၂၀၁၉-၂၀ ရာသီတွင် ဗြိတိန်ရှိ ဘောလုံးပွဲများအနက် ရုပ်သံမှ ကြည့်ရှုမှုအများဆုံးပွဲအဖြစ် စနေနေ့က အာဆင်နယ်နှင့် ချယ်လ်ဆီးအသင်းတို့ ယှဉ်ပြိုင်ကစားခဲ့သည့် FA ဖလားဗိုလ်လုပွဲက ရပ်တည်ခဲ့ပြီး ကြည့်ရှုမှု ၈ ဒသမ ၂ သန်းအထိရှိကြောင်း သိရသည်။
အနောက်မြောက်လန်ဒန်ဒါဘီပြိုင်ဘက် အာဆင်နယ်နှင့် ချယ်လ်ဆီးအသင်းတို့ ယှဉ်ပြိုင်ကစားသည့် FA ဖလား ဗိုလ်လုပွဲကို BBC၊ BT Sport စသည့် ရုပ်သံလိုင်းများတွင် ထုတ်လွှင့်ပြသရာ BBC One ရုပ်သံ တစ်ခုတည်းမှာပင် ကြည့်ရှုမှု ၈ ဒသမ ၂ သန်းဖြင့် အများဆုံးဖြစ်ခဲ့ပြီး ကြည့်ရှုမှုအားလုံး၏ ၄၆ ဒသမ ၁ ရာခိုင်နှုန်းအထိရှိကြောင်း သိရသည်။
သို့ဖြစ်ရာ ယင်းပွဲစဉ်မှာ ၂၀၁၉-၂၀၂၀ ရာသီတွင် ရုပ်သံမှ ထုတ်လွှင့်ပြသသည့်ပွဲများအနက် ကြည့်ရှုမှုအများဆုံးအဖြစ် မှတ်တမ်းဝင်ခဲ့ပြီး မန်ယူ-ချယ်လ်ဆီး FA ဖလား ဆီမီးဖိုင်နယ်ပွဲတွင် ကြည့်ရှုခဲ့သည့် ၇ ဒသမ ၃ သန်းကို ကျော်ဖြတ်၍ နံပါတ် ၁ နေရာ ရပ်တည်နိုင်ခဲ့ခြင်းဖြစ်သည်။
ထို့ပြင် ထူးခြားမှုအဖြစ် ယခုရာသီတွင် ကြည့်ရှုမှုအများဆုံး အဆင့် ၁ မှ ၇ အထိ ရပ်တည်နေသည့်ပွဲများမှာ BBC ရုပ်သံက ထုတ်လွှင့်သည့် FA ဖလားပွဲစဉ်များဖြစ်ကြောင်း သိရသည်။
ပရီးမီးယားလိဂ်ပွဲများအနက် ကြည့်ရှုမှုအများဆုံးအဖြစ် BBC ရုပ်သံက ထုတ်လွှင့်သည့် ဆောက်သမ်တန်-မန်စီးတီးပွဲက ၅ ဒသမ ၇ သန်းဖြင့် အဆင့် ၈၊ BBC ရုပ်သံက ထုတ်လွှင့်သည့် အဲဗာတန်-လီဗာပူးလ် မာဆေးဆိုက်ဒ်ဒါဘီပွဲက ၅ ဒသမ ၅ သန်းဖြင့် အဆင့် ၉ နေရာ ရပ်တည်ခဲ့သည်။
ယခုရာသီတွင် COVID-19 ဖြစ်ပွားမှုကြောင့် ဇွန်လလယ်မှစ၍ ပြန်လည်ကျင်းပစဉ် ပရိသတ်မပါဘဲ ကွင်းပိတ်ကစားခဲ့ရသဖြင့် ရုပ်သံမှ ကြည့်ရှုမှုနှုန်း မြင့်တက်လာကြောင်း သိရသည်။
ဗြိတိန်တွင် သမိုင်းတစ်လျှောက် ကြည့်ရှုမှုအများဆုံးပွဲမှာ အင်္ဂလန်-အနောက်ဂျာမနီ ၁၉၆၆ ကမ္ဘာ့ဖလားဗိုလ်လုပွဲဖြစ်ပြီး ၃၂ ဒသမ ၃ သန်းအထိ ကြည့်ရှုခဲ့သည်။
■ ၂၀၁၉-၂၀ ရာသီတွင် ကြည့်ရှုမှုအများဆုံး ပွဲစဉ်များ
ပြိုင်ပွဲ ပွဲစဉ် ကြည့်ရှုမှုနှုန်း ရုပ်သံလိုင်း
FA ဖလား အာဆင်နယ် - ချယ်လ်ဆီး ၈.၂ သန်း BBC
FA ဖလား မန်ယူ - ချယ်လ်ဆီး ၇.၃ သန်း BBC
FA ဖလား လီဗာပူးလ် - အဲဗာတန် ၇.၂ သန်း BBC
FA ဖလား ချယ်လ်ဆီး - လီဗာပူးလ် ၆.၈ သန်း BBC
FA ဖလား နောဝစ်ချ် - မန်ယူ ၆.၄ သန်း BBC
FA ဖလား ရှရူးဘူရီ - လီဗာပူးလ် ၆.၁ သန်း BBC
FA ဖလား အာဆင်နယ် - လိဒ်စ် ၆ သန်း BBC
ပရီးမီးယားလိဂ် ဆောက်သမ်တန် - မန်စီးတီး ၅.၇ သန်း BBC
ပရီးမီးယားလိဂ် အဲဗာတန် - လီဗာပူးလ် ၅.၅ သန်း Sky
