နှစ်တစ်နှစ်အတွင်း ဝင်ငွေကျပ်သိန်း ၆၀ အထိရရှိသူဖြစ်ပါက ဝင်ငွေခွန်စည်းကြပ်ခြင်းမပြုရန်နှင့် ဝင်ငွေကျပ်သိန်း ၆၀ အထက်ရရှိသူများကိုသာ ဝင်ငွေခွန်ထမ်းဆောင်သင့်သည်ဟု ပြင်ဆင်သင့်ကြောင်း ပြည်ထောင်စုလွှတ်တော် ဥပဒေကြမ်းပူးပေါင်းကော်မတီက ဖေဖော်ဝါရီ ၂၈ ရက်က ပြုလုပ်သည့် ပြည်ထောင်စုလွှတ်တော် အစည်းအဝေးတွင် ၂၀၁၈ ခုနှစ် ပြည်ထောင်စု၏ အခွန်အကောက်ဥပဒေကြမ်းနှင့်စပ်လျဉ်းပြီး ပြည်ထောင်စုလွှတ်တော် ဥပဒေကြမ်းပူးပေါင်းကော်မတီက လေ့လာတွေ့ရှိချက်နှင့် သဘောထားမှတ်ချက် အစီရင်ခံတင်သွင်းရာတွင် မှတ်ချက်ပြုထားသည်။

ဥပဒေကြမ်း၏ အခန်း (၇) ဝင်ငွေခွန်အခန်းတွင် လစာမှနှစ်တစ်နှစ်အတွင်း ဝင်ငွေကျပ် သိန်း ၆၀ အထိရရှိသူဖြစ်လျှင် မည်သူ့ကိုမျှ ဝင်ငွေခွန်စည်းကြပ်ခြင်းမပြုရ။ ထိုသို့စည်းကြပ်ခြင်းမပြုသဖြင့် ကင်းလွတ်ခွင့်ရသည့် လစာဝင်ငွေဆိုင်ရာ သက်သေခံအထောက်အထားကို တောင်းခံလာပါက သတ်မှတ်ချက်များနှင့်အညီ ပြည်တွင်းအခွန်များဦးစီးဌာနက ထုတ်ပေးရမည်။ သို့ရာတွင် လစာမှနှစ်တစ်နှစ်အတွင်း ဝင်ငွေကျပ်သိန်း ၆၀ အထက်ရရှိသူဖြစ်လျှင် ရရှိသည့်လစာ ဝင်ငွေစုစုပေါင်းအပေါ်တွင် ဝင်ငွေခွန်ထမ်းဆောင်ရမည်။ လစာမှနှစ်တစ်နှစ်အတွင်း ဝင်ငွေကျပ်သိန်း ၆၀ အထက်ရရှိသူဖြစ်လျှင် သို့မဟုတ် အသက်မွေးဝမ်းကျောင်းပညာလုပ်ငန်း၊ စီးပွားရေးလုပ်ငန်းနှင့် အခြားရလမ်းများမှ ဝင်ငွေဖြစ်လျှင် မည်သူ့ကိုမဆို စုစုပေါင်းဝင်ငွေမှ ဝင်ငွေခွန်ဥပဒေပုဒ်မ ၆ အရ သက်သာခွင့်များခုနှိမ်ပြီးနောက် ကျန်ဝင်ငွေအပေါ် ဝင်ငွေအလွှာအလိုက် စည်းကြပ်ရမည့် ဝင်ငွေခွန်နှုန်းထားများကို အောက်ပါအတိုင်း ပြင်ဆင်သင့်သည်ဟု ဥပဒေကြမ်းပူးပေါင်းကော်မတီက သဘောထားမှတ်ချက်ပြုခဲ့သည်။

