မြန်မာနိုင်ငံတွင် မိုဘိုင်းဖုန်းသိပ်သည်းဆမှာ ၁၁၀ ဒသမ ၄၃ ရာခိုင်နှုန်းသို့ ရောက်ရှိလာပြီး မိုဘိုင်းဖုန်း သုံးစွဲနိုင်မှုမှာ နှစ်နှစ်တာ ကာလအတွင်း ၂၂ ရာခိုင်နှုန်း တိုးတက်ခဲ့ကြောင်း ပို့ဆောင်ရေးနှင့် ဆက်သွယ်ရေး ဝန်ကြီးဌာန၏ ထုတ်ပြန်ချက်များအရ သိရသည်။
၂၀၁၆ ခုနှစ် မတ်လတွင် မိုဘိုင်းဖုန်း သုံးစွဲနိုင်မှုမှာ ၈၆ ဒသမ ၂၀ ရာခိုင်နှုန်းသာ ရှိရာမှ ယခု ၂၀၁၈ ခုနှစ်တွင် မိုဘိုင်းဖုန်း သုံးစွဲနိုင်မှုမှာ ၁၁၀ ဒသမ ၄၃ ရာခိုင်နှုန်းသို့ ရောက်ရှိလာခြင်း ဖြစ်ကြောင်း သိရသည်။
ယင်းနှုန်းထားအရ လူ ၁၀၀ လျှင် မိုဘိုင်းဖုန်း ကိုင်ဆောင်နိုင်မှုမှာ ၁၁၀ ခန့်အထိ ရောက်ရှိလာပြီဟု ဆိုသော်လည်း လူဦးရေ သန်း ၅၀ ကျော်စလုံး ကိုင်ဆောင်နိုင်ခြင်း မဟုတ်သေးကြောင်း သိရသည်။ လူတစ်ဦးလျှင် နှစ်လုံး၊ သုံးလုံး ကိုင်ဆောင်မှုများလည်း ရှိနေပြီး ဆက်သွယ်ရေး ဝန်ဆောင်မှု လုံးဝမရောက်ရှိသေးသော ဒေသများစွာလည်း ကျန်ရှိနေသေးကြောင်း သိရသည်။ ခန့်မှန်းတွက်ချက်မှုများအရမူ လူဦးရေ၏ ထက်ဝက်ကျော်ခန့် မိုဘိုင်းဖုန်း ကိုင်ဆောင်အသုံးပြုနိုင်ပြီ ဖြစ်ကြောင်း သိရသည်။
မြန်မာနိုင်ငံ အနေဖြင့် ၂၀၁၄ ခုနှစ်မှစ၍ အူရီဒူး၊ တယ်လီနောစသည့် ပြည်ပဆက်သွယ်ရေး အော်ပရေတာများ ဝင်ရောက်ပြီး နောက်ပိုင်းတွင် မိုဘိုင်းဖုန်း တိုးတက်မှု အများဆုံး ထိပ်ဆုံးငါးနိုင်ငံအတွင်း ဆက်တိုက်ဝင်ရောက်ခဲ့ကာ ၂၀၁၄၊ ၂၀၁၅၊ ၂၀၁၆ ခုနှစ်များအတွင်း အဆိုပါ စာရင်းတွင် ရပ်တည်ခဲ့ကြောင်း သိရသည်။ သို့သော် ၂၀၁၇ ခုနှစ်တွင်မူ မိုဘိုင်းဖုန်း တိုးတက်မှု အများဆုံးနိုင်ငံ စာရင်းတွင် ဆက်လက်ပါဝင်ခြင်း မရှိတော့ဘဲ တည်ငြိမ်သော အနေအထားတစ်ခုသို့ ရောက်ရှိခဲ့ကြောင်း သိရသည်။
မိုဘိုင်းဖုန်းကွန်ရက် လွှမ်းခြုံမှုမှာ MPT က ၉၀ ဒသမ ၀၁ ရာခိုင်နှုန်း၊ တယ်လီနောက ၈၉ ဒသမ ၆ ရာခိုင်နှုန်းနှင့် အူရီဒူးက ၉၀ ဒသမ ၅ ရာခိုင်နှုန်း အသီးသီး ရှိနေကြောင်း သိရသည်။
ဆက်သွယ်ရေး အော်ပရေတာများ အနေဖြင့် 4G ကွန်ရက်ကို တိုးချဲ့နေသည်ဟု ဆိုသော်လည်း ၂၀၁၈ ခုနှစ်အတွင်း ထူးခြားချက်အနေဖြင့် ယခင်က 3G,4G ကွန်ရက်များကိုသာ ဝန်ဆောင်မှု ပေးနေသည့် အူရီဒူးအနေဖြင့် 2G ကွန်ရက်ကိုပါ သုံးစွဲနိုင်စေရန် ပြန်လည်လုပ်ဆောင် ပေးခဲ့ခြင်းဖြစ်သည်။ ယင်းမှာ ကျေးလက်ဒေသများနှင့် တန်ဖိုးနည်း ဟန်းဆက်များကိုသာ ကိုင်ဆောင်သူများအတွက် သက်ရောက်မှု ရှိစေခဲ့သည်။
ထို့ပြင် ဖိုင်ဘာကေဘယ်လ် ကွန်ရက်များမှာ ၂၀၁၅-၂၀၁၆ ခုနှစ်တွင် ကီလိုမီတာ ၂၃၄၀၀ ရှိရာမှ လက်ရှိတွင် ကီလိုမီတာ ၄၂၂၀၀ ကျော်ရှိလာကြောင်း သိရသည်။
