PSG အသင်း၏ ဘရာဇီးလ်လက်ရွေးစင်တိုက်စစ်မှူး နေမာသည် ပြီးခဲ့သည့်မေလအတွင်း ပါရီမြို့ရှိ ဟိုတယ်တစ်ခု၌ အမျိုးသမီးတစ်ဦးကို အဓမ္မပြုကျင့်ခဲ့သည်ဟု စွပ်စွဲခံထား ရကြောင်း သိရသည်။
ဘရာဇီးလ်နိုင်ငံရှိ ဆော်ပေါ်လိုရဲတပ်ဖွဲ့ထံ တိုင်ကြားထားသည့် အချက်အလက်များအရ နေမာနှင့် အမည်မဖော်ပြသည့် အမျိုးသမီးတစ်ဦးသည် Instagram မှတစ်ဆင့် ခင်မင်ရင်းနှီးခဲ့ကြောင်း၊ ၎င်းတို့နှစ်ဦး မက်ဆေ့ချ်များအပြန်အလှန်ပိ့ုခဲ့ပြီးနောက် နေမာ က ပါရီမြို့တွင်တွေ့ဆုံရန် လေယာဉ်လက် မှတ်ပို့ပေးခဲ့သလို Sofitel Paris Arc Du Triomphe ဟိုတယ်၌ အခန်းမှာယူပေးခဲ့ကြောင်း၊ မေ ၁၅ ရက်တွင် ဟိုတယ်သို့ နေမာ ရောက်ရှိလာစဉ် အရက်မူးနေသည်ဟုထင်ရကြောင်း၊ ထို့နောက် ၎င်းတို့နှစ်ဦး စကားပြောဆိုပြီးနောက် အပြန်အလှန်ပွေ့ဖက်နေစဉ် နေမာက ၎င်း၏ခွင့်ပြုချက်မရဘဲ လိင်ပိုင်းဆိုင်ရာကျူးလွန်ရန် ကြိုးပမ်းခဲ့ကြောင်း၊ ၎င်းသည် မေ ၁၇ ရက်တွင် ဘရာဇီးလ်သို့ပြန်သွား ခဲ့ပြီး ပါရီရဲတပ်ဖွဲ့ထံ မတိုင်ကြားခြင်းမှာ ကြောက်လန့်နေသလို အခြားနိုင်ငံတစ်ခု၌ တိုင်ကြားရမည်ကို စိုးရိမ်နေခြင်းကြောင့်ဖြစ်ကြောင်း ရေးသားဖော်ပြထားသည်။
ယင်း ဖြစ်ရပ်နှင့်ပတ်သက်၍ နေမာ၏ဖခင်က စွပ်စွဲမှုများအား ငြင်းဆန်ထားပြီး ထောင်ချောက် တစ်ခုသာဖြစ်ကြောင်း တုံ့ပြန်ပြောကြားသည်။
''ဒါက ထောင်ချောက်တစ်ခုဆိုတာ သေချာပါတယ်။ နေမာရဲ့ WhatApp မက်ဆေ့ချ်တွေအပြင် အဲဒီကောင်မလေးနဲ့ပြောထားတာတွေကိုပါ ပြလို့ရပါတယ်''ဟု ၎င်းက ဆိုသည်။