ဝင်ငွေခွန်စည်းကြပ်ရန် ဝင်ငွေအလွှာ ၁ ကျပ်မှ သိန်း ၂၀ အထိအား ၀ ရာခိုင်နှုန်း၊ ၂၀၀၀၀၀၁ ကျပ်မှ ၅၀၀၀၀၀၀ ကျပ်အထိ ၅ ရာခိုင်နှုန်း၊ ၅၀၀၀၀၀၁ ကျပ်မှ ၁၀၀၀၀၀၀၀ ကျပ်အထိအား ၁၀ ရာခိုင်နှုန်း၊ ကျပ် ၁၀၀၀၀၀၀၁ မှ ၂၀၀၀၀၀၀၀ ကျပ်အထိ ၁၅ ရာခိုင်နှုန်း၊ ၂၀၀၀၀၀၀၁ ကျပ်မှ ၃၀၀၀၀၀၀၀ ကျပ်အထိ ၂၀ ရာခိုင်နှုန်း၊ ၃၀၀၀၀၀၀၁ ကျပ်နှင့်အထက်အား ၂၅ ရာခိုင်နှုန်းအထိ သတ်မှတ်သင့်ကြောင်း ဥပဒေကြမ်းပူးပေါင်းကော်မတီက မှတ်ချက်ပြုခဲ့သည်။

ဥပဒေကြမ်း၏ အပိုဒ် ၂၀ ဝင်ငွေခွန် ဥပဒေပုဒ်မ ၆၊ ပုဒ်မခွဲ (က)၊ ပုဒ်မခွဲငယ် (၁၊၂) တို့အရ အခြေခံသက်သာခွင့် ခွင့်ပြုငွေသည် ဝင်ငွေအမျိုးအစားတစ်ခုစီ၏ ရာခိုင်နှုန်း ၂၀ နှင့်ညီမျှသောငွေဖြစ်ရမည်။ သို့ရာတွင် နှစ်တစ်နှစ်အတွက် အခြေခံသက်သာခွင့် ခွင့်ပြုငွေစုစုပေါင်းသည် ကျပ်သိန်း ၁၀၀ ထက်မပိုစေရ၊ ဝင်ငွေခွန်ဥပဒေပုဒ်မ ၆၊ ပုဒ်မခွဲ (က) ပုဒ်မခွဲငယ် (၁၊၂)တို့အရ အောက်ပါသက်သာခွင့် ခွင့်ပြုငွေကို ဝင်ငွေခွန်ဥပဒေပုဒ်မ ၆၊ ပုဒ် မခွဲ(ဂ)၊ ပုဒ်မခွဲငယ် (၂) ပါ တစ်ဦးချင်းပုဂ္ဂိုလ်၏ စုစုပေါင်းဝင်ငွေမှနုတ်ပယ်၍ ကျန်ငွေအပေါ်တွင် ဝင်ငွေခွန်စည်းကြပ်ရမည် (က) အတူနေ မိဘတစ်ဦးလျှင် ကျပ် ၁၀ သိန်းစီ၊ အိမ်ထောင်ဖက်တစ်ဦးအတွက်သာလျှင် ကျပ် ၁၀ သိန်း၊ သားသမီးတစ်ဦးလျှင် ကျပ် ၅ သိန်းစီ၊ ဝင်ငွေခွန်ဥပဒေပုဒ်မ ၆ နှင့် ၆-က တို့အရ သက်သာခွင့်များမနုတ်မီ ပြည်ပနေနိုင်ငံသား၏ ကင်းလွတ်ခွင့်ရရှိသည့် ဝင်ငွေခေါင်းစဉ်မှတစ်ပါး နိုင်ငံခြားငွေဖြင့် ပြည်ပတွင်ရရှိသည့် စုစုပေါင်းဝင်ငွေအပေါ် ၁၀ ရာခိုင်နှုန်းဖြင့် ဝင်ငွေခွန်စည်းကြပ်ရမည်ဟု ပြဋ္ဌာန်းသင့်ကြောင်း ဥပဒေကြမ်းပူးပေါင်းကော်မတီက သဘောထားမှတ်ချက်ပြုခဲ့သည်။

