ရုရှားသမ္မတ ပူတင်၏ အာရုံက ဆီးရီးယား နိုင်ငံပေါ် ကျနေသည်။ ယူကရိန်း အရှေ့ပိုင်း ပြဿနာ ဖြေရှင်းရန်အတွက် အလားအလာများ ရှိနေသည်။ ယူကရိန်း အစိုးရအနေဖြင့် ပြုပြင်ပြောင်းလဲမှုများ ပြုလုပ်ရေးနှင့် စီးပွားရေး ကျဆင်းနေမှုကို ရပ်တန့်ရန် လုပ်ဆောင်ရမည့် အချိန်ကျနေပြီ။ ယခုလတွင် ကျင်းပခဲ့သော ပါလီမန်တွင် ဝန်ကြီးများနှင့် ပြည်နယ် အုပ်ချုပ်ရေးမှူးများကြား ဘဏ္ဍာရေးဆိုင်ရာ ကိစ္စရပ်များနှင့် ပတ်သက်၍ မကျေနပ်မှုများ ဖြစ်ပေါ်ခဲ့သည်။ နိုင်ငံတကာ ငွေကြေးရန်ပုံငွေ အဖွဲ့မှ ထောက်ပံ့ငွေ ဒေါ်လာ ၁၇ ဒသမ ၅ သန်း ခွဲဝေမှုနှင့် ပတ်သက်၍ အမြင်တွေ မတူကြ။
မအောင်မြင်သော ယူကရိန်း လိမ္မော်ရောင် တော်လှန်ရေးနှင့် ပတ်သက်၍ ပုံရိပ်များကို ပြည်သူများက မမေ့နိုင်ကြသေး။ ကွန်မြူနစ်ဝါဒ၏ ဆိုးသွမ်းသော အတိတ်ဖြစ်ရပ်များမှ ကျော်လွှားနိုင်ရန် အတွက် စီးပွားရေး ပြုပြင်ပြောင်းလဲမှုများမှာ ပွင့်လင်းမြင်သာမှု ရှိစေဖို့ အရေးကြီးနေသည်။ ၂၀၁၄ ခုနှစ်တွင် ပြည်သူများသည် ရုရှားလိုလားသော အစိုးရ ခေါင်းဆောင်များ၏ လုပ်ဆောင်မှုများ မကျေနပ်၍ ဆန္ဒပြပွဲများ ဖြစ်ပေါ်ခဲ့သည်။ ပြည်သူများ လိုလားနေသည်က ရုရှားပုံစံ ဒီမိုကရေစီမဟုတ်။ ဥရောပပုံစံ ပွင့်လင်းမြင်သာမှု ရှိသော ဒီမိုကရေစီသာ ဖြစ်သည်။
လက်ရှိဖြစ်ပေါ်နေသော ဖြစ်ရပ်များကို ကြည့်လျှင် ယူကရိန်း နိုင်ငံသည် ဓားသွားထက်တွင် လျှောက်နေသည့် ပုံစံဖြစ်နေသည်။ နိုင်ငံရေးအရ ကိုယ့်ကိုယ်ကိုယ် သေကြောင်းကြံစည်သည့် ပုံစံမျိုး ရောက်နေသည်ဟု ဂျော့ချ်ဖော်ဘရစ်က သုံးသပ်ထားသည်။ ဖော်ဘရစ်က ဘာလင်မြို့ရှိ အမေရိကန် ပြည်ထောင်စုဆိုင်ရာ ဂျာမန်မာရှယ် ရန်ပုံငွေ အဖွဲ့မှ ထိပ်တန်းအရာရှိ တစ်ဦးဖြစ်သည်။ ယူကရိန်း အစိုးရအဖွဲ့ အတွင်း နိုင်ငံရေး အယူအဆများ ကွဲပြားနေခြင်းသည် အကျိုးမရှိ။ မော်စကိုသာ အမြတ်ထွက်သည့်ကိန်း ဆိုက်ရောက်လိမ့်မည်ဟု ဖော်ဘရစ်က သတိပေးထားသည်။ ယူကရိန်း နိုင်ငံသည် နိုင်ငံရေးနှင့် စီးပွားရေးဆိုင်ရာ ပြုပြင်ပြောင်းလဲမှုများ မပြုလုပ်နိုင်လျှင် ဖြစ်စေ၊ အနောက်နိုင်ငံများနှင့် ဆက်ဆံရေး မကောင်းလျှင်ဖြစ်စေ မော်စကိုက သူတို့ဖြစ်စေချင်သည့် ပုံစံကို လုပ်ဆောင်နေခြင်းအတွက် ကျေနပ်မှုများ ဖြစ်ပေါ်စေမည်။
