မြန်မာ့လက်ရွေးစင်တိုက်စစ်မှူး ဝင်းနိုင်ထွန်း သွားရောက်ကစားနေသည့် အင်ဒိုနီးရှား လီဂါ-၁ ကလပ် ဘော်နီယိုအသင်းသည် ယခုရာသီ အမှတ်ပေးဇယားတွင် ဒုတိယနေရာမှ ပါဆစ်ဘ်အသင်းကို(၁၅) မှတ်ဖြတ်၍ ထိပ်ဆုံးမှ အပြတ်အသတ်ဦးဆောင်နေလျက်ရှိကြောင်း သိရသည်။
ဝင်းနိုင်ထွန်း၏ ဘော်နီယိုအသင်းသည် ၂၀၂၃- ၂၀၂၄ ရာသီ အင်ဒိုနီးရှား လီဂါ-၁ ပြိုင်ပွဲ ပွဲစဉ်(၂၈) အပြီးတွင် (၂၀) ပွဲနိုင်၊ (၆) ပွဲသရေ၊ (၂) ပွဲရှုံး၊ ရမှတ်(၆၆) မှတ်ဖြင့် ထိပ်ဆုံးမှဦးဆောင်နေပြီး ဒုတိယနေရာမှ ပါဆစ်ဘ်အသင်းမှာ ရမှတ်(၅၁) မှတ်ဖြင့် ရပ်တည်နေကြောင်း သိရသည်။
ဘော်နီယိုအသင်းသည် ပြီးခဲ့သည့် မတ်(၇) ရက် ပွဲစဉ်(၂၈) အဖြစ် ပါဆီဘာယာအသင်းနှင့် အိမ်ကွင်းတွင် ယှဉ်ပြိုင်ကစားခဲ့ရာ(၂-၁) ဂိုးဖြင့် အနိုင်ရရှိခဲ့သည်။
တိုက်စစ်မှူးဝင်းနိုင်ထွန်းသည် ပြီးခဲ့သည့် ၂၀၂၃ ခုနှစ် မေလအတွင်းက ရန်ကုန်ယူနိုက်တက်နှင့် လမ်းခွဲပြီးနောက် အင်ဒိုနီးရှားကလပ် ဘော်နီယိုအသင်းထံသို့ တစ်ရာသီစာချုပ်ဖြင့် ပြောင်းရွှေ့ကစားနေခြင်းဖြစ်သည်။
မြန်မာ့လက်ရွေးစင် ကွင်းလယ်လူ မြတ်ကောင်းခန့်၏ ပါဆီကာဘိုအသင်းမှာမူ ပွဲစဉ်(၂၈) အပြီးတွင် (၃) ပွဲနိုင်၊ (၈) ပွဲသရေ၊ (၁၇) ပွဲရှုံး၊ ရမှတ်(၁၇) မှတ်ဖြင့် အမှတ်ပေးဇယားအောက်ဆုံးနေရာတွင် ရပ်တည်နေလျက်ရှိသည်။
