ရန်ကုန်ပြည်သူ့ဆေးရုံကြီး အထူးကုပြင်ပလူနာဌာနသို့ လာရောက်ပြသမှုကို ဖေဖော်ဝါရီ၁ရက်မှစ၍ Online Booking စနစ်ဖြင့် စမ်းသပ်ဆောင်ရွက်မည်ဖြစ်ကြောင်း ဇန်နဝါရီ ၁၉ ရက်တွင် ရန်ကုန်ပြည်သူ့ဆေးရုံကြီးက ထုတ်ပြန်ခဲ့သည်။
အဆိုပါထုတ်ပြန်ချက်တွင် ရန်ကုန်ပြည်သူ့ဆေးရုံကြီး အထူးကုပြင်ပလူနာဌာနတွင် လူနာများ နံနက်စောစော လာရောက်တန်းစီ၍ စာရင်းသွင်းရန်စောင့်ဆိုင်းရခြင်း ၊ ပြသရန်အချိန်ကြာမြင့်စွာ စောင့်ဆိုင်းရခြင်းကြောင့်လည်းကောင်း ၊ လူစုလူဝေးကြောင့် ကိုဗစ် ၁၉ ရောဂါကူးစက်မှုမှ ကာကွယ်ရန်အတွက်လည်းကောင်း ဖေဖော်ဝါရီ ၁ ရက်မှစတင်၍ Online Booking စနစ် စတင် စမ်းသပ်သုံးစွဲသွားမည်ဖြစ်ကြောင်း သိရသည်။
အထူးကုပြင်ပလူနာဌာနများ၏အချိန် စာရင်းမှာ တနင်္လာနေ့မှ သောကြာနေ့ အထိ မနက် ၉နာရီမှ ၁၂ နာရီတစ်ချိန်နှင့် မွန်းလွဲ ၁နာရီမှ ၃ နာရီအထိတစ်ချိန် ပြသနိုင်ကြောင်း သိရသည်။
အဆိုပါ Online Booking စနစ်နှင့်ပတ်သက်ပြီး Viber(သို့မဟုတ်) Messager(သို့မဟုတ်) caremebot application မှတဆင့် Booking ပြုလုပ်ရမည်ဖြစ်ပြီး Booking ပြုလုပ်ရမည့်နည်းများကို Yangon General Hospital ဖေ့ဘွတ်ခ်စာမျက်နှာတွွင် ဓာတ်ပုံများဖြင့် အသေးစိတ်ဖော်ပြထုတ်ပြန်ထားသည်။