ယူကရိန်းသမ္မတ ပီထရိုပိုရိုရှင်ကို ဝန်ကြီးချုပ် အာဆင်နီယက်ဆန်ယွတ်တို့ကို အမေရိကန်နှင့် ဥရောပတိုက်က ထောက်ခံထားသည်။ သို့ပေမဲ့ သမ္မတနှင့် ဝန်ကြီးချုပ်တို့သည် အမေရိကန်နှင့် ဥရောပတိုက်ကို အကျင့်ပျက် ခြစားမှုများ တိုက်ဖျက်ရေး၊ အာဏာချုပ်ကိုင်ထားသော လူနည်းစုများအား ဖယ်ရှားရေးကို မလုပ်ဆောင်နိုင်။ နိုင်ငံတကာက ပွင့်လင်းမြင်သာမှု ရှိရေး အဖွဲ့၏ သတ်မှတ်ချက်အရ ကမ္ဘာပေါ်ရှိ ပွင့်လင်းမြင်သာမှု အနည်းဆုံး ၁၇၅ နိုင်ငံထဲတွင် ယူကရိန်းက အဆင့် ၁၄၂ ဖြစ်နေသည်။ အကျင့်ပျက် ခြစားမှု ထူပြောနေသည့် ယူကရိန်း နိုင်ငံ၏ ရှေ့ခရီးမှာ များစွာကြာမြင့်ဦးမည်ဟု ကမ္ဘာ့ဘဏ်က အောက်တိုဘာလတွင် ထုတ်ပြန်ခဲ့သည်။
ဒီဇင်ဘာ ၁၁ ရက်နေ့က ဝန်ကြီးချုပ် ယက်ဆန်ယွတ် မိန့်ခွန်း ပြောကြားချိန်တွင် ပိုရိုရှင်ကို၏ ပါတီမှ ဥပဒေပြု အမတ်တစ်ဦးက ကြားဖြတ်ပြီး ဝန်ကြီးချုပ်ကို ဖယ်ရှားရမည်ဟု ထပြောခဲ့သဖြင့် ပါလီမန် အမတ်တွေ ပွဲကျသွားခဲ့သည်။ ဤဖြစ်ရပ် ပေါ်ပေါက်ပြီး နောက်တစ်နေ့တွင် ဂျော်ဂျီယာသမ္မတဟောင်း မစ်ဟေးဆက်ကာရှက်ဗလီ (လက်ရှိ ဟိုဒက်ကာပြည်နယ် အုပ်ချုပ်ရေးမှူး) ဂျော်ဂျီယာ ပြည်ထဲရေးဝန်ကြီး အာဆင်အေဗာကော့နှင့် အခြားအစိုးရ အဖွဲ့ဝင်များကို လာဘ်ပေးလာဘ်ယူမှုများ ပြုလုပ်နေကြောင်း စွပ်စွဲခဲ့သည်။ ပါလီမန်တွင် ယခုကဲ့သို့ စွပ်စွဲပြစ်တင်မှုများကို ပိုရိုရှင်ကို ဘာမှမတတ်နိုင်။
ရွေးကောက်ပွဲကို ၂၀၁၄ မေလ ၂၅ ရက်က ကျင်းပခဲ့ရာ ပိုရိုရှင်ကို အနိုင်ရရှိခဲ့သည်။ ပထမ အကျော့တွင် အနိုင်အရှုံး ပြတ်သားသဖြင့် ဒုတိယအကျော့ မယှဉ်ပြိုင်ရပေ။ ၂၀၁၄ ခရိုင်းမီးယား အကျပ်အတည်းနှင့် ရင်ဆိုင်နေရချိန်တွင် ရွေးကောက်ပွဲ ကျင်းပခဲ့ခြင်း ဖြစ်၏။ စီးပွားရေး အကျပ်အတည်းနှင့် ရင်ဆိုင်နေရသော ယူကရိန်း နိုင်ငံသည် နိုင်ငံတကာ ငွေကြေးရန်ပုံငွေ အဖွဲ့နှင့် အနောက်နိုင်ငံများမှာ ဒေါ်လာ ၁ ဒသမ ၇ ဘီလျံ ချေးယူခြင်း လုပ်ငန်းကို ပါလီမန်က အတည်မပြုလျှင် နိုင်ငံအခြေအနေ ဆိုးရွားသွားနိုင်ကြောင်း ဝန်ကြီးချုပ် ယက်ဆန်ယွတ်က သတိပေးလိုက်သည်။
