■ ကယ်တင်ရေးစင်္ကြံနှင့် ဒုက္ခသည်များ

မတ်လ ၁၈ ရက်အထိ ယူကရိန်းမြို့ကြီးများ၌ ပိတ်မိနေခဲ့သော အရပ်သားများအနက် စုစုပေါင်း ၉၁၄၅ ဦးကို ကယ်ထုတ်နိုင်ခဲ့ပြီးဖြစ်ကြောင်း ယူကရိန်းသမ္မတရုံးမှ တာဝန်ရှိသူ ကီရီလိုတီမိုရှန်ကိုက ပြောကြားခဲ့သည်။ သူရေးသားထားသော လူမှုကွန်ရက်ပို့စ်အရ မာရီယူပိုးလ်တစ်မြို့တည်းမှ အရပ်သား ၄၇၉၂ ဦးထွက်ခွာနိုင်ခဲ့ကြောင်း သိရသည်။

အီတလီနိုင်ငံသို့ နေရပ်စွန့်ခွာထွက်ပြေးလာခဲ့သော ယူကရိန်းဒုက္ခသည်အမျိုးသမီး ၂၇၀၀၀ နှင့် ကလေးသူငယ် ၂၁၆၀၀ ရှိကြောင်း ပြည်ထဲရေးဝန်ကြီးဌာနက ထုတ်ပြန်သည်။ အီတလီအစိုးရက ဒုက္ခသည်စုစုပေါင်း ၁၇၅၀၀၀ ထိ လက်ခံနိုင်ရန် စီစဉ်လျက်ရှိပြီး အစိုးရအဖွဲ့အစည်းအဝေးသို့ အတည်ပြုနိုင်ရန် တင်ပြထားသည်။

စစ်ပွဲ၏ စတုတ္ထသီတင်းပတ်အစ၊ မတ် ၁၈ ရက် ဒေသစံတော်ချိန် နံနက် ၉ နာရီ၌ ပိုလန်နိုင်ငံအတွင်း ယူကရိန်းဒုက္ခသည် ဝင်ရောက်မှုမှာ စုစုပေါင်းဦးရေ ၂ သန်း ပြည့်သွားပြီဖြစ်ကြောင်းနှင့် အမျိုးသမီးနှင့် ကလေးငယ်များဖြစ်ကြောင်း နယ်ခြားစောင့်တပ်ဖွဲ့က တွစ်တာတွင် ရေးသားခဲ့သည်။

ဖေဖော်ဝါရီလ ၂၄ ရက်မှစ၍ ဘေးလွတ်ရာ၌ ခိုလှုံရန် အိုးအိမ်စွန့်ခွာထွက်ပြေးရသူ ယူကရိန်းနိုင်ငံသားက ၁၀ သန်းကျော်ပြီး ယူကရိန်းလူဦးရေ၏ လေးပုံတပုံဖြစ်သည်။ နေရပ်စွန့်ခွာထွက်ပြေးရသူ သက်ကြီးရွယ်အို၊  အမျိုးသမီးနှင့် ကလေးသူငယ်ဦးရေ ခြောက်သန်းခွဲခန့်မှာ ပြည်တွင်းအိုးအိမ် ရွှေ့ပြောင်းရသူများဖြစ်ပြီး နယ်စပ်ကျော်ဖြတ်ကာ ဒုက္ခသည်အဖြစ်  ပြည်ပထွက်ပြေးရသူများမှာ အမျိုးသမီးနှင့် ကလေးသူငယ်အများစု လူပေါင်း သုံးသန်းခွဲကျော်ရှိမည်ဟု နိုင်ငံတကာရွှေ့ပြောင်းအခြေချသူများဆိုင်ရာအဖွဲ့က ခန့်မှန်းထားသည်။

