နိုင်ငံတကာ ရင်းနှီးမြှုပ်နှံသူများ စိတ်ဝင်စားမှု မြင့်တက်နေသည့် သီလဝါအထူးစီးပွားရေးဇုန် တစ်နေရာကို တွေ့ရစဉ် (ဓာတ်ပုံ-ကျော်ဇင်ဖြိုး)
ဘဏ္ဍာနှစ်ကြားကာလ သုံးလအတွင်း MIC က ခွင့်ပြုပေးထားသည့် နိုင်ငံခြားရင်းနှီးမြှုပ်နှံမှုပမာဏ အမေရိကန်ဒေါ်လာသန်း ရှစ်ရာကျော်သာ ရှိသော်လည်း ပြည်တွင်းသို့ အမှန်တကယ် ဝင်ရောက်ထားသည့် ပမာဏမှာ အမေရိကန်ဒေါ်လာ သန်း ၁,၃၀၀ အထိရှိကြောင်း မြန်မာနိုင်ငံရင်းနှီးမြှုပ်နှံမှု ကော်မရှင် (MIC) မှ သိရသည်။
“၂၀၁၈ ခုနှစ်ပေါ့နော် ဧပြီလကနေ ဇွန်လအထိ အမှန်တကယ် ဝင်ရောက်လာတဲ့ အခြေအနေက ငွေသားနဲ့ ဝင်လာတာက အမေရိကန်ဒေါ်လာ ၅၅၂ ဒသမ ၇၇၉ သန်း ငွေသားနဲ့ဝင်တာဖြစ်တယ်။ စက်ပစ္စည်းတွေ ယန္တရားတွေ ၂၈၀ ဒသမ ၉၂၈ သန်းပေါ့ ပေါင်းလိုက်ရင် ၁၃၃၃ ဒသမ ၇၀၇ သန်း ရှိပါတယ်” ဟု မြန်မာနိုင်ငံရင်းနှီးမြှုပ်နှံမှု ကော်မရှင်၏ အတွင်းရေးမှူး ဦးအောင်နိုင်ဦးက ပြောကြားသည်။
ရင်းနှီးမြှုပ်နှံမှုသဘောတရားအရ ယခုနှစ်အတွင်း လုပ်ငန်းလုပ်ကိုင်ခွင့် ခွင့်ပြုမိန့် ခွင့်ပြုပေးခဲ့သော်လည်း ရင်းနှီးမြှုပ်နှံမှုလုပ်ငန်းပမာဏသည် ချက်ချင်းဝင်လာခြင်းမဟုတ်ဘဲ ယင်းလုပ်ငန်းများ၏ သတ်မှတ်ထားသည့် စီမံကိန်းကာလအပေါ်မူတည်ကာ ခွင့်ပြုပေးထားခဲ့သည့် ရင်းနှီးမြှုပ်နှံမှုများ ဝင်ရောက်လာခြင်းဖြစ်ကြောင်း သိရသည်။
“အားလုံး MIC က ခွင့်ပြုပေးတာက အခုချိန်အထိမှ ၈၄၂ သန်းပဲ ရှိသေးတာ ဝင်လာတာက ၁၃၀၀ ကျော်နေပြီ ဘယ်လိုဖြစ်တာလဲဆိုတာ ဖြစ်နိုင်ပါတယ်။ ရင်းနှီးမြှုပ်နှံမှုရဲ့ သဘောက ကုန်သွယ်မှုနဲ့မတူပါဘူး။ ကုန်သွယ်မှုက ပို့ကုန်တင်ပို့ပြီဆိုရင် သင်္ဘောတင်သွားတဲ့ ကိန်းဂဏန်းကို တန်းပြီးတော့ ယူလိုက်လို့ရတယ်။ သွင်းကုန်ဆိုလည်း ဝင်လာတဲ့ကိန်းဂဏန်းကို ကောက်လိုက်လို့ရတယ်။ ရင်းနှီးမြှုပ်နှံမှုရဲ့ သဘောက ရေရှည်သွားတဲ့အခါကျတော့ လုပ်ငန်းတစ်ခုကို သန်းတစ်ရာ MIC က ခွင့်ပြုလိုက်ပြီဆိုရင် ဒီသန်းတစ်ရာသည် ခွင့်ပြုလိုက်တဲ့ ပမာဏပေါ့။ ဒီသန်းတစ်ရာသည် ဒီနေ့ MIC ခွင့်ပြုတာနဲ့ တစ်ပြိုင်နက် တန်းဝင်လာတာ မဟုတ်ဘူး။ ဒီသန်းတစ်ရာကို သုံးနှစ်အတွင်းမှာ အပြီးထည့်မယ် လေးနှစ်အတွင်းမှာ အပြီးထည့်မယ်ဆိုတဲ့ သဘောတရားတွေ ရှိပါတယ်” ဟု ဦးအောင်နိုင်ဦးက ပြောကြားသည်။
