တစ်နိုင်ငံလုံး ပစ်ခတ်တိုက်ခိုက်ရပ်စဲရေး သဘောတူစာချုပ် (NCA) တွင် လက်မှတ်ရေးထိုးခဲ့သည့် မွန်ပြည်သစ်ပါတီ (NMSP) က NCA ရေးထိုးရခြင်းနှင့်ပတ်သက်၍ ပထမဆုံးလူထုတွေ့ဆုံရှင်းလင်းပွဲအား မွန်ပြည်နယ် ရေးမြို့နယ် ရေးချောင်းဖျားဒေသရှိ မွန်အမျိုးသားပညာရေးဗဟိုဌာန အခြေစိုက်ရာညီစားစခန်း၌ ဧပြီ ၉ ရက်မှစတင်ကာ သုံးရက်ကြာ ကျင်းပပြုလုပ်သွားမည်ဖြစ်ကြောင်း သတင်းရရှိသည်။
မွန်ပြည်သစ်ပါတီက ဦးဆောင်ကျင်းပရမည့် မွန်လူမျိုးအလိုက် အမျိုးသားအဆင့်ဆွေးနွေးပွဲများမတိုင်မီ အဆိုပါ လူထုရှင်းလင်းပွဲများပြုလုပ်ရန် စီစဉ်ခဲ့သော်လည်း ရှင်းလင်းပွဲသို့ တက်ရောက်မည့် လူထုအင်အားမှာ များနေသောကြောင့် ပြန်လည်လျှော့ချရန် တပ်မတော်ကပြောဆိုလာသဖြင့် ရှင်းလင်းပွဲများအား ကျင်းပရန်နှောင့်နှေးခဲ့ပြီး ယခုမှသာ စတင်ကျင်းပနိုင်ခြင်းဖြစ်သည်။
မော်လမြိုင်မြို့ ဇေယျာမြိုင်ရပ်ကွက်ရှိ နိုင်ရွှေကျင်စာကြည့်တိုက်၌ ဧပြီ ၆ ရက် နံနက်ပိုင်းက မွန်ပြည်သစ်ပါတီ၊ မွန်နိုင်ငံရေးပါတီနှင့် မွန်အရပ်ဘက် လူမှုအဖွဲ့အစည်းများ တွေ့ဆုံပွဲပြုလုပ်ခဲ့ပြီး အဆိုပါလူထုရှင်းလင်းပွဲ စတင်ပြုလုပ်မည်ဖြစ်ကြောင်း မွန်ပြည်သစ်ဗဟိုကော်မတီဝင် နိုင်ဝင်းလှက အသိပေးပြောကြားခဲ့သည်။
“မွန်ပြည်သစ်ပါတီအနေနဲ့ NCA လက်မှတ်ရေးထိုးခြင်းကိစ္စနဲ့ ပတ်သက်ပြီးတော့ နေရာငါးခုမှာ ပြည်သူလူထုကို ချပြရှင်းလင်းဆွေးနွေးပွဲတွေ လုပ်ဆောင်ဖို့ စီစဉ်ဆောင်ရွက်ခဲ့ပါတယ်။ ဒါပေမဲ့ ကန့်သတ်ချက်တွေရှိတဲ့အတွက် လူထုတွေ့ဆုံပွဲတွေကို ရပ်ဆိုင်းခဲ့ရပြီးတော့ ဖြစ်စဉ်တွေကို အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာနကို တင်ပြခဲ့ပါတယ်။ မွန်ပြည်နယ်အတွင်းမှာ လူထုတွေ့ဆုံပွဲလုပ်မယ့် ညီစားစခန်းနဲ့ဝယ်ဇင်စခန်းတို့မှာ အင်အား ၂၀၀၊ ကရင်ပြည်နယ်အတွင်းမှာ လူထုတွေ့ဆုံပွဲလုပ်မယ့် တောင်ပေါက်၊ အင်းခွနဲ့ ဂျပန်ရေတွင်းကျေးရွာတွေမှာ အင်အား ၅၀ လောက်နဲ့ လုပ်ဆောင်နိုင်တယ်ဆိုပြီး အကြောင်းပြန်လာတယ်။ အဲဒါနဲ့ အခုညီစားစခန်းမှာ ဧပြီ ၉ ရက်ကနေ ၁၁ ရက်အထိ လူထုတွေ့ဆုံပွဲကို ကျင်းပပြုလုပ်သွားမှာဖြစ်ပါတယ်” ဟု မွန်ပြည်သစ်ဗဟိုကော်မတီဝင် နိုင်ဝင်းလှက ပြောကြားသည်။