ရုရှားနိုင်ငံ ကာကွယ်ရေးထိန်းချုပ်မှုစင်တာအကြီးအကဲ မစ်ခေးမစ်ဇင်ဆက်က ဒေသစံတော်ချိန် မတ်လ ၂၀ ရက်နေ့တွင် ကြေညာချက်ထုတ်ပြန်ခဲ့ပြီး ရုရှားစစ်တပ်သည် မော်စကိုစံတော်ချိန် မတ်လ ၂၁ ရက်၊ နံနက် ၁၀ နာရီမှစ၍ မေရီယူပိုးလ်၏ အရှေ့နှင့် အနောက်သို့ လူသားချင်း စာနာထောက်ထားမှုလမ်းကြောင်း ဖွင့်လှစ်မည်ဖြစ်ကြောင်း၊ ယူကရိန်းအမျိုးသားရေးဝါဒီများကို မော်စကိုစံတော်ချိန် မတ်လ ၂၁ ရက်၊ နံနက် ၁၀ နာရီမှ ၁၂ နာရီအတွင်း မေရီယူပိုးလ်မှ ထွက်ခွာခွင့်ပြုမည်ဖြစ်ကြောင်း၊ သို့သော်လည်း မည်သည့်လက်နက်မျှ ယူဆောင်ခြင်းမပြုရကြောင်း ပြောကြားခဲ့သည်။ ရုရှားသည် ယူကရိန်း အမျိုးသားရေးဝါဒီများကို လက်နက်ချ၍ မေရီယူပိုးလ်မှ ကိယက်ဗ်ထိန်းချုပ်နယ်မြေသို့ ထွက်ခွာရန် တိုက်တွန်းပြီး သူတို့၏အသက်လုံခြုံရေးကို အာမခံချက် ပေးမည်ဖြစ်သည်။

သို့သော် ဒေသစံတော်ချိန် မတ်လ ၂၁ ရက်၌ ယူကရိန်းဒုတိယဝန်ကြီးချုပ် အိုင်ရင်နာဗားရက်ချပ်က မေရီယူပိုးလ်ရှိ ယူကရိန်းတပ်သားများသည် လက်နက်ချမည်မဟုတ်ကြောင်း၊ ယင်းမြို့မှလည်း ထွက်ခွာမည်မဟုတ်ကြောင်း၊ ယူကရိန်းသည် ယင်းဆုံးဖြတ်ချက်ကို ရုရှားသို့ အကြောင်းကြားခဲ့ကြောင်း ပြောကြားခဲ့သည်။

မတ်လ ၂၂ ရက်၌ ရုရှားတပ်များ ၀ိုင်းထားသော တောင်ပိုင်းဆိပ်ကမ်းမြို့ မေရီယူပိုးလ်ကို လက်နက်ချ အည့ံခံရန် ရုရှားက ရာဇသံပေးသော်လည်း ယူကရိန်းက လက်မခံဘဲ ငြင်းပယ်ခဲ့သည်။

မေရီယူပိုးလ်မြို့၌  ရုရှား၏လုပ်ဆောင်မှုများသည် အလွန်ဆိုးရွားကြောင်း ဥရောပသမဂ္ဂ နိုင်ငံခြားရေးမူဝါဒအကြီးအကဲ ဂျိုးဆက်ဘော်ရဲလ်က ပြောကြားသည်။ “အဲဒီမှာ ဘာခွဲခြားမှုမှမထားဘဲ တွေ့ရာကို ဖျက်ဆီး၊ ဗုံးကြဲ၊ တွေ့ရာလူကို သတ်ဖြတ်ပြီး ကြီးမားတဲ့ စစ်ရာဇဝတ်မှု ကျူးလွန်နေတာဖြစ်ပါတယ်” ဟု  ဘရပ်ဆဲလ်ရှိ ဥရောပသမဂ္ဂနိုင်ငံခြားရေး ဝန်ကြီးများအစည်းအဝေးတွင် မစ္စတာဘော်ရဲလ်က ပြောကြားခဲ့သည်။

■ စေ့စပ်ညှိနှိုင်းဆွေးနွေးမှုများ

ရုရှားနိုင်ငံနှင့် ငြိမ်းချမ်းရေးဆွေးနွေးပွဲအတွင်း ဦးစားပေးဆွေးနွေးမည့်အချက် ခြောက်ချက်ကို စီစဉ်ထားကြောင်း  ယူကရိန်းသမ္မတရုံး သတင်းထုတ်ပြန်ချက်ထဲတွင် ဖော်ပြခဲ့သည်။