ရုရှားတို့က ခရိုင်းမီးယား ကျွန်းဆွယ်ကို သိမ်းပိုက်ခဲ့ခြင်း၊ ယူကရိန်း အရှေ့ပိုင်းဒေသတွင် ခွဲထွက်ရေး သမားများကို ရုရှားတပ်များက ထောက်ပံ့နေခြင်းတို့နှင့် ကြုံတွေ့နေရသဖြင့် ယူကရိန်း အစိုးရသည် စစ်မျက်နှာ ပေါင်းစုံမှ တိုက်ခိုက်မှုများ ခံနေရသည်။ ရုရှားက ယူကရိန်း အစိုးရအား ချေးယူထားသော ဒေါ်လာ သုံးဘီလျံကို ပြန်ပေးရန် တောင်းဆိုလိုက်သည်။ ဤအတွက် ရုရှားနှင့် ယူကရိန်း အစိုးရသည် တရားရုံးတွင် ဖြေရှင်းရမည့် အခြေအနေ ဆိုက်ရောက်လာသည်။
အစိုးရ အဖွဲ့တွင် ဤအကျင့်ပျက် ခြစားမှုများ ဖြစ်ပေါ်နေခြင်းကြောင့် အစိုးရသည် အကျင့်ပျက် ခြစားမှုကို မဖြေရှင်းနိုင်ကြောင်း အမေရိကန် ဒုသမ္မတ ဂျိုးဘိုင်ဒင်က ပြီးခဲ့သည့် တနင်္ဂနွေနေ့က အသိပေးလိုက်သည်။ အကျင့်ပျက် ခြစားမှုသည် ကင်ဆာရောဂါကဲ့သို့ ပျံ့ နှံ့နေကြောင်း၊ အစိုးရအဖွဲ့နှင့် ပူးပေါင်း၍ အာဏာရယူထားသူများ အာဏာ ပြန်လည်ရနေကြောင်း၊ ပြုပြင်ပြောင်းလဲရေး လုပ်ငန်း လုပ်ဆောင်ရသည်မှာ မည်မျှခက်ခဲသည်ကို မိမိတို့ သိကြောင်းနှင့် အကျင့်ပျက် ခြစားမှုများသည် ယူကရိန်း နိုင်ငံကို လမ်းကြောင်းမှန်ပေါ် ရောက်အောင် အဟန့်အတားများ ဖြစ်နေကြောင်း ဂျိုးဘိုင်ဒင်က အသိပေး စကားပြော ကြားခဲ့သည်။
အစိုးရသစ် တစ်ရပ်ကို ၂၀၁၄ ခုနှစ်တွင် ဖွဲ့စည်းနိုင်ခဲ့ပေမယ့် တရားစီရင်ရေး စနစ်နှင့် အုပ်ချုပ်ရေး စနစ်တွင် အဂတိတရား လိုက်စားမှုနှင့် အကျင့်ပျက် ခြစားမှုများ ရှိနေဆဲဖြစ်သည်။ ပိုရိုရှင်ကိုသည် အစိုးရနှင့် ပူးပေါင်းပြီး အာဏာကို အလွဲသုံးစား ပြုနေသူများကို မဖယ်ရှားနိုင်သေးသည့် အပြင် ထိုပုဂ္ဂိုလ်များသည် အာဏာပွဲစားများအဖြစ် ဆက်လက် တည်ရှိနေကြောင်း နိုင်ငံရေး သမားများက ဝေဖန်ထားကြသည်။ နိုင်ငံရေး မငြိမ်မသက် ဖြစ်နေသော ယူကရိန်း အရှေ့ပိုင်းတွင် အစိုးရနှင့် ပူးပေါင်းပြီး အာဏာရယူထားသူများ လက်ထဲတွင် သြဇာအာဏာများ ရှိနေဆဲဖြစ်သည်။