မူလဥပဒေကြမ်းတွင် ဝင်ငွေခွန်အဖြစ် လစာမှနှစ်တစ်နှစ်အတွင်း ဝင်ငွေကျပ် ၄၈ သိန်းအထိရရှိသူဖြစ်လျှင် မည်သူ့ကိုမျှ ဝင်ငွေခွန်စည်းကြပ်ခြင်းမပြုရ။ ထိုသို့စည်းကြပ်ခြင်းမပြုသဖြင့် ကင်းလွတ်ခွင့်ရသည့် လစာဝင်ငွေဆိုင်ရာ သက်သေခံအထောက်အထားကို တောင်းခံလာပါက သတ်မှတ်ချက်များနှင့်အညီ ပြည်တွင်းအခွန်များဦးစီးဌာနက ထုတ်ပေးရမည်။ သို့ရာတွင် လစာမှနှစ်တစ်နှစ်အတွင်း ဝင်ငွေကျပ် ၄၈ သိန်းအထက်ရရှိသူဖြစ်လျှင် ရရှိသည့် လစာဝင်ငွေစုစုပေါင်းအပေါ်တွင် ဝင်ငွေခွန်ထမ်းဆောင်ရမည်ဟု ပြဋ္ဌာန်းထားသည်။

ပြည်သူ့ငွေစာရင်း ပူးပေါင်းကော်မတီ ဒုတိယဥက္ကဋ္ဌ ဦးအောင်မင်းက “လစာနဲ့ပတ်သက်ရင် ၄၈ သိန်း ၁ ကျပ်ကစပြီး ဝင်ငွေခွန်ဆောင်ရတယ်။ ကျပ်၄၈ သိန်းထိရတဲ့သူ ဝင်ငွေခွန်ဆောင်စရာမလိုဘူး။ အခုဆိုလို့ရှိရင် လစာဝင်ငွေသိန်း ၆၀ ထိ ရတဲ့သူတွေ ဝင်ငွေခွန်ဆောင်စရာမလိုဘူး။ ကျပ်သိန်း ၆၀ နဲ့တစ်ကျပ်ရမှ ဝင်ငွေခွန်ဆောင်ရမယ်။ အဲဒီတော့ ပျမ်းမျှခြင်းပြောရရင် တစ်လလစာ ငါးသိန်းရတဲ့သူတွေ ဝင်ငွေခွန်ဆောင်စရာမလိုတော့ဘူး။ အဲဒါကတော့ ဝင်ငွေခွန်ပေးဆောင်ရမယ့် နှုန်းထားလေးကို မြှင့်ပေးလိုက်တာပေါ့။ ကျပ် ၄၈ သိန်းကနေ သိန်း ၆၀ ကို မြှင့်ပေးလိုက်တာပါ။ ဒါပေမဲ့လည်း တစ်လကို လစာaလးသိန်းငါးသိန်းဆိုတာ တကယ့်တကယ်ပြောမယ်ဆို ကျွန်တော်တို့ရဲ့အနေအထားနဲ့က တကယ့်အများကြီး မဟုတ်သေးပါဘူး။ အစိုးရဌာနဆိုင်ရာမှာဆိုရင်လည်း လစာငါးသိန်းရတာက ဦးဆောင်ညွှန်ကြားရေးမှူးတို့၊ ညွှန်ချုပ်တို့ပဲရှိပါတယ်။ ကျန်တာက ငါးသိန်းအောက်ပါပဲ၊ ပြင်ပပုဂ္ဂလိကလုပ်ငန်းမှာ လုပ်နေတဲ့သူတွေကလည်း ငါးသိန်းအထိရတဲ့ ဝန်ထမ်းတွေက ဘယ်လိုဝန်ထမ်းတွေအများစုလည်း၊ နဂိုတည်းက ပြောပါတယ်။ ပြည်သူတွေကို ဖိစီးမှုမဖြစ်စေလိုတဲ့ဟာလည်း ပါပါတယ်။ လျှော့နိုင်သမျှ လျှော့ပေးမယ်။ အဲဒီတော့ လျော့သွားတဲ့အခွန်တွေ ဘယ်ကပိုကောက်မလဲ ကုန်သွယ်လုပ်ငန်းခွန်တွေ ကောက်မှာပေါ့” ဟု သတင်းထောက်များအား ပြောကြားသည်။