“ဆွေးနွေးပွဲမှာ ကျွန်တော်တို့ ဦးစားပေးဆွေးနွေးမယ့်အကြောင်းက သိပ်ကို ရှင်းလင်းပါတယ်။ အဲဒါတွေကတော့  စစ်ပွဲကို ရပ်တန့်ဖို့၊ လုံခြုံရေး အာမခံချက်ရှိဖို့၊ အချုပ်အခြာအာဏာရရှိဖို့၊ နယ်မြေပိုင်နက်စိုးမိုးရေး ပြန်လည်ထူထောင်ဖို့၊ ကျွန်တော်တို့နိုင်ငံအတွက် အာမခံချက် အစစ်အမှန်ရရှိဖို့၊ ကျွန်တော်တို့နိုင်ငံအတွက် အစစ်အမှန်အကာအကွယ်ရရှိဖို့ ဆွေးနွေးသွားမှာပါ” ဟု ဇယ်လင်စကီးက မတ်  ၁၇ ရက်တွင် ပြည်သူသို့ မိန့်ခွန်းပြောကြားခဲ့ခြင်းဖြစ်သည်။

မော်စကိုနှင့် ကိယက်ဗ်အကြား စေ့စပ်ညှိနှိုင်းရေးအဖွဲ့၏ ရုရှားထိပ်တန်းခေါင်းဆောင်တစ်ဦးက ယူကရိန်းကို ကြားနေနိုင်ငံစစ်စစ် ဖြစ်တည်လာစေရန် ဆွေးနွေးချက်မှာ ‘သဘောတူညီဖွယ်အဖြစ် နီးစပ်လာနေကြောင်း’ မတ်လ ၁၈ ရက်၌ ထုတ်ဖော်ပြောဆိုခဲ့သည်။ ယူကရိန်းကို ဆွီဒင်နှင့် သြစတြီးယားကဲ့သို့သော ဘက်မလိုက်သည့် နိုင်ငံတစ်နိုင်ငံအဖြစ် ရောက်ရှိလာစေရန် ဆွေးနွေးနေကြကြောင်း၊ NATO သို့ မဝင်ရောက်ရေးကိစ္စလည်း အပါအဝင်ဖြစ်ကြောင်း၊ စကားဝိုင်း၏ အဓိကအချက်အချို့ကို ပြောပြသည်။ သို့သော်လည်း ယူကရိန်းက ဤအဆိုပြုချက်များကို ပယ်ချခဲ့ပြီး သူ့လုံခြုံရေးအတွက် နိုင်ငံတကာတပ်ဖွဲ့များ၏ အာမခံချက်ကို တောင်းဆိုလျက်ရှိသည်။

ထို့ပြင် ယူကရိန်း၏ ‘ကြားနေနိုင်ငံ စစ်စစ်ဖြစ်ရေး’နှင့်ပတ်သက်၍ နှစ်ဖက်အကြားဆွေးနွေးမှုသည် ‘တစ်ဝက်တစ်ပျက်’ ဖြစ်နေဆဲဖြစ်သည်။ ဒွန်ဘတ်စ်ဒေသကို စီမံခန့်ခွဲရေးဆိုင်ရာ အဓိကကိစ္စရပ်များတွင် နှစ်ဦးနှစ်ဖက်ရပ်တည်ချက်များ မတူညီကြပေ။

မတ်လ ၁၉ ရက်၌ ယူကရိန်းသမ္မတ ဇယ်လင်စကီးက ဗီဒီယိုခွေထုတ်ပြန်ပြီး ရုရှားနှင့် နိုင်ငံစုံပါဝင်သော ငြိမ်းချမ်းရေး ဆွေးနွေးပွဲလုပ်ရန် တောင်းဆိုလိုက်သည်။ “အခုအချိန်ဟာ ဆွေးနွေးပွဲလုပ်ရမယ့်အချိန် ဖြစ်ပါတယ်။ ယူကရိန်းရဲ့ အချုပ်အခြာနယ်မြေပိုင်ဆိုင်မှုနဲ့ တရားမျှတမှု ပြန်ရအောင်လုပ်ရမယ့်အချိန် ရောက်လာပါပြီ။ ဒီလိုမှမဟုတ်ရင် ရုရှားရဲ့ ဆုံးရှုံးမှုဟာ နောင်မျိုးဆက်ပေါင်းများစွာအထိ နာလန်ပြန်မထူနိုင်တဲ့ ဆုံးရှုံးမှုမျိုး ဖြစ်လာပါလိမ့်မယ်” ဟု ယူကရိန်းသမ္မတက ပြောကြားသည်။