ယခုကဲ့သို့ ခွင့်ပြုပေးထားသည့် ရင်းနှီးမြှုပ်နှံမှု ပမာဏထက် အမှန်တကယ် ဝင်ရောက်သော ရင်းနှီးမြှုပ်နှံမှု ပမာဏများနေခြင်းသည် ယခင်နှစ်များက ခွင့်ပြုပေးထားသော ရင်းနှီးမြှုပ်နှံမှုလုပ်ငန်းများက ယခုနှစ်အတွင်း ဝင်ရောက်လာခဲ့ခြင်းကြောင့် ဖြစ်ကြောင်း သိရသည်။
“ရင်းနှီးမြှုပ်နှံမှုက ဒီနေ့ပေးဒီနေ့ ဝင်တာမဟုတ်ဘူး။ ယခင်ကပေးထားတဲ့ လုပ်ငန်းတွေက ဒီနှစ်ထဲမှာဝင်လာပေါ့။ ဒါကြောင့်မို့ ဒီနှစ်မှာကြည့်လိုက်မယ် ဆိုရင်လည်း တကယ်ခွင့်ပြုတာ သန်း ၈၀၀ ကျော်ပဲ ရှိသေးတယ်။ အမှန်တကယ်ဝင်တာက ၁၃၃၃ သန်းပေါ့ ဒီဟာတွေသည် မနှစ်က ခွင့်ပြုထားတာတွေကနေ ဒီဘက်ကို ဆက်ပါလာတာပေါ့” ဟု ဦးအောင်နိုင်ဦးက ပြောကြားသည်။
အတည်ပြု ခွင့်ပြုပေးထားသော နိုင်ငံခြားရင်းနှီးမြှုပ်နှံမှုလုပ်ငန်းများမှ မြန်မာနိုင်ငံ အတွင်းသို့ အမှန်တကယ် ဝင်ရောက်လာသည့် ရင်းနှီးမြှုပ်နှံမှု ပမာဏများကို သုံးလတစ်ကြိမ် စာရင်းကောက်ယူကာ မြန်မာနိုင်ငံတော်ဗဟိုဘဏ်နှင့် သက်ဆိုင်ရာဝန်ကြီးဌာနများသို့ MIC မှ သတင်းပေးပို့လျက်ရှိကြောင်း သိရသည်။
“အမှန်တကယ် ဝင်ရောက်မှုကို ကျွန်တော်တို့ဆီမှာ သုံးလတစ်ကြိမ်စာရင်း ကောက်ပါတယ်။ သူကတစ်လချင်း ကောက်လို့မရဘူး။ ရတဲ့စာရင်းကို ဗဟိုဘဏ်တို့ ဘာတို့ကို ပို့ပေးတယ်” ဟု ဦးအောင်နိုင်ဦးက ပြောကြားသည်။
မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) အနေဖြင့် ရင်းနှီးမြှုပ်နှံမှုပမာဏ အမေရိကန် ဒေါ်လာ ၁၄၃ သန်းကျော်ရှိသည့် နိုင်ငံခြားသားရင်းနှီးမြှုပ်နှံမှု လုပ်ငန်းပေါင်း ၁၉ ခုကို ထပ်မံ ခွင့်ပြု/အတည်ပြုပေးခဲ့ကြောင်း သိရသည်။ ၂၀၁၈ ခုနှစ် ဧပြီမှ စက်တင်ဘာအထိ ခြောက်လကို ဘဏ္ဍာနှစ်ကြား ကာလအဖြစ် သတ်မှတ်ထားသည်။
အဆိုပါ ဘဏ္ဍာနှစ်ကြားကာလ ဧပြီမှ ဇူလိုင်လဆန်းအထိ နိုင်ငံခြားရင်းနှီးမြှုပ်နှံမှု လုပ်ငန်းပေါင်း ၄၄ခု ခွင့်ပြု/ အတည်ပြုပေးထားခဲ့ပြီး ရင်းနှီးမြှုပ်နှံမှုပမာဏ အမေရိကန် ဒေါ်လာ ၃၂၅ ဒသမ ၆၇၅ သန်းအထိရှိကြောင်း သိရသည်။
