စပိန်ထိပ်သီးကလပ်ရီးယဲလ်မက်ဒရစ်အသင်း၏ ယခုရာသီပြိုင်ပွဲစုံ ရှုံးပွဲဆက်တိုက်မရှိသည့်ရက်ပေါင်းမှာ (၁၀၅)ရက် (ယနေ့ဖေဖော်ဝါရီ ၁ ရက်နေ့အထိ) ရှိလာပြီဖြစ်ကြောင်း စပိန်အားကစားသတင်းစာ Marca ကဖော်ပြခဲ့သည်။
ရီးယဲလ်မက်ဒရစ်အသင်းသည် တစ်ကျော့ပြန်နည်းပြဇီဒန်းလက်ထက် ယခုရာသီတွင် တည်ငြိမ်သည့်ပုံစံကိုပြသနေပြီး ပြိုင်ပွဲစုံနောက်ဆုံးပွဲ (၂၀)ဆက်တိုက်ရှုံးပွဲမရှိအောင်စွမ်းဆောင်နိုင်ခဲ့ခြင်းလည်းဖြစ်သည်။
ရီးယဲလ်မက်ဒရစ်အသင်းအနေဖြင့် အောက်တိုဘာ (၂၀)ရက်နေ့ကယှဉ်ပြိုင်ခဲ့သော လာလီဂါပွဲစဉ်တစ်ပွဲဖြစ်သည့် မာယော့ကာအသင်းနှင့်အဝေးကွင်းပွဲစဉ်တွင် (၀-၁)ဂိုးဖြင့်ရှုံးနိမ့်ပြီးနောက်ပိုင်း ပြိုင်ပွဲစုံတွင်ရှုံးပွဲမရှိအောင်စွမ်းဆောင်ထား နိုင်ခြင်းလည်းဖြစ်သည်။
ရီးယဲလ်မက်ဒရစ်အသင်းသည် နောက်ဆုံးကစားခဲ့သည့် ပြိုင်ပွဲစုံပွဲ (၂၀)တွင် (၁၄)ပွဲနိုင်၊ (၆)ပွဲသရေ (အက်သလက်တီကိုအသင်းအား စပိန်စူပါဖလားဗိုလ်လုပွဲတွင်ပယ်နယ်တီဖြင့်အနိုင်ရသည့်ပွဲအား သရေရလဒ်သာသတ်မှတ်) ရလဒ်ကိုရရှိခဲ့ပြီး၊ အဆိုပါပွဲ (၂၀)တွင် ဂိုးမပေးရသည့်ပွဲ (၁၂)ပွဲအထိရှိခဲ့သည်။
ထို့ပြင် ရီးယဲလ်မက်ဒရစ်အသင်းသည် အောက်တိုဘာ (၂၀)ရက်နေ့နောက်ပိုင်းစတင်တွက်ချက်ပါက ဥရောပထိပ်တန်းလိဂ် (၅)ခုတွင် ပြိုင်ပွဲစုံရှုံးပွဲမရှိသည့် တစ်သင်းတည်းသောအသင်းအဖြစ်လည်း ရပ်တည်နေကြောင်းသိရသည်။
ရီးယဲလ်မက်ဒရစ်အသင်းရှုံးပွဲမရှိခဲ့သည့် ပြိုင်ပွဲစုံပွဲ (၂၀)တွင် PSG အသင်းနှင့်ချန်ပီယံလိဂ်အိမ်ကွင်းပွဲစဉ်၊ ဘာစီလိုနာ၊ ဗလင်စီယာတို့နှင့် လာလီဂါအဝေးကွင်းပွဲစဉ်များနှင့် ဗလင်စီယာ၊ အက်သလက်တီကိုတို့အားအနိုင်ရဗိုလ်စွဲခဲ့သော စပိန်စူပါဖလားပွဲစဉ်များလည်းပါဝင်ကြောင်းသိရသည်။