မတ်လ ၂၁ ရက်တွင် ရုရှားဖက်ဒရေးရှင်း လူ့အခွင့်အရေးတာဝန်ခံ တာတီယာနာ မော်စကယ်လ်ကိုဗာက မီဒီယာများ၏ တွေ့ဆုံမေးမြန်းမှုကို ဖြေကြားရာတွင် ရုရှား-ယူကရိန်း နှစ်ဦးနှစ်ဖက် ပထမဆုံးအကြိမ် သုံ့ပန်းအဖြစ် ဖမ်းဆီးခံရသူများ လဲလှယ်ခဲ့၍ ရုရှားစစ်သား ကိုးဦးလွတ်မြောက်ခဲ့ကြောင်း၊ အလဲအလှယ်အနေဖြင့် ယူကရိန်းနိုင်ငံ ဇာပိုရိုဇိုင်းပြည်နယ်၊ မယ်လီတိုပို မြို့တော်ဝန်အား တစ်ချိန်တည်းတွင် လွှတ်ပေးခဲ့ကြောင်း အတည်ပြု ပြောကြားခဲ့သည်။

■ ရုရှား၏ အသံများ

ဥရောပကောင်စီသည် နှစ်အစိတ်ကြာအဖွဲ့ဝင်ဖြစ်ခဲ့သော ရုရှားနှင့် အဖွဲ့ဝင်နိုင်ငံများ၏အကျိုးကို သည်ပိုးမည့်အစား ‘ရုရှား ကြောက်ရောဂါ’ (Russophobic) မပေါ်ပေါ်အောင် တွန်းပို့နေကြောင်း၊ “ပြဋ္ဌာန်းချက်နဲ့အညီ အဖွဲ့ရဲ့အကျိုးကို သည်ပိုးရမယ့်အစား ဥရောပကောင်စီဟာ ဥရောပသမဂ္ဂ၊ NATO နဲ့ သူ့အပေါင်းအပါတွေရဲ့ အခိုင်းခံဘဝရောက်နေပြီ” ဟု ရုရှားနိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ မစ္စမာရီယာဇာခါရိုဗာက မတ် ၁၈ ရက်၌ ပြောကြားခဲ့သည်။

ရုရှားသမ္မတ ပူတင်က ပြင်သစ်သမ္မတ မက်ခရွန်နှင့် ဖုန်းပြောခဲ့ရာ ဒွန်ဘတ်စ်ဒေသ မြို့ကြီးများသို့ ယူကရိန်းတပ်ဖွဲ့များက ဒုံးကျည်များ၊ အမြောက်များဖြင့် ပစ်ခတ်လျက်ရှိကြောင်း၊ ငြိမ်းချမ်းစွာ ရှင်သန်နေထိုင်ကြသော အရပ်သားများကို တတ်နိုင်သမျှ ဘေးကင်းစေရန် ကြိုးပမ်းနေကြောင်း၊ အန္တရာယ်ကင်းစွာ ကယ်ထုတ်နိုင်ရေးအတွက် လူသားချင်းစာနာမှုဆိုင်ရာ ကယ်တင်ရေးစင်္ကြံများကို ဖွင့်ပေးထားကြောင်း ပြောဆိုခဲ့သည်။ ပြင်သစ်သမ္မတက ယခုရက်ပိုင်းအတွင်း အမြောက်ဆန် ပေါက်ကွဲကျရောက်မှုများ ပြင်းထန်နေသည့်အတွက် မာရီယူပိုးလ်၏အခြေအနေများကို ‘အလွန်အမင်း စိုးရိမ်ကြောင်း’ ပူတင်ကို ပြောကြားခဲ့သည်။

မတ်လ ၂၁ ရက်၌ ရုရှားနိုင်ငံ မော်စကိုမြို့ တီဗာစကွိုင် ဒေသန္တရတရားရုံးက Meta ကုမ္ပဏီအား အစွန်းရောက်အဖွဲ့အစည်းအဖြစ် ဆုံးဖြတ်သတ်မှတ်ခဲ့သည်။ တရားရုံးက Facebook၊ Instagram တို့နှင့် သက်ဆိုင်သော တားဆီးမိန့်များကို ချက်ချင်းဖော်ဆောင်သင့်ကြောင်း ကြေညာခဲ့သည်။

