ဒုံးကျွန်းတစ်ဝိုက်ရေပြင်တွင် အမည်ဖုံးကာ ငါးဖမ်းနေသည့် လှေတစ်စင်းကို တွေ့ရစဉ်
မြိတ်ကျွန်းစုအတွင်း ဒေသခံများနှင့် ပူးပေါင်းစီမံခန့်ခွဲသော အဏ္ဏဝါရေပြင်များ တည်ထောင်ထားသော်လည်း ငါးဖမ်းလှေကြီးများ ဝင်ရောက်ဖမ်းဆီးခြင်း၊ ဖျက်ဆီးခြင်းများ ရှိနေသောကြောင့် ငါးလုပ်ငန်းအဖွဲ့ချုပ် အနေဖြင့် ပူးပေါင်းဆောင်ရွက်ရန် လိုအပ်နေကြောင်း FFI ပရိုဂရမ်မှတာဝန်ရှိသူများက ပြောကြားသည်။
မြိတ်ကျွန်းစုအတွင်း နေထိုင်သော ဒေသခံများ စားဝတ်နေရေး၊ ရေလုပ်ငန်း ရေရှည်တည်တံ့နိုင်ရေးနှင့် သယံဇာတများ ထိန်းသိမ်းနိုင်ရေးအတွက် ရည်ရွယ်ပြီး ဒုံးကျွန်းတန်းတစ်လျှောက်နှင့် စခန်းသစ်ကျေးရွာအပိုင် ရေပြင်များတွင် ဒေသခံများ စီမံခန့်ခွဲခွင့်ရှိသည့် ရေပြင်များကို ငါးလုပ်ငန်းဦးစီးဌာန၏ ညွှန်ကြားချက်အတိုင်း ဆောင်ရွက်နေသော်လည်း အခက်အခဲများ ရင်ဆိုင်နေရကြောင်း သိရသည်။
“မြိတ်ကျွန်းစုအတွင်းမှာ Local Management Area ဒေသခံများနှင့် ပူးပေါင်းစီမံခန့်ခွဲသော အဏ္ဏဝါရေပြင်သုံးနေရာကို ၂၀၁၇ ခုနှစ် မတ် ၃၁ ရက်မှာ ငါးလုပ်ငန်းဦးစီးဌာနရဲ့ ညွှန်ကြားရေးမှူးချုပ်ကနေ လုပ်ပိုင်ခွင့် တရားဝင်ပြဋ္ဌာန်းလိုက်ပါတယ်။ ဒါကြောင့်ဒီနေရာတွေမှာ ထိန်းသိမ်းရေး လုပ်ငန်းတွေ စတင်လုပ်ဆောင်နေပါတယ်။ ဒေသခံတွေကို ကော်မတီတွေ ဖွဲ့ပေးထားတယ်။ နေရာလေးတွေ သတ်မှတ်ပြီး လုပ်ကိုင် ဆောင်ရွက်နေကြတယ်။ ဒါပေမဲ့ ဒီနေရာတွေကို မသိတာလည်း ပါချင်ပါမယ်။ ငါးဝင် ဖမ်းနေတာတွေရှိတယ်။ ဒေသခံတွေအတွက်လည်း ဥပဒေတွေလိုသေးတယ်။ ငါးလုပ်ငန်း ဦးစီးဌာနရဲ့ ဥပဒေနှင့်လည်း ကိုက်ညီဖို့လိုသေးတယ်။ ဒါလေးတွေကို ကျွန်တော်တို့ လုပ်နေတယ်။ တရားဝင်ဖြစ်အောင်လည်း လုပ်ဖို့လိုသေးတယ်။ အဲဒါပြီးရင် ဘယ်လိုအရေးယူမယ်ဆိုတဲ့ အပိုင်းလေးတွေပါလာမယ်။ အဲဒါမသိသေးခင်ကာလမှာ တချို့တွေက ဝင်ပြီးဆွဲတာ ရှိနေတယ်” ဟု မြိတ်ကျွန်းစုအတွင်း ဒေသခံများနှင့် ပူးပေါင်းစီမံခန့်ခွဲသော အဏ္ဏဝါရေပြင်တည်ပေးနေသည့် FFI မှ ဦးဇော်လွန်းက ပြောကြားသည်။
