■ ရုရှား-အမေရိကန် စစ်အေးတိုက်ပွဲကနေ အမေရိကန်ချင်းတိုက်မယ့်ပွဲ

Photos: AFP & Getty Images

Published 21 October 2022

အသင်းပိုင်ရှင် တော့ဒ်ဘိုလီနဲ့ ပတ်သက်ရင် ချယ်လ်ဆီးပရိသတ်အများစုရဲ့ ခံစားချက်သိပ် မကောင်းသေးဘူး။ တူဟယ်လ်အပေါ် တော့ဒ်ဘိုလီ ဆက်ဆံခဲ့ပုံကို သူတို့အမြင်မကြည်ခဲ့ပါဘူး။ ဇာတ်ကြောင်းပြန်လှန်ရရင် ရုရှား-ယူကရိန်းစစ်ပွဲ ကြောင့် အင်္ဂလန်ကနေ အေဘရာမိုဗစ်ချ် ထွက်ခွာရမယ့်အရေးကို တူဟယ်လ် စိတ်မသက်မသာဖြစ်ခဲ့တယ်။ အဲဒီအချိန်တုန်းက ချယ်လ်ဆီးပရိသတ်အများစုဟာ အေဘရာမိုဗစ်ချ် လွမ်းချင်းထဲဆွေးမြေ့နေဆဲ၊ အမေရိကန်တွေကို ဝမ်းသာအားရမကြိုဆိုရဲခဲ့ဘူး။ ဒုတိယမန်ချက်စတာယူနိုက်တက်ဖြစ်လာမှာ စိုးထိတ်ခဲ့တယ်။ ဒါမှမဟုတ် အေဘရာမိုဗစ်ချ်လောက်ကောင်းတဲ့သူ ရှိတော့မှာမဟုတ်ဘူးလို့ တွေးမိနေတာလည်းဖြစ်နိုင်တယ်။