COVID-19 ရောဂါကြောင့် (၂၁) ရာစုပင်လုံ စတုတ္ထအစည်းအဝေးအား မလွဲမသွေ ရွှေ့ဆိုင်းရမည်ဖြစ်ပြီး ကပ်ရောဂါ အလွန်နောက်ပိုင်းတွင် ငြိမ်းချမ်းရေးလုပ်ငန်းစဉ်ဆိုင်ရာ အစည်းအဝေးများကို ယခင် သတ်မှတ်ထားသည့်အတိုင်း ဆက်တိုက် ဆောင်ရွက်နိုင်ရေးအတွက် ကြိုတင်ပြင်ဆင်ထားရန် NCA-S EAO အစုအဖွဲ့၏ NCA အကောင်အထည်ဖော်မှုဆိုင်ရာ ညှိနှိုင်းရေးအဖွဲ့ခေါင်းဆောင် ရှမ်းပြည် ပြန်လည်ထူထောင်ရေးကောင်စီ (RCSS) အတွင်းရေးမှူး (၂) ဗိုလ်မှူးကြီးစိုင်းငင်း ပြောကြားသည်။
တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် လက်မှတ်ရေးထိုးထားသော တိုင်းရင်းသားလက်နက်ကိုင်များ အစုအဖွဲ့ (NCA-S EAO) များဖြင့် ဖွဲ့စည်း ထားသည့် NCA အကောင်အထည်ဖော်မှုဆိုင်ရာ မူဘောင်ညှိနှိုင်းရေးအဖွဲ့၏ နဝမအကြိမ်မြောက် အစည်းအဝေးအား ဧပြီ ၂၂ ရက်တွင် Online Video Conference ဖြင့် ပြုလုပ်ခဲ့ပြီး အဆိုပါအစည်းအဝေး နှုတ်ခွန်းဆက်စကား ပြောကြားရာတွင် ၎င်းက ထိုသို့ထည့်သွင်း ပြောကြားခဲ့ခြင်းဖြစ်သည်။
ရှစ်ကြိမ်မြောက် JICM အစည်းအဝေး ဆုံးဖြတ်ချက်အရ ပြည်ထောင်စုငြိမ်းချမ်းရေးညီလာခံ- (၂၁) ရာစုပင်လုံ စတုတ္ထ အစည်းအဝေးအား ယခုလ နောက်ဆုံးပတ်တွင် ကျင်းပရမည်ဖြစ်သော်လည်း COVID-19 ကပ်ရောဂါ ကူးစက်မှုအခြေအနေကြောင့် အဆိုပါအစည်းအဝေးအား မလွဲမသွေ ရွှေ့ဆိုင်းရမည်ဖြစ်ကြောင်း ဗိုလ်မှူးကြီးစိုင်းငင်းက ပြောကြားသည်။
ငြိမ်းချမ်းရေးလုပ်ငန်းစဉ်သည် အရေးကြီးသကဲ့သို့ တိုင်းရင်းသား ပြည်သူလူထုတစ်ရပ်လုံး၏ ကျန်းမာရေးသည်လည်း အလွန်အရေးကြီးသည့်အတွက် အားလုံး၏ ကျန်းမာရေးကို ရှေးရှုပြီး COVID-19 ကပ်ရောဂါဆိုင်ရာ ပညာပေးရေး၊ ကာကွယ်တားဆီးရေး၊ ထိန်းချုပ်ရေး၊ ကုသရေးလုပ်ငန်းများကို ဦးစားပေးလုပ်ငန်းများအဖြစ် အဖွဲ့အစည်းတိုင်းက ဝိုင်းဝန်းဆောင်ရွက်နေခြင်းဖြစ်ကြောင်း ၎င်းက ဆက်လက်ပြောကြားသည်။
“ COVID-19 ကပ်ရောဂါ ထိန်းချုပ်နိုင်တဲ့အချိန်နောက်ပိုင်း ငြိမ်းချမ်းရေးလုပ်ငန်းစဉ်ဆိုင်ရာ အစည်းအဝေးတွေကို သတ်မှတ်စီစဉ်ထားတဲ့အတိုင်း ဆက်တိုက်ဆောင်ရွက်နိုင်ဖို့ အခုကတည်းက ပြင်ဆင်ထားမှ တော်ကာကျမှာ ဖြစ်ပါတယ်” ဟု ဗိုလ်မှူးကြီး စိုင်းငင်းက ပြောကြားသည်။
ယခုပြုလုပ်သော အစည်းအဝေးတွင် ပြည်ထောင်စုသဘောတူစာချုပ် အစိတ်အပိုင်း (၃) တွင် ထည့်သွင်းချုပ်ဆိုမည့် အကြောင်းအရာများကို NCA-S EAO များအကြား အကျေအလည် ဆွေးနွေးသွားမည်ဖြစ်သည့်အပြင် COVID-19 ကပ်ရောဂါ အခြေအနေများ၊ တိုင်းရင်းသား လက်နက်ကိုင်အဖွဲ့များ၏ သက်ဆိုင်ရာနယ်မြေများတွင် ဆောင်ရွက်နေသော ကပ်ရောဂါပညာပေး၊ ကာကွယ်တားဆီးရေးဆိုင်ရာ လုပ်ငန်းများ၊ ငြိမ်းချမ်းရေးဆိုင်ရာ ရှေ့လုပ်ငန်းစဉ်များကိုလည်း ဆွေးနွေးသွားမည်ဖြစ်ကြောင်း ဗိုလ်မှူးကြီး စိုင်းငင်းက ပြောကြားသည်။
“ တစ်ဖက်မှာလည်း အရှိန်အဟုန်ရရှိပြီးသား ငြိမ်းချမ်းရေးလုပ်ငန်းစဉ်အတွက် အရှိန်ရပ်တန့်မသွားဖို့ ဂရုပြုဆောင်ရွက်ရမှာဖြစ်သလို အစိုးရညှိနှိုင်းရေးအဖွဲ့နဲ့ Online Video Conference ကျင်းပနိုင်ရေးကို ဒီအစည်းအဝေးမှာ သဘောထားရယူသွားမှာ ဖြစ်ပါတယ်။ နည်းလမ်းရှာသွားမှာ ဖြစ်ပါတယ်” ဟု ဗိုလ်မှူးကြီး စိုင်းငင်းက ပြောကြားသည်။
COVID-19 ကပ်ရောဂါဆိုင်ရာ ပညာပေးရေး၊ ကာကွယ်တားဆီးရေး၊ ကျန်းမာရေး၊ စစ်ဆေးရေး၊ ကုသရေးကိစ္စများအတွက် အစိုးရနှင့် သင့်လျော်သလို ဆက်လက်ပူးပေါင်း ဆောင်ရွက်သွားနိုင်ရေးအတွက် ယခုအစည်းအဝေးတွင် ဆွေးနွေးသွားမည်ဖြစ်သည်။
ယခုအခါ မြန်မာနိုင်ငံတွင် COVID-19 ရောဂါပိုး ကူးစက်ခံရသူ ဦးရေ ၁၂၀ ကျော်ပြီဖြစ်သည့်အတွက် NCA-S EAO ခေါင်းဆောင်များအနေဖြင့် ကျန်းမာရေးကို အထူးဂရုစိုက်ကြရန် ဗိုလ်မှူးကြီး စိုင်းငင်းက တိုက်တွန်းခဲ့သည်။