မတ်လ ၁၁ ရက်နေ့က ရုရှားဖယ်ဒရေးရှင်းစုံစမ်းစစ်ဆေးရေးကော်မတီက Facebook ၏ ပင်မကုမ္ပဏီဖြစ်သော Meta သည် ရုရှားလူမျိုးများအပေါ် အကြမ်းဖက်မှုဖော်ဆောင်ရေး တိုက်တွန်းလှုံ့ဆော်ချက်များကို ခွင့်ပြုခြင်းအတွက် ရာဇဝတ်မှုဆိုင်ရာ အမှုဖွင့်ခဲ့ခြင်းဖြစ်သည်။

Meta သည် ရုရှားစစ်တပ်အပေါ် ရက်စက်ကြမ်းကြုတ်သော စကားလုံးများနှင့် ပို့စ်တင်ခွင့်ပြုခြင်းဖြင့် ၎င်းတို့၏ ကိုယ်ပိုင်စည်းမျဉ်းများအား ချိုးဖောက်ခဲ့ကြောင်း၊ ရုရှားနိုင်ငံ၏ အထူးစစ်ဆင်ရေးနှင့်ပတ်သက်၍ သတင်းအချက်အလက် အတုအယောင်များအား ဖယ်ရှားပေးရန် တောင်းဆိုချက် ၄၅၀၀ ကျော်ကို လျစ်လျူရှုခဲ့ပြီး ခွင့်ပြုချက်မရှိသော သွေးထိုးလှုံ့ဆော်မှုများပြုခဲ့ကြောင်း အစိုးရရှေ့နေများက ပြောကြားခဲ့သည်။

ယူကရိန်းတွင် ရုရှား၏အထူးစစ်ဆင်ရေး လှုပ်ရှားမှုများကို ယခင်အစီအစဉ်အတိုင်း ဆက်လက်လုပ်ဆောင်နေကြာင်း ရုရှားသမ္မတ၏ ပြန်ကြားရေးအကြီးအကဲ ဒီမီထရီပက်စ်ကော့ဗ်က မတ်လ ၂၂ ရက်တွင် ပြောကြားခဲ့သည်။ “အထူးစစ်ဆင်ရေးဟာ ရက်အနည်းငယ်သာ အချိန်လိုအပ်မယ်လို့ အရင်ကတည်းက ဘယ်သူကမှ မယူဆခဲ့ပါဘူး။ ဒါဟာလေးနက်တဲ့ လှုပ်ရှားမှုတစ်ရပ်ဖြစ်ပြီး လေးနက်တဲ့ရည်မှန်းချက်ရှိပါတယ်။ ရုရှားရဲ့စစ်ဆင်ရေးဟာ ယူကရိန်းကို သိမ်းပိုက်ဖို့ မဟုတ်ပါဘူး” ဟု CNN နှင့် တွေ့ဆုံမေးမြန်းစဉ် ပြောကြားခဲ့သည်။

အမေရိကန်နိုင်ငံရှိ ကုလသမဂ္ဂဌာနချုပ်၌ တာဝန်ထမ်းဆောင်နေသော ရုရှားသံတမန်များအား အမေရိကန်က နှင်ထုတ်ခဲ့ခြင်းကို လက်တုံ့ပြန်သည့်အနေဖြင့် ရုရှားရှိ အမေရိကန်သံတမန်များအား နှင်ထုတ်ကြောင်း ရုရှားနိုင်ငံက မတ်လ ၂၃ ရက်တွင် ပြောကြားခဲ့သည်။

မော်စကိုရှိ အမေရိကန် အဆင့်မြင့်သံတမန်အား မတ် ၂၃ ရက်က ဆင့်ခေါ်ခဲ့ကြောင်းနှင့် အမေရိကန်သံတမန်များအား ‘မကြိုဆို ထိုက်သူ’ စာရင်းတွင် ထည့်သွင်းကြေညာခဲ့ကြောင်း ရုရှားနိုင်ငံခြားရေးဝန်ကြီးဌာန ထုတ်ပြန်ချက်၌ ဖော်ပြခဲ့သည်။

အမေရိကန်နိုင်ငံအနေနှင့် ရုရှားနိုင်ငံအပေါ် ရန်လိုသော မည်သည့်အပြုအမူမျိုးကိုမဆို ပြုလုပ်ပါက တိကျပြတ်သားပြီး ပြည့်ဝသောတုံ့ပြန်မှုလုပ်ဆောင်သွားမည်ဟု ပြောကြားထားပြီးဖြစ်ကြောင်း ထုတ်ပြန်ချက်က ဆိုသည်။

