ပါရီအိုလံပစ်ပြိုင်ပွဲတွင် အငြင်းပွားဖွယ် ဝေဖန်မှုများရင်ဆိုင်နေရသည့် အမျိုးသမီးလက်ဝှေ့သမား လင်းယုထင်နှင့် အီမန်းခီလိဖ်တို့နှစ်ဦးစလုံး ဗိုလ်လုပွဲတက်ရောက်နိုင်ခဲ့ကြောင်း သိရသည်။
တရုတ်တိုင်ပေနိုင်ငံသူ လင်း (၂၈ နှစ်) နှင့် အယ်လ်ဂျီးရီးယားနိုင်ငံသူ ခီလိဖ် (၂၅ နှစ်) သည် ကျား၊မစစ်ဆေးမှု ကျရှုံးသဖြင့် ပြီးခဲ့သည့်နှစ် ကမ္ဘာ့ချန်ပီယံရှစ် အမျိုးသမီးလက်ဝှေ့ပြိုင်ပွဲ၌ ယှဉ်ပြိုင်ခွင့်မရသော်လည်း ပါရီအိုလံပစ်ပြိုင်ပွဲတွင် ယှဉ်ပြိုင်ခွင့်ရထားသဖြင့် ဝေဖန်မှုများ ထွက်ပေါ်နေခြင်းဖြစ်သည်။
သြဂုတ် ၆ ရက်က ကျင်းပသည့် ၆၆ ကီလို (ဝယ်လ်တာဝိတ်တန်း) ဆီမီးဖိုင်နယ်ပွဲစဉ်တွင် ခီလိဖ်က ထိုင်းကစားသမားကို ၅-၀ မှတ်ဖြင့် အနိုင်ရပြီး ဗိုလ်လုပွဲတက်ရောက်ခဲ့သည်။
ထို့ပြင် သြဂုတ် ၇ ရက်က ကျင်းပသည့် ၅၇ ကီလို (ဖယ်သာဝိတ်တန်း) ဆီမီးဖိုင်နယ်ပွဲစဉ်တွင်လည်း လင်းက တူရကီကစားသမားကို ၅-၀ မှတ်ဖြင့် အနိုင်ရပြီး ဗိုလ်လုပွဲတက်ရောက်ခဲ့ကြောင်း သိရသည်။
၆၆ ကီလိုတန်း ဗိုလ်လုပွဲကို သြဂုတ် ၉ ရက် နှင့် ၅၇ ကီလိုတန်း ဗိုလ်လုပွဲကို သြဂုတ် ၁၀ ရက်တွင် ကျင်းပမည်ဖြစ်ရာ ၎င်းတို့နှစ်ဦးအနေဖြင့် ကစားသမားဘဝ ပထမဆုံး အိုလံပစ်ရွှေတံဆိပ်ဆုရယူနိုင်ရန် မျှော်လင့်ချက်ရှိနေသည်။
ဆီမီးဖိုင်နယ်၌ လင်းအား ရှုံးနိမ့်ခဲ့သည့် တူရကီနိုင်ငံသူ ယီလ်ဒစ်ဇ်က ပွဲအပြီးတွင် အမျိုးသမီးခရိုမိုဇုန်းသင်္ကေတ ''X'' အမှတ်အသားကို လက်နှစ်ဖက်ဖြင့် ပြုလုပ်ပြခဲ့ပြီး သတင်းထောက်များ၏မေးမြန်းမှုကိုမူ ဖြေကြားခြင်းမရှိဘဲ ငြင်းဆန်ခဲ့ကြောင်း သိရသည်။
