ကယားပြည်နယ် လွိုင်ကော်မြို့ လောဓမ္မရပ်ကွက် အုပ်ချုပ်ရေးမှုးရုံးတွင် ဖွင့်ထားသောမဲရုံ၌ ရပ်ကျေးကော်မရှင်အဖွဲ့ဝင်အချို့၏ ဆောင်ရွက်မှုများသည် အငြင်းပွားဖွယ်ဖြစ်သည်ဟုဆိုကာ ကယားပြည်နယ်ဒီမိုကရက်တစ်ပါတီ(KySDP)က တိုင်ကြားသဖြင့် နိုဝင်ဘာ ၂ ရက်တွင် မြို့နယ်ရွေးကောက်ပွဲကော်မရှင်အဖွဲ့ဥက္ကဋ္ဌက မဲရုံသို့ လာရောက်ကြည့်ရှုပြီး ကော်မရှင်အဖွဲ့ဝင်များအနေဖြင့် ဘိုးဘွားများကို ကူညီခြင်းသာဆောင်ရွက်ရန် ညွှန်ကြားခဲ့ကြောင်းသိရသည်။
အဆိုပါရပ်ကွက်ရှိ ရပ်ကျေးကော်မရှင်အဖွဲ့ဝင်အချို့သည် ကြိုတင်မဲထည့်ရန် တံဆိပ်တုံးထုသည်လျှို့ဝှက်နေရာအနီးတွင်နေခြင်း၊ တံဆိပ်တုံးထုပြီးပါက စာအိတ်များအတွင်း ကူညီထည့်ပေးခြင်း၊ ကော်ကပ်ပေးခြင်း၊ မဲပုံးများအတွင်း ကူညီထည့်ပေးခြင်းများ လုပ်ဆောင်သောကြောင့် မြို့နယ်ရွေးကောက်ပွဲကော်မရှင်က လာရောက်သတိပေးခဲ့ခြင်းဖြစ်ကြောင်းသိရသည် ။
ထိုသို့ ရပ်ကျေးကော်မရှင်အဖွဲ့ဝင်အချို့၏ ဆောင်ရွက်မှုနှင့်ပတ်သက်၍ လာရောက်စစ်ဆေးခဲ့သည့် မြို့နယ်ရွေးကောက်ပွဲကော်မရှင်ဥက္ကဋ္ဌ ဦးလှသန်းက “ကော်မရှင်အဖွဲ့တွေက သူတို့နားလည်ပြီးသား။ သူတို့သင်တန်းပေးပြီးသား ။ ၂၉ ကနေ ၅ ရက်နေ့ထိ ရွေးကောက်ပွဲကော်မရှင်က ကြီးကြပ်လုပ်ပေးတာနော်။ ကော်မရှင်ရုံးမှာလုပ်ပေးနေတာ။ ၆၊ ၇၊ ၈ ရက်ကျရက်မဲရုံတွေမှာလုပ်မယ်။ အလားတူပဲ။(မဲလက်မှတ်ကိုကူပြီးခေါက်ကာ စာအိတ်ထဲထည့်ပေးသည့်ကိစ္စ) သူတို့ကအမှားတွေရှိနေလို့ တချို့တွေက နားမလည်လို့စစ်ရမယ်လေ။ နောက်မှာမဲရိုက်ပြီးပြီလား။ တံဆိပ်တုံးပါလား မပါလား။ဒါတွေအကုန်လုံးက ကျွန်တော်တို့ကပြောပြရမှာပေါ့နော် ။ ပယ်မဲမဖြစ်အောင်အဓိကလေ။ အဲဒါလေးကိုသူ(ကော်မရှင်အဖွဲ့ဝင်)ပြောပြတာဖြစ်မှာပါ။ သူ့ကိုလည်းကျွန်တော်ပြောပြ ထားပါတယ်။ လုပ်လို့မရပါဘူး။(မဲပေးသူနားတွင်ကပ်နေသည့်ကိစ္စ)ဒါတော့သူက ဆွေမျိုးသားချင်း၊ တကယ့်နားမလည်တဲ့ တုံတုံချိချိဖြစ်နေတဲ့ အဘိုးကြီး၊ အဘွားကြီးတွေ ပုဂ္ဂိုလ်တွေဆိုရင်သူက ကူညီပြီး မဲစာရွက်ကိုခေါက်ပေးလို့ရပါတယ်။ (အခြားသူများနားတွင်ပါ ကပ်နေခြင်း) လုပ်လို့မရပါဘူး။ ကျွန်တော်တို့ညွှန်ကြားထားပြီးပါပြီ '' ဟု ပြောကြားသည် ။
လောဓမ္မရပ်ကွက်မဲရုံသည် လူစည်ကားရာတောင်စျေးအနီးတွင်တည်ရှိပြီး မဲရုံစောင့်ကြည့်လေ့လာရေးအတွက် ဒေသခံပါတီဖြစ်သည့် KySDP ပါတီအပါအဝင် ပြည်ခိုင်ဖြိုးပါတီ၊ NLD ပါတီတို့မှ မဲရုံစောင့်ကြည့်သူများ နေ့စဉ် စောင့်ကြည့်မှုများပြုလုပ်နေခြင်းဖြစ်သည်။
