UEFA Nations League ယှဉ်ပြိုင်ရမယ့် လက်ရွေးစင်အသင်း လူစာရင်းတွေကနေ ကစားသမားတွေ ဒဏ်ရာပြဿနာကြောင့် နုတ်ထွက်ကြတာက ထူးခြားတဲ့ အကြောင်းအရာတော့ မဟုတ်ပါဘူး။ နိုင်ငံတကာရက်သတ္တပတ်ရောက်လာတိုင်း အမြဲလိုလိုကြားနေရတဲ့ ပုံမှန်သတင်းပါပဲ။ ဒါပေမဲ့ အင်္ဂလန်လက်ရွေးစင်အသင်းရဲ့ လူစာရင်းကနေ ကစားသမား  ၈ ယောက်အထိ နုတ်ထွက်လိုက်တယ်ဆိုတဲ့ သတင်းကတော့ အံ့အားသင့်စရာကောင်းသွားပါတယ်။ အဲဒီကစားသမားတွေက တကယ်ပဲ ဒဏ်ရာရနေတာရော ဟုတ်ရဲ့လားလို့ သံသယဝင်ချင်စရာလည်း ဖြစ်သွားပါတယ်။ ချယ်လ်ဆီးကစားသမား နှစ်ယောက်ဖြစ်တဲ့ ပါလ်မာနဲ့ ကိုဝဲလ်တို့က အာဆင်နယ်နဲ့ ယှဉ်ပြိုင်ခဲ့တဲ့ ပရီးမီးယားလိဂ် နောက်ဆုံးပွဲမှာ ပွဲချိန်ပြည့်ပါဝင်ကစားခဲ့သူတွေဖြစ်ပြီး မန်စီးတီးတိုက်စစ်ကစားသမား ဖိုဒန်ကလည်း ဘရိုက်တန်နဲ့ပွဲမှာ ပွဲချိန်ပြည့်ကစားခဲ့တာပါပဲ။