မင်းသားပတ်ဂျောင်မင်နှင့် တွဲဖက်သရုပ်ဆောင်ထားသည့် Newtopia ဇွန်ဘီး ဒရာမာရုပ်သံဇာတ်လမ်းတွဲမှ အဆိုတော်ဂျီဆူး၏ သရုပ်ဆောင်ချက်များကို ပရိသတ်က သဘောမကျဖြစ်နေကြပြီး ဂီတဘက်တွင်သာ အာရုံစိုက်လျှောက်လှမ်းရန် တိုက်တွန်းနေကြသည်။
အွန်လိုင်းဖိုရမ်တစ်ခုတွင် ပရိသတ်များက ဂျီဆူးအား သရုပ်ဆောင်ခြင်းထက် အဆိုတော်အလုပ်ကိုသာ ဆက်လုပ်ရန် အကြံပြုနေကြခြင်းဖြစ်သည်။ “ဇာတ်လမ်းထဲက သူ့ရဲ့ အသံထွက်က အတော်ဆိုးတာပဲ” ၊ “ သရုပ်ဆောင်ဖြစ်ဖို့ သူ့မှာပါရမီမပါဘူးပဲ” ၊ “ နောက်ထပ်သရုပ်မဆောင်ပါနဲ့တော့” စသဖြင့် ပရိသတ်က ဝေဖန်ရေးလုပ်နေကြသည်။
ဂျီဆူးကိုအားပေးကြသည့် ယောကျ်ားလေးပရိသတ်အများစုရှိရာ အွန်လိုင်းဖိုရမ်များ၌ပင် ယခုဂျီဆူး၏ Newtopia မှသရုပ်ဆောင်ချက်များကို စိတ်ပျက်သည့်လေသံများ ထွက်လာကြသည်။
အဆိုတော်ဘဝမှ မင်းသမီးဖြစ်လာသည့် ဟေးရီ ၊ မင်းသားချာအွန်ဝူးတို့တုန်းကပင် အစပိုင်း၌ ခေါင်းဆောင်ဇာတ်ရုပ်များမရိုက်ကူးခဲ့ဘဲ၊ နောက်မှပါမောဖန့်များက ပိုသဘာဝကျတိုးတက်လာသည်ကို ပရိသတ်များက ထောက်ပြနေကြကာ ဂျီဆူးကဘာကြောင့် သရုပ်ဆောင်နယ်ပယ်သို့စဝင်ဝင်ချင်း ခေါင်းဆောင်မင်းသမီးနေရာမှ ရိုက်ကူးသလဲဆိုသည်ကို မေးခွန်းထုတ်နေကြသည်။
“အရည်အချင်းရှိတဲ့ Blackpink အဖွဲ့ ဝင်တွေကြားထဲ သူမသိမသာနေလို့ရတယ်။ ခုသရုပ်ဆောင်လုပ်တော့ အားလုံးပေါ်ကုန်ပြီ” ၊ “ Snowdrop တုန်းကလည်း ခေါင်းဆောင်မင်းသားရဲ့ ပရိသတ်တွေက ဇာတ် လမ်းတွဲမအောင်မြင်မှာစိုးလို့ ကာကွယ်ပေးခဲ့ကြတယ်။ဒီတစ်ခါတော့ ဖုံးဖို့မဖြစ်နိုင်တော့ဘူး”ဟု ပရိသတ်က ထောက်ပြနေကြသည်။
Newtopia တွင်ပတ်ဂျောင်မင်က စစ်သားလီဂျယ်ယွန်းအဖြစ် ၊ ဂျီဆူးက ၎င်းင်း၏ချစ်သူယောင်ဂျူးအဖြစ် မြင်ရမည်။ ဆိုးလ်တွင်ဇွန်ဘီးများလွှမ်းမိုးသွားပြီး ချစ်သူနှစ်ဦးတစ်ဦးကိုတစ်ဦးလိုက်ရှာကြပုံကို ဇာတ်လမ်း ဆင်ထားသည်။
Newtopia ကို ဖေဖော်ဝါရီ ၇ ရက်တွင် Coupang မှ စတင်ပြသလိုက်ပြီး အက်ရှင်ဇာတ်ဝင်ခန်းများ ရိုက်ကူးရန် အက်ရှင်သင်တန်းကျောင်းတက်လိုက်ရသေးသည်ဟု ဂျီဆူးက ဖွင့်ဟခဲ့သည်။
