(၁၁)ကြိမ်မြောက် ကမ္ဘောဒီးယား-လာအို- မြန်မာ- ဗီယက်နမ် ပူးပေါင်းဆောင်ရွက်မှု (CLMV)ထိပ်သီးအစည်းအဝေးသို့ နစက ဥက္ကဋ္ဌ တက်ရောက်ခဲ့ပြီး မြန်မာနိုင်ငံအနေဖြင့် စိုက်ပျိုးရေး၊ စက်မှုနှင့် စွမ်းအင်ကဏ္ဍ ပူးပေါင်းဆောင်ရွက်ရေးဆိုင်ရာ ဦးဆောင်နိုင်ငံအဖြစ် ဆောင်ရွက်လျက်ရှိကြောင်း သိရသည်။
(၁၁)ကြိမ်မြောက် ကမ္ဘောဒီးယား-လာအို-မြန်မာ-ဗီယက်နမ် ပူးပေါင်းဆောင်ရွက်မှု (စီအယ်လ်အမ်ဗွီ) ထိပ်သီးအစည်းအဝေး(11th Cambodia - Lao PDR - Myanmar - Viet Nam (CLMV) Summit )ကို ယနေ့(နိုဝင်ဘာ ၇ ရက်) မွန်းလွဲပိုင်းတွင် တရုတ်နိုင်ငံ၊ ကူမင်းမြို့ရှိ Wyndham Grand Hotel ၌ ကျင်းပရာ ထိပ်သီးအစည်းအဝေး ဥက္ကဋ္ဌ နစက ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် တက်ရောက်အမှာစကားပြောကြားခဲ့ကြောင်း သိရသည်။
အစည်းအဝေးသို့ အဖွဲ့ဝင်နိုင်ငံများမှ ဝန်ကြီးချုပ်များဖြစ်ကြသည့် ကမ္ဘောဒီယား နိုင်ငံဝန်ကြီးချုပ် H.E. Mr. Hun Manet၊ လာအိုနိုင်ငံဝန်ကြီးချုပ် H.E. Mr. Sonexay Siphandone ၊ ဗီယက်နမ်နိုင်ငံဝန်ကြီးချုပ် H.E. Mr. Pham Minh Chich ၊ အာဆီယံ အတွင်းရေးမှူးချုပ် H.E.Dr. KAO KIM HOURN ၊ အဖွဲ့ဝင်နိုင်ငံများမှ ဝန်ကြီးများ၊ ဒုတိယဝန်ကြီးများနှင့် အဆင့်မြင့်အရာရှိကြီးများ၊ တာဝန်ရှိသူများတက်ရောက်ကြကြောင်း သိရသည်။
ဦးစွာ (၁၁) ကြိမ်မြောက် ကမ္ဘောဒီးယား-လာအို- မြန်မာ- ဗီယက်နမ် ပူးပေါင်း ဆောင်ရွက်မှု(စီအယ်လ်အမ်ဗွီ) ထိပ်သီးအစည်းအဝေး ဥက္ကဋ္ဌ နစက ဥက္ကဋ္ဌ သည် ထိပ်သီးအစည်းအဝေးသို့တက်ရောက်ရန် ရောက်ရှိလာကြသည့် အဖွဲ့ဝင်နိုင်ငံများမှ ဝန်ကြီးချုပ်များနှင့်အဖွဲ့ဝင်များကို ကြိုဆိုနှုတ်ဆက်ခဲ့ကြောင်း သိရသည်။