အဆိုပါ တွေ့ဆုံဆွေးနွေးပွဲ၌ လူထုတွေ့ဆုံပွဲလုပ်ငန်းကော်မတီအား မွန်ပြည်သစ်ပါတီမှ နိုင်ဗညားလယ်အပါအဝင်သုံးဦး၊ မွန်အမျိုးသားပါတီမှ နိုင်စံလှိုင်အပါအဝင် သုံးဦး၊ မွန်ဒေသလုံးဆိုင်ရာ ဒီမိုကရေစီပါတီမှ နိုင်စံတင်အပါအဝင်သုံးဦး၊ အရပ်ဘက်လူမှုအဖွဲ့အစည်းမှ ဦးမင်းအောင်ထူး အပါအဝင် သုံးဦးနှင့် ပြင်ပပညာရှင် နိုင်ဝင်းကြည်အပါအဝင် သုံးဦး၊ စုစုပေါင်း ၁၅ ဦးဖြင့် ဖွဲ့စည်းခဲ့ကြောင်းလည်း သိရသည်။
“ဧပြီ ၆ ရက်ကလုပ်ခဲ့တဲ့ တွေ့ဆုံဆွေးနွေးပွဲမှာက ညီစားစခန်းမှာပြုလုပ်မယ့် လူထုတွေ့ဆုံပွဲအတွက် အစီအစဉ်တွေကို အဓိကဆွေးနွေးဖြစ်ပါတယ်။ ဒီဧပြီ ၉ ရက်ကနေ ၁၁ ရက်အထိကို ညီစားစခန်း လူထုတွေ့ဆုံပွဲလုပ်မယ်။ သြင်္ကန်ပြီးရင်တော့ ရေးမြို့နယ်မှာပဲရှိတဲ့ ဝယ်ဇင်စခန်းမှာပြုလုပ်ဖြစ်မှာပါ။ ကျန်နေရာသုံးခုအတွက်ကတော့ ထပ်ပြီးတော့ ဆွေးနွေးစီစဉ်ရဦးမှာပါ” ဟု မွန်အရပ်ဘက်လူမှုအဖွဲ့အစည်းမှ ဦးမင်းအောင်ထူးက ပြောကြားသည်။
မွန်ပြည်သစ်ပါတီသည် ၂၀၁၈ ခုနှစ် ဖေဖော်ဝါရီ ၁၃ ရက်က NCA စာချုပ်တွင် လားဟူဒီမိုကရက်တစ်အစည်းအရုံး (LDU) နှင့်အတူ လက်မှတ်ရေးထိုးခဲ့ခြင်းဖြစ်သည်။
NCA စာချုပ်တွင် ပါဝင်လက်မှတ်ရေးထိုးထားသည့် အဖွဲ့များအနက် ယခင်လက်မှတ်ရေးထိုးခဲ့သည့် တိုင်းရင်းသားလက်နက်ကိုင်ရှစ်ဖွဲ့တွင် ရှမ်းပြည်ပြန်လည်ထူထောင်ရေးကောင်စီ (RCSS/SSA) မှာ ရှမ်းလူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲ ကျင်းပခွင့်ရရှိထားသော်လည်း အဆိုပါပွဲ အကြိုလူထုတွေ့ဆုံပွဲများပြုလုပ်ရာတွင် တပ်မတော်နှင့် အုပ်ချုပ်ရေးဘက်က တားမြစ်မှုများပြုလုပ်ခဲ့သဖြင့် ပြုလုပ်ဆဲအကြို တွေ့ဆုံပွဲများလည်း ရပ်ဆိုင်းခဲ့သည့်အပြင် အမျိုးသားအဆင့် နိုင်ငံရေးဆွေးနွေးပွဲ ကျင်းပရန်ကိုလည်း ရွှေ့ဆိုင်းထားကာ တစ်ဆို့မှုများဖြစ်ပေါ်နေပြီး အဆိုပါအခြေအနေအား ပြေလည်စေရန် အစိုးရဘက်မှ RCSS သို့ နည်းလမ်းနှစ်ခု ကမ်းလှမ်းထားသော်လည်း ပြေလည်မှုမရရှိသေးပေ။
ထို့အတူ NCA ရေးထိုးထားသည့် ရခိုင်ပြည်လွတ်မြောက်ရေးပါတီ (ALP) သည် လူမျိုးအလိုက်အမျိုးသားအဆင့် နိုင်ငံရေးဆွေးနွေးပွဲအား ကျင်းပခွင့်မရရှိသေးဘဲ အစိုးရဘက်ကမူ ရခိုင်ပြည်နယ်၏ လက်ရှိနိုင်ငံရေးအခြေအနေများကြောင့် ခွင့်မပြုခြင်းဖြစ်ကြောင်း ပြောဆိုထားသည်။
