ချယ်လ်ဆီးတိုက်စစ်မှူး ဂျရူးက မိမိအနေဖြင့် အသင်းတွင် ပုံမှန်ပွဲထွက်ခွင့်ရရန် တိုက်ပွဲဝင်သွားမည်ဖြစ်ကြောင်း ပြောကြားခဲ့သည်။
အသက် (၃၄)နှစ်အရွယ်ရှိ ပြင်သစ်ဝါရင့်တိုက်စစ်မှူး ဂျရူးသည် ချယ်လ်ဆီးအသင်းတွင် ဗာနာ၊ အေဘရာဟမ်တို့နောက် တတိယဦးစားပေးအဖြစ်သာ ရှိနေပြီး ယခုရာသီ ပရီးမီးယားလိဂ်ပြိုင်ပွဲတွင် (၁၇)မိနစ်သာ ကစားခွင့်ရထားသည်။
သို့သော် ဂျရူးက မိမိအနေဖြင့် ဗာနာ၊ အေဘရာဟမ်တို့နှင့်အပြိုင် ပုံမှန်ပွဲထွက်ခွင့်နေရာအတွက် တိုက်ပွဲဝင်သွားမည်ဖြစ်ကြောင်း ပြောကြားခဲ့ခြင်းဖြစ်သည်။
ဂျရူးက "ကျွန်တော့်ရဲ့ စာအုပ်မှာ အမြဲတမ်း ယုံကြည်တယ်ဆိုတဲ့ စာသားကို ကျွန်တော် ရေးသားပါတယ်။ ကျွန်တော့်အနေနဲ့ တိုက်ပွဲမဝင်ဘဲနဲ့ ဘယ်ကိုမှ ထွက်ခွာသွားမှာ မဟုတ်ပါဘူး။ ပြိုင်ပွဲတွေက ဘယ်မှာမဆို အမြဲတမ်းရှိပါတယ်။ ပြီးခဲ့တဲ့ရာသီကလည်း ကျွန်တော့်အနေနဲ့ နောက်ဆုံးအချိန်အထိ တိုက်ပွဲဝင်ခဲ့တာကြောင့် ရာသီကုန်ခါနီးမှာ ပွဲကစားခွင့်တွေ ရခဲ့ပါတယ်။ ချယ်လ်ဆီးအသင်းမှာ ကျွန်တော့်ရဲ့ အခန်းကဏ္ဍရှိသေးတယ်လို့ ယုံကြည်ပါတယ်"ဟု ပြောကြားခဲ့သည်။
သို့သော် ဂျရူးက မိမိအနေဖြင့် ချယ်လ်ဆီးအသင်းတွင် လုံးဝနေရာမရပါက လာမည့်ဇန်နဝါရီအပြောင်းအရွှေ့ကာလတွင် အသင်းပြောင်းရွှေ့ရန် စဉ်းစားရနိုင်ကြောင်းလည်း ပြောကြားခဲ့သည်။
ဂျရူးသည် ပြီးခဲ့သည့် ၂၀၁၉-၂၀ ရာသီတွင် ချယ်လ်ဆီးအတွက် ပြိုင်ပွဲစုံ (၂၅)ပွဲ ပါဝင်ကစားခဲ့ပြီး (၁၀)ဂိုး သွင်းယူပေးခဲ့သည်။
