယ်။ အဲဒီလောက်ထိပဲ ကျွန်တော်တို့ပြောလို့ရမယ်” ဟု ဦးဇော်ဌေးက ပြောကြားသည်။

တရုတ်နှစ်သစ်အကြို ချစ်ကြည်ရေးခရီးစဉ်အဖြစ် ပန်ဆန်းမြို့သို့ မိုင်းလားအဖွဲ့ အထွေထွေအတွင်းရေးမှူး ဦးကြည်မြင့် ဦးဆောင်သည့်ကိုယ်စားလှယ်အဖွဲ့သည် ၂၀၁၈ ခုနှစ် ဖေဖော်ဝါရီ ၈ ရက်က သွားရောက်ခဲ့ပြီး UWSP/UWSA ဒုတိယဥက္ကဋ္ဌ(၁) ဦးရှောက်မင်လျန်၊ ဒုတိယဥက္ကဋ္ဌ (၂) ကျောက်ကော်အန်နှင့် ဒုတိယဥက္ကဋ္ဌ (၃) ပေါက်ယူလျန်တို့က လက်ခံတွေ့ဆုံခဲ့ကြောင်း ထိုစဉ်အချိန်က ‘ဝ’ အဖွဲ့က သတင်းထုတ်ပြန်ခဲ့ပြီး ဆွေးနွေးသည့်အကြောင်းအရာများ မပါဝင်ပေ။

၂၀၁၆ ခုနှစ်ကပြုလုပ်သည့် ၂၁ ရာစုပင်လုံ ပထမအစည်းအဝေးသို့ မိုင်းလားကိုယ်စားလှယ်အဖွဲ့ တက်ရောက်ခဲ့ပြီး NCA တွင် မိုင်းလားအဖွဲ့အနေဖြင့် ပါဝင်လက်မှတ်ရေးထိုးမည့် သဘောပြောဆိုမှုများပြုလုပ်ခဲ့ပြီးနောက် မိုင်းလားဒေသသို့ ‘ဝ’ တပ်ဖွဲ့များ ဝင်ရောက်တပ်စွဲသည့် ကိစ္စရပ်ဖြစ်ပေါ်ခဲ့ပြီးနောက်ပိုင်းတွင် ‘ဝ’ တပ်ဖွဲ့အချို့ မိုင်းလားဒေသမှ ပြန်လည်ဆုတ်ခွာခဲ့သည်။

သို့ရာတွင် ထိုစဉ်အချိန်က ‘ဝ’ အဖွဲ့က မိုင်းလားဒေသတွင် ဝင်ရောက်တပ်စွဲသည့်ကိစ္စရပ်အား ခရီးကြမ်းချီတက်လေ့ကျင့်မှုသာဖြစ်ကြောင်း အကြောင်းပြခဲ့ပြီး အထင်လွဲမှားမှုကို မိုင်းလားအဖွဲ့နှင့်အတူ ပြေလည်စွာဖြေရှင်းမည်ဟု ‘ဝ’ အဖွဲ့က အစိုးရ၏ငြိမ်းချမ်းရေးကော်မရှင်သို့ အကြောင်းကြားစာပေးပို့ခဲ့သည်။ ထိုသို့ ‘ဝ’ အဖွဲ့နှင့် မိုင်းလားအဖွဲ့အကြား စစ်ရေးတင်းမာမှုများကြောင့် ကျိုင်းတုံနှင့် မိုင်းလားအကြားရှိ ဝမ်တာပင်းဂိတ်အပါအဝင် ဆက်သွယ်ရေးလမ်းကြောင်းအရ အရေးပါသည့်ဂိတ်များအား တပ်မတော်ဘက်က ယာယီပိတ်ထားခဲ့သည်။

နယ်စပ်ရေးရာဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီးရဲအောင် ဦးဆောင်သော အစိုးရကိုယ်စားလှယ်အဖွဲ့သည် ‘ဝ’ ဒေသ ပန်ဆန်းသို့ ၂၀၁၇ ခုနှစ် နိုဝင်ဘာ ၁၁ ရက်ကသွားရောက်၍ UWSP/UWSA ဥက္ကဋ္ဌ ဦးပေါက်ယူချန်း၊ ဒုတိယဥက္ကဋ္ဌ ဦးရှောက်မင်လျန်တို့ပါဝင်သည့် ကိုယ်စားလှယ်အဖွဲ့နှင့် နယ်စပ်ဒေသဖွံ့ဖြိုးတိုးတက်ရေးကိစ္စရပ်များ ဆွေးနွေးခဲ့ပြီး အဆိုပါတွေ့ဆုံမှုတွင် ဝမ်တာပင်းတံတားပိတ်ခြင်းအား နိုင်ငံတော်မှပြန်လည်ဖွင့်လှစ်ပေးရန် ‘ဝ’ အဖွဲ့က တင်ပြခဲ့ကြောင်း ‘ဝ’ အဖွဲ့ထုတ်ပြန်ချက်အရ သိရသည်။