ပြီးခဲ့တဲ့ နောက်ဆုံး (၅)ရာသီမှာ မတူညီတဲ့ ချန်ပီယံ (၄)သင်းထွက်ပေါ်ခဲ့ခြင်းနဲ့အတူ စီးရီးအေရဲ့ အားပြိုင်မှုတွေက ပရိသတ်အတွက် စောင့်ကြည့်ရင်ခုန်စရာဖြစ်လာခဲ့တယ်။ (၂၀)ရာစုနှောင်းပိုင်းနဲ့ (၂၁) ရာစုအစပိုင်းကာလတွေမှာ ဥရောပဘောလုံးလောကကို အတိုင်းအဆမဲ့လွှမ်းမိုးနိုင်ခဲ့တဲ့ စီးရီးအေဟာ ၂ဝဝ၆ လုပ်ပွဲအရှုပ်တော်ပုံဂယက်နဲ့အတူ ပုံရိပ်တဖြည်းဖြည်းကျဆင်းသွားခဲ့ပြီး ပရီးမီးယားလိဂ်၊ လာလီဂါတို့လို ပြိုင်ဘက်လိဂ်တွေရဲ့ပြတ်ပြတ်သားသားကျော်တက်ခြင်းကို ခံခဲ့ရတယ်။ တစ်ချိန်က ကမ္ဘာ့အကောင်းဆုံးကစားသမားတွေခြေချရာဖြစ်ခဲ့တဲ့ စီးရီးအေရပ်ဝန်းဟာ ပြီးခဲ့တဲ့ဆယ်စုနှစ်တစ်ခုကျော်အတွင်း ဘဏ္ဍာရေးအကျပ်အတည်းတွေ၊ ဥရောပအောင်ပွဲတွေနဲ့ ဝေးကွာခဲ့ရခြင်းတွေနဲ့အတူ ကြယ်ပွင့်ကစားသမားတွေတဖြည်းဖြည်းလျော့နည်းလာခဲ့ပြီး တကယ်ပဲ စီးရီးအေရဲ့ခေတ်တစ်ခုကုန်ဆုံးသွားပြီလားဆိုတဲ့ မေးခွန်းတွေကျယ်လောင်လာခဲ့တယ်။