မြိတ်ကျွန်းစုအတွင်း ရေသယံဇာတများ ရှားပါးလာနေပြီး တံငါသည်လေးများမှာ စားဝတ်နေရေးအတွက် လုပ်ကိုင်ရန်ပင် အခက်အခဲရှိလာပြီး ငါးဖမ်းလှေကြီးများမှ ကမ်းနီးဝင်ဆွဲခြင်း၊ သတ်မှတ်ဧရိယာများကို ဝင်ရောက်ဖျက်ဆီးသွားမှုများရှိနေပြီး အရေးယူ ဆောင်ရွက်နိုင်မှု မရှိဖြစ်နေကြောင်း သိရသည်။
ငါးလုပ်ငန်းရှင်များကမူ ကမ်းနီးဝင်ဆွဲခြင်း၊ ငါးခိုးဖမ်းခြင်းများမှာ ငါးဖမ်းလှေပဲ့နင်းများက လုပ်ဆောင်နေခြင်းဖြစ်ပြီး လှေပိုင်ရှင်များ စေခိုင်းထားခြင်းမရှိကြောင်း ပြောကြားသည်။
“အဲဒီတော့ မြန်မာနိုင်ငံငါးလုပ်ငန်း အဖွဲ့ချုပ်၊ မြိတ်ခရိုင်ငါးလုပ်ငန်းအဖွဲ့ချုပ်တွေရဲ့ ပူးပေါင်းဆောင်ရွက်မှုက အင်မတန် အရေးကြီးပါတယ်။ သူတို့ကိုလည်း ကျွန်တော်တို့ အကြိမ်ပေါင်းများစွာ ဆွေးနွေးတာတွေ လုပ်ထားတယ်။ သူတို့လည်း ပူးပေါင်း ဆောင်ရွက်ချင်ပေမယ့် တချို့နေရာတွေမှာ အကြောင်းကြောင်းကြောင့် အခက်အခဲတွေ ရှိနေတယ်။ သတ်မှတ်ဧရိယာတွေမှာ ဗောတွေချထားတယ်။ ဝါးလုံးတွေ၊ ဖော့ပြားလေးတွေနဲ့ အမှတ်အသားတွေ လုပ်ထားပေမယ့် ဝင်ဖျက်ဆီးသွားတာ ရှိနေတယ်။ ဒါတွေကို သူတို့လုပ်ခြင်းအားဖြင့် သူတို့ရဲ့စီးပွားရေးလည်း ထိခိုက်သွားတယ်။ တကယ်တော့ ကျွန်တော်တို့ အဓိကအရေးကြီးတဲ့ နေရာတွေကို ထိန်းသိမ်းထားတာပါ။ ငါးသားပေါက်လေးတွေကြီးလာရင် အပြင်ကိုပြန့်သွားရင် သူတို့လည်း ဖမ်းလို့ရနိုင်တာပဲ။ ရေရှည်ကို မကြည့်ဘဲ ရေတိုတစ်ခုတည်းကိုသာ တွေးပြီး ဝင်ဖမ်းပစ်လိုက်ကြတယ်။ ကျွန်တော်တို့က အားလုံးအကျိုးရှိအောင် လုပ်ပေးနေတာပါ။ ဒါတွေကို နားလည်ဖို့လိုပါတယ်။ ဒါမှလည်း အောင်မြင်မှာပါ။ ဥပဒေလေးတွေနဲ့ တရားဝင်ဖြစ်အောင် လုပ်နေတယ်။ ဥပဒေပိုင်းက ထွက်လာရင် အရေးယူမှုတွေ လုပ်လာနိုင်မှာပါ” ဟု FFI မှ ပရိုဂရမ်မှ ဦးဇော်လွန်းက ပြောကြားသည်။
မြိတ်ကျွန်းစု ရေပြင်အတွင်း ငါးဖမ်းလှေကြီးများ တရားမဝင်ငါးဖမ်းမှုများ လုပ်ဆောင်နေခြင်းအပေါ် လွှတ်တော်ကိုယ်စားလှယ်များကလည်း လွတ်တော်တွင် တင်ပြထားသော်လည်း ယခုအထိ ထူးခြားမှုမရှိသေးကြောင်း သိရသည်။