ထို့နောက် (၁၁) ကြိမ်မြောက် ကမ္ဘောဒီးယား-လာအို- မြန်မာ- ဗီယက်နမ် ပူးပေါင်းဆောင်ရွက်မှု (စီအယ်လ်အမ်ဗွီ) ထိပ်သီးအစည်းအဝေးဥက္ကဋ္ဌ နစက ဥက္ကဋ္ဌ က အဖွင့်အမှာစကား ပြောကြား ရာတွင် မြန်မာနိုင်ငံအနေဖြင့် (၄)နှစ်တာကာလအတွင်း ထိပ်သီးအစည်းအဝေးကို အလှည့်ကျဥက္ကဋ္ဌအနေဖြင့် ဦးဆောင်ကျင်းပခွင့်ရသည့်အတွက် ဝမ်းသာရပါကြောင်း၊ များပြားလှသည့် အစည်းအဝေးအချိန်ဇယားများမှ ယခုထိပ်သီး အစည်းအဝေးကို ပါဝင်တက်ရောက်ကြသည့် စီအယ်လ်အမ်ဗွီအဖွဲ့ဝင်နိုင်ငံများ၏ ကိုယ်စားလှယ်အဖွဲ့ များကိုလည်း ကျေးဇူးတင်ရှိကြောင်း၊ ယခု ထိပ်သီးအစည်းအဝေးကို တရုတ်နိုင်ငံ၊ ကူမင်းမြို့တွင် ကျင်းပခွင့်ရအောင် လိုအပ်သည့် ကူညီထောက်ပံ့မှုများပေးသည့် တရုတ်ပြည်သူ့သမ္မတနိုင်ငံကိုလည်း ကျေးဇူးတင်ရှိပါကြောင်း ပြောကြားသည်။
နစက ဥက္ကဋ္ဌက မိမိအနေဖြင့် စီအယ်လ်အမ်ဗွီ အဆင့်မြင့်အရာရှိကြီးများနှင့် စီအယ်လ်အမ်ဗွီ ပူးပေါင်းဆောင်ရွက်မှုအောက်မှ သက်ဆိုင်ရာ ဦးဆောင်နိုင်ငံအလိုက် ဖွဲ့စည်းထားသည့် လုပ်ငန်းအဖွဲ့များ၏ (၁၁) ကြိမ်မြောက် စီအယ်လ်အမ်ဗွီ ထိပ်သီးအစည်းအဝေး ပူးတွဲ ကြေညာချက်(မူကြမ်း)ကို အပြီးသတ်ရေးဆွဲနိုင်အောင် အားသွန်ခွန်စိုက် ဆောင်ရွက်ခဲ့မှုများကိုလည်း ချီးကျူးဂုဏ်ပြုလိုကြောင်း၊ တိုင်ဖုန်းရာဂီ၏ ဆက်စပ်အကျိုးဆက်များဖြစ်သည့် ရေကြီး၊ မြေပြိုမှုများကြောင့် စီအယ်လ်အမ်ဗွီအဖွဲ့ဝင်နိုင်ငံများတွင်ရှိသည့် ပြည်သူများ၏ အသက်အိုးအိမ်၊ စည်းစိမ်များ ပျက်စီးဆုံးရှုံးမှုများ အပေါ်များစွာဝမ်းနည်းရပါကြောင်း၊ ၂၀၂၄ ခုနှစ်သည် စီအယ်လ်အမ်ဗွီ ပူးပေါင်းဆောင်ရွက်မှု၏ နှစ် (၂၀) ပြည့်သည့် အချိန်အခါနှင့်လည်း တိုက်ဆိုင်နေကြောင်း၊ ခရီးလမ်းတစ်လျှောက်၌ မိမိတို့ စီအယ်လ်အမ်ဗွီ ပူးပေါင်းဆောင်ရွက်မှု၏ အဓိကနယ်ပယ် (၈) ခုတွင် များပြားထူးခြား သည့် အောင်မြင်မှုများကို ရရှိခဲ့ကြောင်း၊ ထို့ပြင် ၂၀၃၀ ပြည့်နှစ်တွင် စီအယ်လ်အမ်ဗွီ နိုင်ငံများကို စဉ်ဆက်မပြတ် စီးပွားရေးလုပ်ငန်းများနှင့် အလယ်အလတ်အဆင့် အထက်ဝင်ငွေရှိသော နိုင်ငံများဖြစ်လာရန် ရည်ရွယ်သည့် စီအယ်လ်အမ်ဗွီ ဖွံ့ဖြိုးတိုး တက်မှု မူဘောင်ကိုလည်းချမှတ်နိုင်ခဲ့ကြောင်း ပြောကြားသည်။
