ကိုကိုးကျွန်းနှင့် ငါးဖမ်းနေသူ တစ်ဦးအား ၂၀၁၅ ခုနှစ် နိုဝင်ဘာက တွေ့ရစဉ် (ဓာတ်ပုံ-မင်းသိန်းနိုင်)
ကိုကိုးကျွန်းသို့ သွားလာရေး အဆင်ပြေစေရန်အတွက် ရေယာဉ်ခရီးစဉ်များ ပြေးဆွဲနိုင်ရန် ညှိနှိုင်းဆောင်ရွက်နေကြောင်း ပို့ဆောင်ရေးနှင့် ဆက်သွယ်ရေး ဝန်ကြီးဌာန ဒုတိယဝန်ကြီး ဦးကျော်မျိုးက ပြောကြားသည်။
သြဂုတ် ၉ ရက်က ပြုလုပ်သည့် အမျိုးသားလွှတ်တော် အစည်းအဝေးတွင် ရန်ကုန်တိုင်းဒေသကြီး မဲဆန္ဒနယ်အမှတ် (၈) မှ ဦးကျော်ထွေးက ရန်ကုန်တိုင်းဒေသကြီး ကိုကိုးကျွန်းမြို့နယ်နေ ပြည်သူလူထုများ ရန်ကုန်မြို့ သို့မဟုတ် အခြားသော မြို့နယ်များသို့ ကူးသန်းသွားလာရေး လွယ်ကူစေရန်အတွက် အထူးအစီအစဉ်များ ချမှတ်ဆောင်ရွက်ပေးရန် အစီအစဉ် ရှိ၊ မရှိနှင့် မြို့နယ်တစ်ခု၏ အင်္ဂါရပ်များနှင့် ပြည့်စုံစွာ ဖွံ့ဖြိုးတိုးတက်ရေးအတွက် နှစ်တို၊ နှစ်ရှည် စီမံကိန်းများ မည်သို့ချမှတ် ဆောင်ရွက်ထားသည်ကို သိရှိလိုကြောင်း မေးမြန်းသည်။
အဆိုပါ မေးမြန်းမှုအား ဒုတိယဝန်ကြီး ဦးကျော်မျိုးက “ကိုကိုးကျွန်းသို့ သွားလာရေး အဆင်ပြေစေဖို့အတွက် ရန်ကုန်-ကိုကိုးကျွန်း-မော်လမြိုင်-ထားဝယ်-မြိတ်-ကော့သောင်း-မြိတ်-ထားဝယ်-မော်လမြိုင်-ကိုကိုးကျွန်း-ရန်ကုန် ကျွန်းပတ်ပြေးဆွဲမယ့် ရေယာဉ်ခရီးစဉ်တွေ ပြေးဆွဲနိုင်ဖို့အတွက် ညှိနှိုင်းဆောင်ရွက်နေပါတယ်ဟု ရန်ကုန်တိုင်းဒေသကြီး အစိုးရအဖွဲ့ကိုယ်စား ဖြေကြားအပ်ပါတယ်” ဟု ပြောကြားသည်။
ကိုကိုးကျွန်းမြို့နယ်သည် ပင်လယ်ဆိပ်ကမ်းမြို့ဖြစ်ပြီး ရာသီဥတုကောင်းမွန်ကာ သဘာဝဘေးဒဏ် ခံရခြင်းလည်း မရှိဘဲ သာယာလှပသည့်အတွက် နောင်လာမည့်နှစ်များတွင် ကမ္ဘာလှည့် ခရီးသွားများအား ဆွဲဆောင်နိုင်မည့် Tourist Attraction ဒေသတစ်ခုအဖြစ် စီမံကိန်းချ ဆောင်ရွက်သွားပါက ပိုမိုဖွံ့ဖြိုးတိုးတက်လာမည်ဖြစ်ကြောင်း၊ ဒေသခံ ပြည်သူများ၏ လူနေမှု အဆင့်အတန်း တိုးတက်ရေး၊ အလုပ်အကိုင် အခွင့်အလမ်း ပိုမိုရရှိစေရေး၊ လူမှုစီးပွားဖွံ့ဖြိုး တိုးတက်ပြီး ပညာရေး၊ ကျန်းမာရေး၊ လူမှုစီးပွားဆိုင်ရာ အခြေအနေများ တိုးတက်လာစေရန်အတွက် နှစ်တိုနှစ်ရှည် စီမံကိန်းများ ချမှတ်ကာ ထည့်သွင်းရေးဆွဲလျက်ရှိကြောင်း ဒုတိယဝန်ကြီးက ပြောကြားသည်။
ကိုကိုးကျွန်းမြို့နယ်အတွင်း ကူးသန်းသွားလာရေး လွယ်ကူစေရန်အတွက် ဒေသခံ စက်လှေကြီးများဖြင့် ကိုကိုးကျွန်းမြို့နယ်နှင့် ဟိုင်းကြီးကျွန်းမြို့နယ်သို့ ခရီးသည်နှင့် ကုန်စည်များကို ရာသီဥတု အခြေအနေပေါ် မူတည်ကာ ပို့ဆောင်ပြေးဆွဲလျက်ရှိကြောင်း၊ ကိုကိုးကျွန်းနှင့် ရန်ကုန်မြို့သို့ စစ်ရေယာဉ်နှင့် ပုဂ္ဂလိကပိုင်ရေယာဉ်များ ပြေးဆွဲခြင်းကြောင့် ဒေသနေပြည်သူများ ရေယာဉ်ကြုံ အခမဲ့ လိုက်ပါနိုင်ပြီး တပ်မတော်လေယာဉ်နှင့် မြန်မာအမျိုးသား လေကြောင်းလေယာဉ်များ ရံဖန်ရံခါတွင် ပျံသန်းလျက်ရှိကြောင်း ဒုတိယဝန်ကြီးက ပြောကြားသည်။
ကိုကိုးကျွန်းမြို့နယ်၏ သောက်သုံးရေ ဖူလုံစေရန်၊ စိုက်ပျိုးရေ ရရှိစေရန်အတွက် ဆောင်ရွက်လျက်ရှိကြောင်း၊ လျှပ်စစ်မီး ရရှိရန်အတွက် ဆောင်ရွက်ထားကြောင်း၊ ဆက်သွယ်ရေး အနေဖြင့် လိုင်းဖုန်းများ တပ်ဆင်သုံးစွဲမှု မရှိသေးသော်လည်း CDMA 450 နှင့် CDMA 800 MHZ တာဝါတိုင် စိုက်ထူပေးထားကြောင်း ၎င်းက ဆက်လက် ပြောကြားသည်။
တိုင်းဒေသကြီး အစိုးရအနေဖြင့် ကျေးလက်မြို့ပြ ဟန်ချက်ညီညီ ဖွံ့ဖြိုးတိုးတက်စေရန်အတွက် စီမံချက်များ ချမှတ်ကာလာမည့် နှစ်များတွင် ဆက်လက်ဆောင်ရွက်မည်ဖြစ်ကြောင်း၊ ဒေသခံပြည်သူများ၏ လူနေမှု အဆင့်အတန်း တိုးတက်ရေး၊ အလုပ်အကိုင် အခွင့်အလမ်း ပိုမိုရရှိစေရေး၊ လူမှုစီးပွား ဖွံ့ဖြိုးတိုးတက်ပြီး ပညာရေး၊ ကျန်းမာရေး၊ လူမှုစီးပွားဆိုင်ရာ အခြေအနေများ တိုးတက်လာစေရန်အတွက် နှစ်တိုနှစ်ရှည် စီမံကိန်းများ ချမှတ်ကာ ထည့်သွင်းရေးဆွဲလျက်ရှိကြောင်း ဒုတိယ ဝန်ကြီးက ပြောကြားသည်။
