ချယ်လ်ဆီးအသင်းသည် ပြင်သစ်ကစားသမားများကို လူမျိုးရေးခွဲခြားသော သီချင်းသီဆိုခဲ့သည့် အသင်း၏အာဂျင်တီးနားကွင်းလယ်ကစားသမား အန်ဇိုဖာနန်ဒက်ဇ်၏လုပ်ရပ်ကို ရှုတ်ချကြောင်းနှင့် ယင်းလုပ်ရပ်အတွက် စုံးစမ်းစစ်ဆေးကာ အရေးယူသွားမည်ဖြစ်ကြောင်း ထုတ်ပြန်ခဲ့သည်။

အသက် (၂၃)နှစ်အရွယ်ရှိ အန်ဇိုဖာနန်ဒက်ဇ်သည် ၂၀၂၄ ကိုပါအမေရိကပြိုင်ပွဲတွင် ဗိုလ်စွဲပြီးနောက် အာဂျင်တီးနားအသင်းဖော်များနှင့်အတူ ပြင်သစ်ကစားသမားများကို လူမျိုးရေးခွဲခြားသည့် သီချင်း သီဆိုခဲ့ခြင်းဖြစ်ပြီး ယင်းဗီဒီယိုကို ၎င်း၏ Instagram တွင် တင်ခဲ့ခြင်းဖြစ်သည်။

အန်ဇိုဖာနန်ဒက်ဇ်နှင့် အာဂျင်တီးနားကစားသမားအချို့က ပြင်သစ်ကစားသမားများသည် အန်ဇိုလာမှ ဖြစ်ကြောင်း၊ ၎င်းတို့၏မိခင်မှာ နိုင်ဂျီးရီးယားဖြစ်ပြီး၊ ဖခင်မှာ ကင်မရွန်းဖြစ်ကြောင်း၊ သို့သော် မှတ်ပုံတင်တွင် ၎င်းတို့သည် ပြင်သစ်များဖြစ်ကြောင်း အဓိပ္ပာယ်ရသည့် သီချင်းကို သီဆိုခဲ့ကြခြင်းဖြစ်သည်။

အန်ဇိုဖာနန်ဒက်ဇ်၏ ဗီဒီယိုဖိုင်ထွက်ပေါ်လာပြီးနောက် ၎င်း၏ချယ်လ်ဆီးအသင်းဖော် ဖိုဖာနာက "၂၀၂၄ ဘောလုံးလောကတွင် လူမျိုးရေးခွဲခြားမှုကို ထိန်းမနိုင်၊ သိမ်းမရဖြစ်နေပြီ"ဟု ၎င်းင်း၏ X တွင် ရေးတင်ခဲ့သည်။

ဖိုဖာနာသည် အိုင်ဗရီကို့စ်ဖခင်မှ မွေးဖွားလာသည့် ပြင်သစ်ကစားသမား ဖြစ်သည်။ ချယ်လ်ဆီးအသင်းတွင် ဖိုဖာနာအပါအဝင် ပြင်သစ်ကစားသမား (၆)ဦးအထိ ရှိနေပြီး ၎င်းတို့သည် အန်ဇိုဖာနန်ဒက်ဇ်၏ လုပ်ရပ်ကို ဒေါသထွက်နေကြောင်း သိရသည်။

အန်ဇိုဖာနန်ဒက်ဇ်သည် အဆိုပါဗီဒီယိုဖိုင်အတွက် ဝေဖန်မှုများနှင့် ရင်ဆိုင်ခဲ့ရပြီးနောက် တောင်းပန်ကြောင်း ပြောကြားခဲ့သည်။

သို့သော် ချယ်လ်ဆီးအသင်းက ၎င်း၏လုပ်ရပ်ကို လက်မခံကြောင်းနှင့် စုံစမ်းစစ်ဆေးမည်ဖြစ်ကြောင်းထုတ်ပြန်ခဲ့သည်။ ချယ်လ်ဆီး၏ထုတ်ပြန်ချက်တွင် ချယ်လ်ဆီးအသင်းသည် လူမျိုးပေါင်းစုံနဲ့ ဖွဲ့စည်းထားပြီး ကွဲပြားမှုများကို လက်ခံကြောင်း၊ အန်ဇို၏တောင်းပန်မှုကို လက်ခံသော်လည်း စစ်ဆေးအရေးယူသွားမည်ဖြစ်ကြောင်း ပါရှိသည်။

ပြင်သစ်ဘောလုံးအဖွဲ့ချုပ်ကလည်း အန်ဇိုဖာနန်ဒက်ဇ်ကို တရားစွဲဆို သွားမည်ဖြစ်ကြောင်း ထုတ်ပြန်ခဲ့သည်။