စီအယ်လ်အမ်ဗွီ အဖွဲ့ဝင်နိုင်ငံများအကြား ချစ်ကြည်ရင်းနှီးမှု၊ စည်းလုံးညီညွတ် မှုနှင့် အပြန်အလှန်နားလည်မှုများသည် မိမိတို့၏ ပူးပေါင်းဆောင်ရွက်မှုတွင် အောင် မြင်မှု အသီးအပွင့်များကို ပွင့်လန်းလာစေခြင်းပင် ဖြစ်ကြောင်း၊ လက်ရှိဖြစ်ပေါ်နေ သည့် ကမ္ဘာ့နိုင်ငံရေးရှုပ်ထွေးမှု၊ နိုင်ငံတကာပဋိပက္ခ၊ စီးပွားရေးကျဆင်းမှု၊ စားနပ် ရိက္ခာနှင့် စွမ်းအင်မလုံလောက်မှု စသည့်များကြားတွင် မိမိတို့သည် ကြံ့ကြံ့ခံနိုင်စွမ်း ရှိရန် မဖြစ်မနေ လိုအပ်ကြောင်း၊ ယနေ့ မိမိတို့တွေ့ဆုံဆွေးနွေးမှုသည် စီအယ်လ် အမ်ဗွီ ပူးပေါင်းဆောင်ရွက်မှု၏ တိုးတက်မှုကို ပြန်လည်လေ့လာ ဆန်းစစ်ခွင့်ရရှိသည့်အပြင် “ချစ်ကြည်ရင်းနှီးမှုနှင့် စည်းလုံးညီညွတ်မှုမှသည် ကြံ့ကြံခံနိုင်၍ သာယာဝ ပြောသော အသိုက်အဝန်းဆီသို့” ခေါင်းစဉ်အောက်တွင် စီအယ်လ်အမ်ဗွီမူဘောင်ကို ပိုမိုထိရောက်စွာ အကောင်အထည်ဖော်နိုင်ရန် ဆွေးနွေးခွင့်ရရှိခြင်းလည်း ဖြစ်ကြောင်းဖြင့် ပြောကြားသည်။
ယင်းနောက် ကမ္ဘောဒီယားနိုင်ငံဝန်ကြီးချုပ်၊ လာအိုနိုင်ငံဝန်ကြီးချုပ်၊ ဗီယက်နမ် နိုင်ငံဝန်ကြီးချုပ်နှင့် အာဆီယံ အထွေထွေ အတွင်းရေးမှူးချုပ်တို့က “ချစ်ကြည်ရင်းနှီး မှုနှင့် စည်းလုံးညီညွတ်မှုမှသည် ကြံ့ကြံ့ခံနိုင်၍ သာယာဝပြောသော အသိုက်အဝန်းဆီ သို့” ခေါင်းစဉ်ဖြင့် စီအယ်လ်အမ်ဗွီ ပူးပေါင်းဆောင်ရွက်မှု၏ အနာဂတ်ဦးတည်ချက် အပေါ် အမြင်ချင်းဖလှယ်ခြင်းနှင့်ဖြစ်ပေါ်တိုးတက်မှုများကို သုံးသပ်ဆွေးနွေးကြကြောင်း သိရသည်။
ထို့နောက် (၁၁) ကြိမ်မြောက် ကမ္ဘောဒီးယား-လာအို-မြန်မာ-ဗီယက်နမ် ပူးပေါင်းဆောင်ရွက်မှု (စီအယ်လ်အမ်ဗွီ) ထိပ်သီးအစည်းအဝေးဥက္ကဋ္ဌ နစက ဥက္ကဋ္ဌ က တရုတ်နိုင်ငံ၊ ကူမင်းမြို့တွင် ကျင်းပပြုလုပ်သည့် (၁၁) ကြိမ်မြောက် စီအယ်လ်အမ်ဗွီ ထိပ်သီးအစည်းအဝေးကို အလှည့်ကျဥက္ကဋ္ဌအနေဖြင့် ဆောင်ရွက်ခွင့်ရသည့်အတွက် များစွာ ဂုဏ်ယူဝမ်းမြောက်မိကြောင်း၊ ၂၀၀၃ ခုနှစ်၊ မြန်မာနိုင်ငံ၊ ပုဂံမြို့တွင် ကျင်းပခဲ့သည့် ပထမအကြိမ် အက်ခ်မက်ထိပ်သီးအစည်းအဝေးတွင် စတင်သန္ဓေတည်ခဲ့ သည့် စီအယ်လ်အမ်ဗွီ ပူးပေါင်းဆောင်ရွက်မှုယန္တရားကို မိမိတို့အနေဖြင့် ပြန်လည် အမှတ်ရမိကြောင်း၊ ယင်းအချိန်မှစ၍ အဖွဲ့ဝင်နိုင်ငံများသည် ဒေသတွင်းငြိမ်းချမ်းရေး၊ သာယာဝပြောရေးနှင့် ပေါင်းစည်းထားသည့် အသိုက်အဝန်းတစ်ခု ဖန်တီးရန်အတွက် အားသွန်ခွန်စိုက် အတူတကွ ကြိုးစားခဲ့ကြကြောင်း၊ မြန်မာနိုင်ငံအနေဖြင့် စိုက်ပျိုးရေး၊ စက်မှုနှင့်စွမ်းအင်ကဏ္ဍ ပူးပေါင်းဆောင်ရွက် ရေးဆိုင်ရာ ဦးဆောင်နိုင်ငံအဖြစ် ဆောင်ရွက်လျက်ရှိကြောင်း၊ စီအယ်လ်အမ်ဗွီအဖွဲ့ဝင် နိုင်ငံများ၏အခြေခံအဆောက်အဦနှင့် နည်းပညာချိတ်ဆက် ဆက်နွှယ်မှုများ ဆက်လက် တိုးတက်စေခြင်းသည် ဒေသတွင်းဖွံ့ဖြိုးတိုးတက်မှုအတွက် အရေးပါဆုံးကိစ္စရပ်ဖြစ် ကြောင်း၊ စီအယ်လ်အမ်ဗွီ ပူးပေါင်းဆောင်ရွက်မှုအောက်မှ ဒေသတွင်းစီးပွားရေး ပေါင်းစည်းမှုအတွက် မိမိတို့သည် “စီအယ်လ်အမ်ဗွီ ဖွံ့ဖြိုးတိုးတက်မှု မူဘောင်”နှင့်
စီအယ်လ်အမ်ဗွီ ဖွံ့ဖြိုးတိုးတက်မှု မူဘောင်အကောင်အထည်ဖော်ရေးအစီအစဉ် များကို အတည်ပြု ထုတ်ပြန်ခဲ့ကြောင်း ပြောကြားသည်။
အဆိုပါ အကောင်အထည်ဖော်ရေး အစီအစဉ် သည် စီအယ်လ်အမ်ဗွီ၏ ၂၀၃၀ ရည်မှန်းချက်ရရှိရေးကို အထောက်အပံ့ပြုမည့် ကုန် သွယ်မှုနှင့် ရင်းနှီးမြှုပ်နှံမှုကို မြှင့်တင်ရန်နှင့် COVID-19 အလွန်ကာလတွင် အဖွဲ့ဝင် နိုင်ငံများအကြား ဖွံ့ဖြိုးတိုးတက်ရေးပူးပေါင်းဆောင်ရွက်မှုကို တိုးမြှင့်ရန်အတွက် လမ်းညွှန်ချက်အဖြစ် အသုံးပြုနိုင်မည်ဟု ယုံကြည်မိကြောင်း၊ ထို့ကြောင့် မိမိအနေဖြင့် အဆွေတော်တို့ကို အဆိုပါ မူဘောင် နှင့် အကောင် အထည်ဖော်ရေးအစီအစဉ်များကို ထိရောက်စွာအကောင်အထည်ဖော်ရန် တိုက်တွန်း လိုကြောင်း၊ စီအယ်လ်အမ်ဗွီ နိုင်ငံများ၏ စိုက်ပျိုးရေးကဏ္ဍသည် ဒေသတွင်း ပေါင်းစည်းမှုနှင့် စီးပွားရေးဖွံ့ဖြိုးတိုးတက်မှုအတွက် အရေးပါသည့် အခန်းကဏ္ဍက ပါဝင်နေကြောင်း နစက ဥက္ကဋ္ဌ က ပြောကြားသည်။