■ နိုင်ငံတကာ တုံ့ပြန်ချက်များ

မတ်လ ၁၉ ရက်၊ အန်ဝှေးပြည်နယ် တန်ဇီ၌ကျင်းပသော သတင်းစာရှင်းပွဲတွင် တရုတ်နိုင်ငံတော်ကောင်စီဝင် နိုင်ငံခြားရေးဝန်ကြီး ဝမ်ယိက “သမ္မတရှီကျင့်ဖျင်၏ ယူကရိန်းအရေးအပေါ်  တရုတ်ရပ်တည်ချက်ကို ရှင်းလင်းစုံလင်စွာ ပြောကြားခဲ့ရာ တရုတ်နိုင်ငံသည် ကမ္ဘာ့ငြိမ်းချမ်းရေးကို အစဉ်အမြဲ ထိန်းသိမ်းသော အင်အားဖြစ်ကြောင်း၊ တရုတ်နိုင်ငံသည် ငြိမ်းချမ်းရေးထိန်းသိမ်းမှု၊ စစ်ရေးဆန့်ကျင်မှုတို့ကို အမြဲတမ်းအဆိုပြု ကြောင်း၊  ယင်းမှာ တရုတ်နိုင်ငံ၏ သမိုင်းယဉ်ကျေးမှု အစဉ်အလာဖြစ်သလို တရုတ်နိုင်ငံ၏ တစ်သမတ်တည်းသော  နိုင်ငံခြားရေးမူဝါဒဖြစ်ကြောင်း၊ တရုတ်နိုင်ငံသည် အစဉ်အမြဲ မှန်ကန်မျှတမှုကို အခြေခံပြီး ကိစ္စတစ်ရပ်၏ အမှားအမှန် ဖြစ်ပျက်ပုံအရ သီးခြားလွတ်လပ်စွာ မိမိဘာသာဆုံးဖြတ်သွားမည်ဖြစ်ကြောင်းနှင့် မည့်သည့်ပြင်ပခြိမ်းခြောက်မှု၊ ဖိအားများကိုမှ လက်ခံမည်မဟုတ်သလို တရုတ်နိုင်ငံအပေါ် အခြေအမြစ်မရှိ စွပ်စွဲမှုနှင့် သံသယများကိုလည်း လက်ခံမည်မဟုတ်ကြောင်း” ပြောကြားခဲ့သည်။

ဘောလ်တစ်နိုင်ငံများဖြစ်သော လတ်ဗီးယား၊ အက်စတိုနီးယားနှင့် လစ်သူယေးနီးယားတို့က ယင်းတို့၏နိုင်ငံအတွင်းရှိ ရုရှားသံတမန် ၁၀ ဦးကို နှင်ထုတ်ခဲ့သည်။ လစ်သူယေးနီးယားမှ လေးဦး၊ လတ်ဗီးယားနှင့် အက်စတိုနီးယားမှ သုံးဦးစီ ပါဝင်သည်။ အဆိုပါသံတမန်များသည် ရုရှားက ယူကရိန်းကို ကျူးကျော်သည့်ကိစ္စနှင့် ပတ်သက်၍ “သူတို့၏ သံတမန်ကျင့်ဝတ်နှင့် မလျော်ညီသော ဆက်သွယ်ဆောင်ရွက်မှုများကို ပြုခဲ့ကြောင်း” လတ်ဗီးယားနိုင်ငံခြားရေးဝန်ကြီး အက်ဂါရင့်ကီဗစ်က တွစ်တာ၌ ရေးတင်ခဲ့၏။

ဘူလ်ဂေးရီးယားက ‘သံတမန်အဆင့်အတန်းနှင့် မလျော်ညီသော ဆောင်ရွက်ချက်များကို ပြုခဲ့ကြောင်း’စွပ်စွဲပြီးနောက် ရုရှားသံတမန် ၁၀ ဦးကို နှင်ထုတ်ရန် ဆုံးဖြတ်ခဲ့သည်။ ဘူလ်ဂေးရီးယားနိုင်ငံဆိုင်ရာ ရုရှားသံအမတ်ကြီးက “ဒီကိစ္စဟာ အတော့်ကို မိတ်ဆွေမပီသတဲ့ ဆက်ဆံမှုမျိုး ကျွန်တော်တို့ ခံရတာပါ။ အလားတူ တုံ့ပြန်ပုံမျိုးလုပ်ဖို့ ကျွန်တော်တို့မှာ အခွင့်အရေးရှိတယ်” ဟု TASS သတင်းဌာနသို့ ပြောကြားခဲ့သည်။