ယူကရိန်း အစိုးရတပ်နှင့် ရုရှားလိုလားသော သူပုန်များ အကြားတွင် မြေစာပင် ဘဝရောက်နေသည့် ပြည်သူများ၏ ဘဝမှာ အားကိုးစရာ မဲ့နေကြသည်။ ယူကရိန်း အရှေ့ပိုင်းရှိ ဇေဆီဗီရွာ ကလေးရှိ အိုဆာနာဘွိုင်ကို၏ ရင်သွေးငယ်များသည် အစိုးရ ထိန်းထားသည့် ရွာမှနေ၍ သူပုန်တပ်များ သိမ်းထားသော ဒေသသွားပြီး စာသင်နေရသည်။
ဇေဆီဗီရွာကမှာ အိမ်ခြေ ၃၀၀ ခန့်ရှိသည်။ ရွာသူရွာသား ၉၀၀ ခန့်၏ ဘဝမှာ လမ်းပန်းဆက်သွယ်ရေးမှ အစ ကျန်းမာရေး စောင့်ရှောက်မှုအထိ ဘာမှအဆင်မပြေ။ ဒီကြားထဲ တိုက်ပွဲဒဏ်ကြောင့် နေအိမ် အဆောက်အအုံတွေ မီးလောင် ပျက်စီးနေသည်။ ဒေသခံ ပြည်သူများအတွက် စားဝတ်နေရေး အခက်အခဲထက် ကျန်းမာရေးက ပို၍ အရေးကြီးနေသည်။ ရွာတွင် ကျန်းမာရေးမှူးတွေ မရှိ။ အစိုးရ တပ်ဖွဲ့နှင့် လိုက်ပါလာသည့် စစ်ဆရာဝန်ထံ ဆေးကုသမှု ခံယူနေရသည်။ ဆရာဝန်ကလည်း တိုက်ပွဲတွင် ဒဏ်ရာရခဲ့သည့်  စစ်သားများကို  ကုသပေးနေရသဖြင့် ကျေးလက်ပြည်သူများကို အချိန်ပြည့် ကုသမပေးနိုင်။
ကျေးရွာတွင် နေထိုင်ကြသူ အများစုမှာ သက်ကြီးရွယ်အိုတွေ ဖြစ်ကြသည်။ အများစုက ပင်စင်စားတွေ ဖြစ်ကြသည်။ ဆေးဝါး မပြည့်စုံမှုက လူနာများ အသက်အန္တရာယ်ကို ကယ်တင်ဖို့ အခွင့်အလမ်း အလွန် နည်းပါးနေသည်။ အသည်းအသန် ပြည်သူများသည် သုံးမိုင်ခန့် ဝေးသည့် အာတီမီဗစ်မြို့ရှိ ဆေးရုံသို့ သွားရောက် ကုသနေရသည်။
အစိုးရ တပ်များနှင့် ရုရှားတပ်များ တိုက်ပွဲဖြစ်ပွားနေသည်မှာ လပေါင်း ၂၀ ခန့် ကြာပြီ။ ငြိမ်းချမ်းရေး ရဖို့အတွက် အချိန်များစွာ ကြာမြင့်နေဦးမည်။ ရုရှား၏ ကျူးကျော်မှု အန္တရာယ်မှ ရင်ဆိုင်နေရသော ယူကရိန်း အစိုးရသည် စီးပွားရေး ပြုပြင်ပြောင်းလဲရေး၊ အကျင့်ပျက် ခြစားမှု တိုက်ဖျက်ရေးနှင့် ပွင့်လင်းမြင်သာမှု မရှိသော အုပ်ချုပ်ရေး စနစ်များကို ပြောင်းလဲဖို့ အရေးကြီးနေသည်။ စစ်ရေးဆိုသည်က စီးပွားရေး အခွင့်အရေး လက်အောက်ခံဖြစ်သည့်အတွက် ယူကရိန်း အစိုးရအဖွဲ့ အနေဖြင့် နိုင်ငံရေး၊ စီးပွားရေးများကို မှန်ကန်သော နည်းလမ်းများဖြင့် လုပ်ဆောင်ဖို့ လိုနေပြီ ဖြစ်သည်။