ထို့ကြောင့် စီအယ်လ်အမ်ဗွီ နိုင်ငံများအနေဖြင့် စိုက်ပျိုးရေးနှင့် သက်ဆိုင်သည့် နည်းပညာအသစ်များကို စဉ်ဆက်မပြတ်လေ့လာရန်နှင့် အရည် အသွေးမြင့်ကုန်ပစ္စည်းများထုတ်လုပ်နိုင်ပြီး ရေရှည်တည်တံ့သည့် အခြေအနေဖန်တီး ပေးရန်လိုအပ်ကြောင်း၊ ကပ်ရောဂါဆိုးကြောင့် စီအယ်လ်အမ်ဗွီနိုင်ငံများ၏ စက်မှုကဏ္ဍသည် သိသာ ထင်ရှားစွာ ထိခိုက်ခဲ့ရကြောင်း၊ အဆိုပါကဏ္ဍ ပြန်လည်ဖွံ့ဖြိုးတိုးတက်ရေးအတွက် မိမိတို့အနေဖြင့် စီးပွားရေးစင်္ကြံများ၊ စီးပွားရေးစင်္ကြံများအကြား ချိတ်ဆက်မှုများနှင့် အထူးစီးပွားရေးဇုံများမှတစ်ဆင့် စက်မှုနည်းပညာဆိုင်ရာ အခြေခံအဆောက်အအုံ များနှင့် စက်မှုအဆောက်အအုံများကို တည်ဆောက်၊ အဆင့်မြှင့်တင်ပေးရန် လိုအပ်ကြောင်း နစက ဥက္ကဋ္ဌက ပြောကြားသည်။
ထို့ပြင် စက်မှုကုန်စည်ပြပွဲများကျင်းပရန်နှင့် စီအယ်လ်အမ်ဗွီနိုင်ငံများရှိ လုပ်သား ကုန်ထုတ်စွမ်းအားအတွက် လူ့စွမ်းအားအရင်းအမြစ် ဖွံ့ဖြိုးတိုးတက်အောင် ဆောင်ရွက်ရန်ကိုလည်း တိုက်တွန်းအားပေးသင့်ကြောင်း၊ ယနေ့ခေတ်အချိန်တွင် သန့်ရှင်း၍ ပြန်လည်ပြည့်ဖြိုးမြဲစွမ်းအင်ကဏ္ဍတွင် ရင်းနှီးမြှုပ်နှံမှုသည် တစ်နေ့ထက် တစ်နေ့ ပိုအရေးပါလာကြောင်း၊ ထို့ပြင် စိမ်းလန်းသော ဖွံ့ဖြိုးတိုးတက်မှုမဟာဗျူဟာကို အကောင်အထည်ဖော်ရာတွင် လျှပ်စစ်ကားများ အသုံးပြုခြင်းသည်လည်း အခြားရွေးချယ်စရာတစ်ခုအဖြစ် စဉ်းစားရန်လိုအပ်ကြောင်း နစက ဥက္ကဋ္ဌက ပြောကြားသည်။
ဘေးအန္တရာယ်များနှင့်ပတ်သက်၍ စီအယ်လ်အမ်ဗွီနိုင်ငံများသည် ဒေသတွင်း နိုင်ငံများအတွင်း ထိခိုက်လွယ်ပြီး ထိခိုက်ခံရမှုအများဆုံးပင် ဖြစ်ကြောင်း၊ ရာသီဥတု ပြောင်းလဲမှု၏ အကျိုးသက်ရောက်မှုကို လျော့ပါးသက်သာအောင် ဆောင်ရွက်ခြင်း သည် မိမိတို့ဒေသအတွက် အရေးကြီးသည့် စိန်ခေါ်မှုပင်ဖြစ်ကြောင်း၊ ထို့ကြောင့် မိမိတို့အနေဖြင့် သဘာဝနှင့် လူလုပ်ဘေးအန္တရာယ်များ၏ စိန်ခေါ်မှုကို စုပေါင်းအား ဖြင့် ကိုင်တွယ်ဖြေရှင်းရမည်ဖြစ်သကဲ့သို့ ဘေးအန္တရာယ်ဆိုင်ရာ စီမံခန့်ခွဲမှုယန္တရားနှင့် ရာသီဥတုပြောင်းလဲမှု လျော့ပါးသက်သာစေရေး၊ ဒေသတွင်းထိခိုက်မှုလျှော့ချရေးနှင့် ကြိုတင် အသိပေးခြင်းဆိုင်ရာထိရောက်သော အစီအစဉ်များနှင့် စီမံခန့်ခွဲမှုများကို အားဖြည့်ဆောင်ရွက်ရမည် ဖြစ်ကြောင်း နစက ဥက္ကဋ္ဌက ပြောကြားသည်။