''မနေ့က ကျွန်မတို့ရုံးကကောင်လေးတစ်ယောက် စောင့်ပေးတယ် ။ သူ့နာမည် စိုင်းနော်ဂျာလို့ခေါ်တယ် ။ မနေ့က နေ့လည်ခင်းမှာ ဘာထူးခြားမှုရှိလဲမေးတဲ့ချိန်မှာ သူကသက်ကြီးရွယ်အိုတွေကို ခုတုံးလုပ်ပြီးတော့ မဲတွေကိုသူတို့ထည့်ခိုင်းတာထည့်တယ် ။ သူတို့ရိုက်ခိုင်းတာထည့် တယ်လို့ကျွန်မကြားရတယ် ။ သူတို့ဆိုတာက ဒီကော်မရှင်ရုံးကလူ။ သူ့နာမည်ကိုကျွန်မမေးတယ် မပြောဘူး ။ မတရားမှုတွေ များလာမယ်ဆိုပြီး ကျွန်မစောင့်တယ်။ ဒီမနက် ကျွန်မလာစောင့်တော့ သူမနေ့က လုပ်သလိုကျွန်မတွေ့ရတယ်။ မဲပေးတဲ့လူနောက်ကို ကော်မရှင်ကလိုက်တယ် ။ နီးနီးကပ်ကပ်နေတယ် ပြောတယ်။ ပွင့်လင်းမြင်သာမှုမရှိပြောတယ် ။ ကျွန်မဒီမနက်တော်တော်ခံနိုင်ရည်ရှိအောင် ကျွန်မ သည်းခံပြီးနေခဲ့တယ်။ ဘာမှဝင်မပြောခဲ့ဘူး ။ ၉ နာရီကျော်လာတဲ့ခါကျတော့ ကျွန်မသီးခံလို့မရတော့ဘူး ပြောချင်နေပြီးမရတော့ဘူး။ ဝင်ပြောဖို့သွားတယ်။ သွားတော့ခွင့်တောင်းတယ်။ သူတို့ကို ဒီအထဲ ဝင်ခွင့်ပြုပါခွင့်ပေးလို့ဝင်သွားတယ်။ အစ်ကိုရေမဲပေးတဲ့သူနဲ့ နီးနီးကပ်ကပ်မနေသင့်ဘူး။ ကျွန်မပြောတယ် ။ သူက ငါကော်မရှင်ရုံးက နင်ဘာနားလည်လို့လည်း မှားရင်နင်တာဝန်ယူမလားပြောတယ်။ သူ ကျွန်မကို ရန်တွေ့တယ် ။ မှန်ကန်တဲ့နည်းလမ်းမကျလို့ကျွန်မဝင်ပြောတာ ။ ကော်မရှင်ကဆိုလည်း မှန်မှန်ကန်ကန် လုပ်ပေး။ မဲပေးတဲ့သူနဲ့ နီးနီးကပ်ကပ်နေစရာ အကြောင်းကိုမရှိတာ ။ တော်တော်နီးကပ်ကပ်နေတယ်။ မဲစာရင်းစာအိတ်ပုံးထဲထည့်တာတောင် သူကကိုင်တယ် ။ နင်အထဲဝင်ပိုင်ခွင့်မရှိဘူ။ ရန်တွေ့တယ် ။ တခြားပါတီတွေဝင်တယ်။ ခွင့်မတောင်းဘူး ။ ကျွန်မခွင့်တောင်းပြီး ဝင်တယ်။ သူလက်မခံဘူး။ လုံးဝတရားနည်းလမ်း မကျဘူး။ ကျွန်မပြောချင်တာ '' ဟု KySDP ပါတီမှစောင့်ကြည့်လေ့လာသူ မသွယ်သွယ်စန်းက သတင်းထောက်များကို ပြောကြားသည် ။
လောဓမ္မရပ်ကွက်သည် ပြည်မမှ ပြောင်းရွေ့အခြေချသူများ အများဆုံးနေထိုင်ရာ ရပ်ကွက်ဖြစ်ပြီး ယခင်က ပြည်ခိုင်ဖြိုးပါတီနှင့် NLD ပါတီဝင်အများဆုံးရှိသည့် ရပ်ကွက်ဖြစ်ကြောင်း၊ လွိုင်ကော်မြို့နယ်သည် မဲရုံ ၈၁ ရုံရှိပြီး လူဦးရေ တစ်သိန်းကျော်ခန့်နေထိုင်ကာ ဆန္ဒမဲပေးပိုင်ခွင့်ရှိသူ ၁၀၀၃၇၂ ဦး ရှိကြောင်းလည်း သိရသည်။
