မန်ယူတိုက်စစ်ကစားသမား ရပ်ရှ်ဖို့ဒ်က ၎င်း၏ကစားသမားဘဝတစ်လျှောက် ရင်ဆိုင်ရအခက်ဆုံး ပြိုင်ဘက်မှာ မန်စီးတီးနောက်ခံလူ ဝေါ်လ်ကာဖြစ်ပြီး မန်ချက်စတာမြို့ခံပြိုင်ဘက် မန်စီးတီးထက် လီဗာပူးလ်ကို ပိုမုန်းကြောင်း ဖွင့်ဟပြောကြားခဲ့သည်။
အသက် (၂၅)နှစ်အရွယ် အင်္ဂလန်တိုက်စစ်ကစားသမား ရပ်ရှ်ဖို့ဒ်သည် မန်ယူနောက်ခံလူဟောင်း ဂယ်ရီနဗီးလ်နှင့် ပြုလုပ်ခဲ့သည့် The Overlap Quickfire Questions တွင် ယင်းကဲ့သို့ ပြောဆိုခဲ့ခြင်းဖြစ်သည်။
ကစားသမားဘဝတစ်လျှောက် ရင်ဆိုင်ရအခက်ခဲဆုံးပြိုင်ဘက်ကို မေးမြန်းရာ ရပ်ရှ်ဖို့ဒ်က "ဝေါ်လ်ကာလို့ ပြောချင်ပါတယ်။ သူ့ရဲ့ခန္ဓာကိုယ် ကြံ့ခိုင်မှုက မယုံနိုင်စရာဖြစ်ပြီး သူနဲ့ ရင်ဆိုင်ရတာ အရမ်းခက်ပါတယ်။ သူက နေရာယူမှားနေရင်တောင် ပြန်ပြီး လိုက်နိုင်သူပါ။ သူ့ကို ကျော်ပြေးဖို့ ကြိုးစားပေမဲ့ သူ ပိုမြန်နေပါတယ်"ဟု ပြောကြားခဲ့သည်။
မန်ယူအသင်းသည် မန်စီးတီးနှင့် လီဗာပူးလ်အသင်းတို့ကို ၎င်းတို့၏အကြီးဆုံးပြိုင်ဘက်အဖြစ် သတ်မှတ်ထားသည်။ မန်ယူအသင်းအနေဖြင့် ပြီးခဲ့သည့်ရာသီက (၆)နှစ်ကြာ ဖလားလက်မဲ့ဖြစ်ခဲ့မှုကို အဆုံးသတ်နိုင်ခဲ့သော်လည်း ယင်းနှစ်များတွင် မန်စီးတီးနှင့် လီဗာပူးလ်တို့က ချန်ပီယံလိဂ်ဖလားများပါ ရယူခဲ့ကြသည်။
မန်စီးတီးနှင့် လီဗာပူးလ်တို့တွင် မည်သည့်အသင်းကို ပိုမုန်းသလဲမေးမြန်းခဲ့ရာ ရပ်ရှ်ဖို့ဒ်က "လီဗာပူးလ်ပါ။ နှစ်သင်းစလုံးကို မုန်းပေမဲ့ လီဗာပူးလ်ကို ပိုမုန်းပါတယ်"ဟု ပြောကြားခဲ့သည်။