ပိုလန်အနေနှင့် ‘ရုရှားအပေါ် မှီခိုရခြင်းကင်းသော’ စီးပွားရေးပုံစံမျိုးကို အကောင်အထည်ဖော်ရမည်ဖြစ်ကြောင်း၊ ဓာတ်ငွေ့ပိုက်လိုင်းအသစ်များ တည်ဆောက်ရေး၊ အစားအစာစျေးနှုန်းများ လျော့ကျနိုင်ရေးအတွက် ရုရှား၏ မြင့်မားသော ဓာတ်မြေသြဇာစျေးနှုန်းအပေါ် ဆက်လက်မှီခိုမှုမပြုရေးတို့အတွက် ဆောင်ရွက်သွားရန် ပိုလန်ဝန်ကြီးချုပ် မက်တီးယပ်စ်မိုရာဝစ်ကီက ပြောဆိုခဲ့သည်။

မြောက်အတ္တလန္တိတ်စာချုပ်ဝင်နိုင်ငံများအဖွဲ့ (NATO) က အရှေ့ဘက်ပိုင်း မဟာမိတ်အဖွဲ့ဝင်နိုင်ငံများဖြစ်သော ဘူလ်ဂေးရီးယား၊ ဟန်ဂေရီ၊ ရိုမေးနီးယားနှင့် ဆလိုဗက်ကီးယား စသည့်နိုင်ငံများတွင် စစ်မျက်နှာလေးခုကို တပ်ဖြန့်ချထားရန် အတည်ပြုခဲ့ကြောင်း NATO အဖွဲ့ အထွေထွေအတွင်းရေးမှူးချုပ် ယန်းစတော့တန်ဘာ့ဂ်က မတ်လ ၂၄ ရက် သတင်းစာရှင်းလင်းပွဲတွင် ကြေညာခဲ့သည်။ လက်ရှိတွင် မဟာမိတ်အဖွဲ့၏ အရှေ့ဘက်ခြမ်းတစ်လျှောက် ဘောလ်တစ်ပင်လယ်မှ ပင်လယ်နက်အထိ NATO အဖွဲ့၏ စစ်မျက်နှာတပ်ဖြန့်ချထားမှုမှာ စုစုပေါင်းရှစ်နေရာရှိပြီဖြစ်သည်။

■ စစ်ပွဲသတင်း စတုတ္ထပတ် မှတ်ချက်

စစ်ပွဲ၏ အရှိန်အဟုန်ကို ကြည့်ရသည်မှာ ယခင်သီတင်းပတ်များလောက် အရှိန်မမြင့်တော့ဘဲ ရုရှားတပ်များ ၀ိုင်းပတ်ပိတ်ဆို့လျက်ရှိသော ယူကရိန်းမြို့ကြီးများမှာမူ အခြေအနေ ဆိုးရွားနေဆဲဖြစ်သည်။ တစ်ဖန်စေ့စပ်ဆွေးနွေးညှိနှိုင်းရေးအတွက် တိုက်တွန်းချက်များ ရှိနေသကဲ့သို့ ယူကရိန်းအပေါ် စစ်လက်နက်ပ့ံပိုးမှုများမှာလည်း အရှိန်မြင့်ဆဲဖြစ်သည်။ လက်နက်ကိုင်သူချင်း ထိပ်တိုက်ရင်ဆိုင်မှုကို အသာထားလျက် စစ်ဒဏ်ခံစားရသူပြည်သူများ၏ အခြေအနေမှာမူ စားရေရိက္ခာပြတ်လပ်ခြင်း၊ အိုးအိမ်စွန့်ခွာ ထွက်ပြေးရခြင်းနှင့် ဒဏ်ရာရသေဆုံးမှုများကို နဖူးတွေ့ဒူးတွေ့ခံစားနေကြရသည်။

မကြာသောစစ်နှင့် လျင်မြန်သော ဆွေးနွေးညှိနှိုင်း သဘောတူညီချက်မျိုး အမြန်ရရှိပါစေကြောင်း ဆန္ဒပြုလိုက်ပါသည်။