ထို့ပြင် အဖွဲ့ဝင်နိုင်ငံများတွင် ရေမြေတောတောင်သဘာဝကို အခြေခံသည့် ခရီးသွားလုပ်ငန်းသည် ဒေသခံ ပြည်သူများ၏ စီးပွားရေးဖွံ့ဖြိုးတိုးတက်မှုကို များစွာအထောက်အပံ့ ဖြစ်စေကြောင်း၊ ထို့ကြောင့် မိမိတို့အနေဖြင့် သဘာဝပတ်ဝန်းကျင်နှင့် ယဉ်ကျေးမှု အလေ့အထများကို ထိန်းသိမ်းနိုင်သည့် ခရီးသွားလုပ်ငန်းနှင့်ပတ်သက်သည့် ပြည်တွင်းစီးပွားရေး လုပ်ငန်း များနှင့် MSMEs ကဏ္ဍများကို အားပေးထောက်ပံ့သင့်ကြောင်း၊မိမိအနေဖြင့် စီအယ်လ်အမ်ဗွီ ခရီးသွားလုပ်ငန်းဝန်ကြီးများ၏ (၆) ကြိမ်မြောက် စီအယ်လ်အမ်ဗွီ ခရီးသွားလုပ်ငန်းဝန်ကြီးများ အစည်းအဝေးကို ၂၀၂၂ ခုနှစ်တွင်ကျင်းပနိုင်ခဲ့ခြင်းနှင့် (၇) ကြိမ်မြောက်အစည်းအဝေးကို ၂၀၂၄ ခုနှစ်အတွင်း ကျင်းပရန် စီစဉ်ဆောင်ရွက်နေခြင်းတို့အပေါ် အလေးထားပါကြောင်း၊ မိမိအနေဖြင့် စီအယ်လ်အမ်ဗွီ ခရီးသွားလုပ်ငန်းပူးပေါင်း ဆောင်ရွက်ရေးဆိုင်ရာ လုပ်ငန်းအစီအစဉ် (၂၀၂၃-၂၀၂၅)" သည် စီအယ်လ်အမ်ဗွီနိုင်ငံများအတွက် ခရီးသွားလုပ်ငန်း ဖွံ့ဖြိုးတိုးတက်ရန် အကောင်အထည်ဖော်ရာတွင် များစွာအသုံးဝင်မည်ဟုလည်း ယုံကြည်ကြောင်း နစက ဥက္ကဋ္ဌက ပြောကြားသည်။
စီအယ်လ်အမ်ဗွီနိုင်ငံများတွင် လူ့စွမ်းအားအရင်းအမြစ် ဖွံ့ဖြိုးတိုးတက်ရေး အစီအစဉ်များ ဆောင်ရွက်ခြင်းသည် အရေးကြီးဆုံးဖြစ်ကြောင်း၊ ထို့ကြောင့် မိမိတို့ အနေဖြင့် စီအယ်လ်အမ်ဗွီ မူဘောင်အောက်မှ နယ်ပယ်အသီးသီးတွင်ရှိသည့် ပညာ သင်ဆု ပေးအပ်ခြင်းနှင့် အတွေ့အကြုံဖလှယ်ရေး အစီအစဉ်များကို ဆက်လက်ဆောင်ရွက်သွားသင့်ကြောင်း၊ မိမိအနေဖြင့် ဗီယက်နမ်နိုင်ငံမှ ကမ္ဘောဒီးယား၊ လာအို နှင့် မြန်မာနိုင်ငံတို့အတွက် ပညာသင်ဆုများပေးအပ်နေခြင်းအပေါ် ကျေးဇူးတင်ရှိကြောင်းကို ပြောကြားလိုကြောင်း၊ မိမိအနေဖြင့် ဗီယက်နမ်နိုင်ငံနှင့် အခြားစိတ်ဝင်စား သည့် အဖွဲ့ဝင်နိုင်ငံများကိုလည်း ပူးပေါင်းဆောင်ရွက်နိုင်မည့်အစီအစဉ်များရှာဖွေဖော် ထုတ်ကာ စီစဉ်ဆောင်ရွက်သွားရန် တိုက်တွန်းလိုကြောင်း နစက ဥက္ကဋ္ဌက ပြောကြားသည်။
