အီရန်ကျောထောက်နောက်ခံပေးထားသော ဟူရ်သီသူပုန်အဖွဲ့သည် ၎တို့၏ မဟာပြိုင်ဘက် ဆော်ဒီအာရဗျကို ရေကြောင်းပိတ်ဆို့မှု ပြုလုပ်မည်ဟု ဇူလိုင် ၂၀ ရက်တွင် ကြေညာခဲ့သည်။
ပြီးခဲ့သည့် သီတင်းပတ်အတွင်း နှစ်ဖက်စလုံး နှစ်ပေါင်းများစွာအတွင်း ပထမဆုံးအကြိမ် တိုက်ခိုက်မှုများ ဖြစ်ပွားခဲ့ပြီးနောက် ယခုကဲ့သို့ စစ်ရေးတင်းမာမှု ပိုမိုမြင့်တက်လာခဲ့ခြင်းဖြစ်သည်။
ဟူရ်သီစစ်ဘက်ဆိုင်ရာ ပြောရေးဆိုခွင့်ရှိသူ ရာဟ်ယာဆာရီက ရုပ်သံသတင်းထုတ်ပြန်ချက်တွင် ရာဇဝတ်ဘေးသင့် ရန်သူဆော်ဒီကို "ထပ်တူလက်စားချေခြင်း" မူဝါဒဖြင့် ပင်လယ်ရေကြောင်း ပိတ်ဆို့မှုသည် ယခုကြေညာချက် ထုတ်ပြန်သည့်အချိန်မှစ၍ ချက်ချင်းစတင် အသက်ဝင်မည်ဟု ပြောကြားခဲ့သည်။
ဆော်ဒီအာရေဗျကဟူရ်သီတို့ ထိန်းချုပ်ထားသော "ဆိပ်ကမ်းများနှင့် လေဆိပ်များ" ကို ပိတ်ဆို့ထားခြင်းနှင့် ပြီးခဲ့သည့်သီတင်းပတ်အတွင်း ဆာနားလေဆိပ်ကို ပစ်မှတ်ထား တိုက်ခိုက်ခဲ့ခြင်းတို့ကြောင့် ယခုကဲ့သို့ တုံ့ပြန်ရခြင်းဖြစ်ကြောင်း၊ မိမိတို့အနေဖြင့်လည်း "ပိတ်ဆို့မှုကို ပိတ်ဆို့မှုဖြင့် တုံ့ပြန်သွားမည်" ဖြစ်ကြောင်း ဆာရီက ပြောဆိုခဲ့သည်။
"ပဋိပက္ခအရှိန်မြင့်တက်စေခြင်းဖြင့်ဆော်ဒီရန်သူကလုပ်ဆောင်သည့် မိုက်မဲသောလုပ်ရပ်မှန်သမျှသည် ပိုမိုပြည့်စုံပြီး အပြတ်အသတ် တုံ့ပြန်မှုများဖြင့် ရင်ဆိုင်ရမည်" ဟုလည်း ပြောရေးဆိုခွင့်ရှိသူက ဆက်လက်သတိပေးခဲ့သည်။
လွန်ခဲ့သောသီတင်းပတ်တွင်အီရန်သည် ယီမင်ဝေဟင်ပိုင်နက်ကိုဆော်ဒီ၏ လွှမ်းမိုးထားမှုကို ၎င်း၏ မဟာမိတ်ဟူရ်သီအဖွဲ့မှတစ်ဆင့် စိန်ခေါ်ရန် ကြိုးပမ်းခဲ့သဖြင့် ကာလရှည်ကြာ ငြိမ်သက်နေသည့် ယီမင်ပဋိပက္ခတွင် စစ်ရေးပြန်လည် အရှိန်မြင့်တက်လာခဲ့သည်။
ဟူရ်သီကိုယ်စားလှယ်အဖွဲ့ လိုက်ပါလာသောလေယာဉ် အီရန်မှပြန်လာသည်ကို တားဆီးရန် ဆာနား လေဆိပ်တိုက်ခိုက်ခံရသည်ဟု ယီမင်အစိုးရကပြောကြားခဲ့ပြီး နောက် ဇူလိုင် ၁၃ ရက်တွင်ဟူရ်သီတို့သည် ဆော်ဒီအာရေဗျတောင်ပိုင်း အာဘ်ဟာမြို့ရှိ လေဆိပ်သို့ ဒုံးကျည်များဖြင့် စတင်ပစ်ခတ်တိုက်ခိုက်ခဲ့သည်။
ဆာနားလေဆိပ်တိုက်ခိုက်ခံရမှုအတွက် ယီမင်အစိုးရအား ကျောထောက်နောက်ခံပြုထားသည့် ဆော်ဒီအစိုးရတွင် တာဝန်ရှိသည်ဟု ဟူရ်သီတို့က စွပ်စွဲထားသည်။
Photo - AFP
