မွန်ပြည်နယ်အတွင်း COVID-19 ရောဂါ သက်သာပျောက်ကင်းသည့်အတွက် အောက်တိုဘာ ၁ ရက်အထိ ဆေးရုံမှဆင်းသွားသူ ၁၄၅ ဦးအထိရှိလာကြောင်း မွန်ပြည်နယ် ပြည်သူ့ကျန်းမာရေးဦးစီးဌာန ထံမှ သိရသည်။
ရောဂါသက်သာပျောက်ကင်းသွားသည့်အတွက် ဆေးရုံမှ ဆင်းသွားသူ (၁၄၅) ဦးရှိကြောင်း၊ လက်ရှိ ဆေးရုံတွင် Positive လူနာ (၁၂၆) ဦးအား ကျန်းမာရေးစောင့်ရှောက်မှုပေးနေကြောင်း၊ Positive လူနာ တစ်ဦးအား ဆေးရုံပြောင်းရွှေ့ပေးထားကြောင်း နှင့် အောက်တိုဘာ ၁ ရက် အထိ Positive လူနာသေဆုံးမှု (၆) ဦးအထိရှိကြောင်း ပြည်နယ်ပြည်သူ့ကျန်းမာရေးဦးစီးဌာန ဒုပြည်နယ်မှူး (စီမံ/ဘဏ္ဍာ) ဒေါက်တာဝတ်မှုံ က ပြောကြားသည်။
၎င်းကဆက်လက်ပြီး"လက်ရှိဆေးရုံမှ ကျန်းမာရေးစောင့်ရှောက်မှုပေးထားတဲ့ Positive လူနာ (၁၂၆) ဦးထဲမှာမ (၆) ဦးလောက်ကိုတော့ နေ့စဉ် ဂရုတစိုက်နဲ့ဆေးကုသမှုပေးနေရပါတယ်။ ကျန်တဲ့လူနာတွေကတော့ ကျန်းမာရေးကောင်းမွန်ကြတယ်လို့ပြောလို့ရပါတယ်။ ဆေးရုံက ဆင်းသွားကြတဲ့လူနာတွေကိုလည်း နေအိမ်မှာ (၇) ရက်နေဖို့၊ ဘယ်ကိုမှ သွားလာတာတွေမလုပ်ဖို့၊ နောက် ရောဂါလက္ခဏာအခုခုခံစားရပြီးဆိုရင် ဆေးရုံကို လာပြန်ပြပေးကြဖို့မှာကြားထားပါတယ်" Positive လူနာသေဆုံးမှုနှင့် ပတ်သက်ပြီး တချို့သေဆုံးသူများမှာ သေဆုံးပြီးနောက် စစ်ဆေးရာမှ COVID – 19 ကူးစက်ရောဂါပိုးတွေ့ရှိရသူများလည်းပါဝင်ကြောင်း ဒေါက်တာဝတ်မှုံ ၏ပြောကြားချက်အရ သိရသည်။
လက်ရှိ မွန်ပြည်နယ်အတွင်း COVID – 19 ကူးစက်ကပ်ရောဂါနှင့် ပတ်သက်ပြီး ကူးစက်ပြန့်နှံ့မှု မဖြစ်ပွားစေရေးအတွက် မော်လမြိုင်၊ ဘီးလင်း နှင့် ကျိုက်ထိုမြို့နယ်များတွင် ညမထွက်အမိန့် ထုတ်ပြန်ထားကြောင်း၊ ထို့အပြင် မော်လမြိုင်မြို့ ချောင်းဆုံမြို့နယ်၊ မုဒုံမြို့နယ် နှင့် ဘီးလင်းမြို့နယ်များရှိ ကျေးရွာတချို့နှင့် လမ်းပိုင်းတချို့အား Lockdown ဧရိယာအဖြစ်သတ်မှတ်ထားပြီး ယင်းနေရာများနှင့် ဆက်စပ်လျှက်ရှိသည့် ရပ်ကွက်နှင့် ကျေးရွာတချို့ကိုလည်း Stay at Home အစီအစဉ် သတ်မှတ်ထားကြောင်း သိရသည်။