ရန်ပုံငွေရရှိခြင်းသည် စီအယ်လ်အမ်ဗွီ ပူးပေါင်းဆောင်ရွက်မှု ယန္တရားအပါအဝင် ပူးပေါင်းဆောင်ရွက်မှု ယန္တရားတိုင်း၏ အောင်မြင်တိုးတက်မှုအတွက် အရေးပါသည် ဟု သုံးသပ်မိကြောင်း၊ မိမိအနေဖြင့် IAI လုပ်ငန်းအစီအစဉ်များမှတစ်ဆင့် အကူအညီ အထောက်အပံ့ရအောင် ဆောင်ရွက်ပေးသည့် အာဆီယံအတွင်းရေးမှူးချုပ်ရုံးကို ကျေးဇူးတင်ရှိကြောင်း၊ ထို့ပြင် စီအယ်လ်အမ်ဗွီစီမံကိန်းများအတွက် အထောက်အပံ့ ပေးသည့် ဖွံ့ဖြိုးတိုးတက်မှုမိတ်ဖက်နိုင်ငံများ၏အကူအညီနှင့် အထောက်အပံ့များကို လည်း အလေးထားကြောင်း နစက ဥက္ကဋ္ဌက ပြောကြားသည်။
မြန်မာနိုင်ငံအနေဖြင့် မိမိတို့ဒေသကို ချစ်ကြည်ရင်းနှီးမှုနှင့် စည်းလုံးညီညွတ် မှုကို အခြေခံသည့် ကြံ့ကြံ့ခံနိုင်ပြီး သာယာဝပြောသည့် အသိုက်အဝန်းဖြစ်စေရေး အတွက် ဒေသတွင်းသာမက နိုင်ငံတကာတွင်ရှိသည့် နိုင်ငံများနှင့် ဆက်လက်လက်တွဲ လုပ်ကိုင်သွားမည်ဖြစ်ကြောင်း၊ မြန်မာနိုင်ငံသည် စီအယ်လ်အမ်ဗွီ အဖွဲ့ဝင်နိုင်ငံများနှင့် အနီးကပ် ပူးပေါင်းဆောင်ရွက်ရင်း မိမိတို့၏ဘုံရည်မှန်းချက်ဖြစ်သည့် ရေရှည် တည်တံ့သော အလုံးစုံလွှမ်းခြုံသည့် ဖွံ့ဖြိုးတိုးတက်မှုရရှိအောင် ဆောင်ရွက်သွားမည် ဖြစ်သည်ကို ထပ်လောင်းအတည်ပြုကြောင်းလည်း နစက ဥက္ကဋ္ဌက ပြောကြားသည်။
ထို့နောက် အစည်းအဝေးသို့ တက်ရောက်လာကြသည့် အဖွဲ့ဝင်နိုင်ငံများမှ ဝန်ကြီးချုပ်များက (စီအယ်လ်အမ်ဗွီ) ထိပ်သီးအစည်းအဝေး၏ ထုတ်ပြန်ချက်များကို ဆွေးနွေးကြပြီး အတည်ပြုထုတ်ပြန်သည်။
ထို့နောက်(၁၁)ကြိမ်မြောက် ကမ္ဘောဒီးယား-လာအို-မြန်မာ-ဗီယက်နမ် ပူးပေါင်း ဆောင်ရွက်မှု (စီအယ်လ်အမ်ဗွီ) ထိပ်သီးအစည်းအဝေး ဥက္ကဋ္ဌ နစက ဥက္ကဋ္ဌက အစည်းအဝေး နိဂုံးချုပ်အမှာစကားပြောကြားရာတွင် စီအယ်လ်အမ်ဗွီထိပ်သီးအစည်းအဝေးကို (၂)နှစ် (၁) ကြိမ်ကျင်းပလေ့ရှိကြောင်း၊ မြန်မာနိုင်ငံက အလှည့်ကျဥက္ကဋ္ဌတာဝန်ယူချိန်အတွင်း ထိပ်သီး အစည်း အဝေးကို ပုံမှန်ကျင်းပနိုင်ရေးနှင့် မိမိတို့ပူးပေါင်းဆောင်ရွက်မှု၏ အသီးအပွင့်ရလဒ် များ ထွက်ပေါ်လာစေရန် အဖွဲ့ဝင်နိုင်ငံများအားလုံးနှင့် နီးကပ်စွာ ပူးပေါင်း ဆောင်ရွက်
ခဲ့ကြောင်း၊ ယခုအခါမှာတွင် ထိပ်သီးအစည်းအဝေးကို ကျင်းပကာ မိမိတို့ စီအယ်လ် အမ်ဗွီ နိုင်ငံများသာမက အခြားနိုင်ငံများအတွက်ပါ အများအကျိုးရှိစေမည့်ကိစ္စရပ် များကို ဆွေးနွေးနိုင်ခဲ့ခြင်းအတွက် အလွန်ပင်ဝမ်းမြောက်မိကြောင်း ပြောကြားသည်။
မြန်မာနိုင်ငံက ဥက္ကဋ္ဌတာဝန် ထမ်းဆောင်နေချိန်ကာလအတွင်းတွင် အဆွေတော်တို့၏ တက်ကြွစွာ ပူးပေါင်းဆောင်ရွက်မှု၊ နားလည်ပေးမှုနှင့် အဖိုး မဖြတ်နိုင်သည့် အားပေးထောက်ခံမှုများအတွက် အထူးပင်ကျေးဇူးတင်ရှိပါကြောင်း၊ ထို့ပြင် မိမိတို့သည် စည်းလုံးညီညွတ်မှု၊ ခံနိုင်ရည်ရှိမှုများနှင့် ယခုနှစ်များအတွင်း ဖြစ်ပေါ်လာသည့် စိန်ခေါ်မှုများကို ကျော်လွှားနိုင်ခဲ့ကြောင်း၊ စီအယ်လ်အမ်ဗွီ ပူးပေါင်း ဆောင်ရွက်မှု မူဘောင်အောက်တွင် သက်ဆိုင်ရာလုပ်ငန်းစီမံချက်များကို ထိရောက်စွာ အကောင်အထည်ဖော်ခြင်းဖြင့် မိမိတို့ဒေသတွင်းရှိ ပြည်သူများ၏ သာယာဝပြောမှုနှင့် ကြီးပွားတိုးတက်မှုကို ပိုမိုအထောက်အကူပြုမည်ဟု ယုံကြည်ကြောင်း၊ မိမိတို့သည် ပိုမိုခိုင်မာသည့် ကတိကဝတ်များနှင့် စီအယ်လ်အမ်ဗွီ ပူးပေါင်းဆောင်ရွက်မှုယန္တရား၏ အရှိန်အဟုန်ကို ဆက်လက်အရှိန်မြှင့်တင်သွားရမည်ဖြစ်ကြောင်း နစက ဥက္ကဋ္ဌက ပြောကြားသည်။
ထို့နောက် (၁၁) ကြိမ်မြောက် ကမ္ဘောဒီးယား-လာအို-မြန်မာ-ဗီယက်နမ် ပူးပေါင်းဆောင်ရွက်မှု (စီအယ်လ်အမ်ဗွီ)ထိပ်သီးအစည်းအဝေးဥက္ကဋ္ဌ နစက ဥက္ကဋ္ဌက ဗီယက်နမ်နိုင်ငံ ဝန်ကြီးချုပ်ထံ အလှည့်ကျဥက္ကဋ္ဌ တာဝန်လွဲပြောင်းပေးအပ်ပြီး ဗီယက်နမ်ဝန်ကြီးချုပ်က အလှည့်ကျ ဥက္ကဋ္ဌ တာဝန်လွှဲပြောင်းလက်ခံရခြင်းနှင့်စပ်လျဉ်း၍ ဆွေးနွေးပြောကြားပြီး အစည်းအဝေးကို ရုပ်သိမ်းခဲ့ကြောင်း သိရသည်။
