ကာကွယ်ဆေးထိုးနှံရန် ပြင်ဆင်နေသည့် ကျန်းမာရေးဝန်ထမ်းအား တွေ့ရစဉ် (ဓာတ်ပုံ-ကြည်နိုင်)
လာမည့် ၂၀၁၉ ခုနှစ်မှစ၍ ကျန်းမာရေးနှင့် အားကစားဝန်ကြီးဌာနက လုပ်ဆောင်ပေးနေသည့် ကာကွယ်ဆေးထိုးအစီအစဉ်တွင် သားအိမ်ခေါင်းကင်ဆာရောဂါ ကာကွယ်ဆေးကို ထည့်သွင်းပြီး အသက်ကိုးနှစ်မှ ၁၃ နှစ်ဝန်းကျင် အမျိုးသမီးငယ်များကို အခမဲ့ထိုးနှံပေးနိုင်ရန် စီစဉ်နေကြောင်း ကျန်းမာရေးနှင့် အားကစားဝန်ကြီးဌာနမှ သိရသည်။
“သားအိမ်ခေါင်းကင်ဆာ ကာကွယ်ဆေးထိုးဖို့အတွက် အသက်အပိုင်းအခြားကို မဆုံးဖြတ်ရသေးဘူး။ ပုံမှန်အားဖြင့် နိုင်ငံတကာမှာ လုပ်ကြတာသည် အသက်ကိုးနှစ်က ၁၃ နှစ်အတွင်းကို ကာကွယ်ဆေးထိုးကြတယ်။ ဒီနိုင်ငံမှာ ဘယ်အသက်အရွယ်တွေ စထိုးပေးမလဲဆိုတာတော့ အခုလတ်တလောမှာ သတ်သတ်မှတ်မှတ် မဆုံးဖြတ်ရသေးပါဘူး။ ကိုယ့်နိုင်ငံနဲ့ အဆင်ပြေမယ့် အသက်အပိုင်းအခြားကို ရွေးချယ်သွားမယ်။ နောက်ပြီး သားအိမ်ခေါင်းကင်ဆာနဲ့ပတ်သက်လို့ ငါးနှစ်စီမံကိန်း တစ်ခုလုပ်နေတယ်။ အဲဒီမှာလည်း အစုံပါမယ်။ ကင်ဆာလူနာတွေကို ဆေးကုသမှုအပိုင်း၊ ကာကွယ်မှုအပိုင်းအပြင် ပြုစုကုသမှုအပိုင်းတွေကိုပါ ထည့်သွင်းလုပ်ဆောင်သွားဖို့ ရှိပါတယ်” ဟု ကျန်းမာရေးနှင့် အားကစားဝန်ကြီးဌာနမှ တာဝန်ရှိသူတစ်ဦးက ပြောကြားသည်။
မြန်မာနိုင်ငံတွင် သားအိမ်ခေါင်းကင်ဆာ အဖြစ်အများဆုံး အသက်အပိုင်းအခြားမှာ အသက်အုပ်စု ၅၀ မှ ၅၉ နှစ်အကြား ဖြစ်နေကြောင်း ၂၀၁၆ ခုနှစ်အတွင်းက ဆေးသုတေသနဦးစီးဌာန၊ ဗဟိုအမျိုးသမီးဆေးရုံကြီးနှင့် ရန်ကုန်အရှေ့ပိုင်းဆေးရုံကြီးတို့ ပူးပေါင်းပြုလုပ်ခဲ့သည့် ကျန်းမာရေးသုတေသနစာတမ်း၏ ရလဒ်များအရ သိရသည်။
၂၀၁၆ ခုနှစ်အတွင်း ရန်ကုန်ဗဟိုအမျိုးသမီးဆေးရုံကြီးနှင့် ရန်ကုန်အရှေ့ပိုင်းဆေးရုံကြီးမှ အသက် ၂၀ မှ ၇၉ နှစ်အတွင်း သားအိမ်ခေါင်းကင်ဆာရောဂါဟု အတည်ပြုထားသော သားအိမ်ခေါင်းကင်ဆာရောဂါရှင် အမျိုးသမီး ၁၀၆ ဦးအား စမ်းသပ်လေ့လာခဲ့ကြောင်း၊ ထိုအမျိုးသမီးများမှ ၉၇ ဦး (၉၁ ဒသမ ၅ ရာခိုင်နှုန်း) တွင် သားအိမ်ခေါင်းကင်ဆာ စစ်ဆေးထားခြင်း ရာဇဝင်မရှိသည်ကို တွေ့ရကြောင်းနှင့် သုတေသနပြုလုပ်ချက်အရ သားအိမ်ခေါင်းကင်ဆာရောဂါအဖြစ် အများဆုံးအသက်အပိုင်းအခြားမှာ အသက်အုပ်စု ၅၀ မှ ၅၉ နှစ်အတွင်း ၃၄ ဒသမ ၉ ရာခိုင်နှုန်းရှိပြီး အသက် ၄၀ မှ ၄၉ နှစ်တွင် ၂၆ ဒသမ ၄ ရာခိုင်နှုန်း၊ အသက် ၆၀ မှ ၆၉ နှစ်တွင် ၂၀ ဒသမ ၈ ရာခိုင်နှုန်း၊ အသက် ၃၀ မှ ၃၉ နှစ်တွင် ၈ ဒသမ ၅ ရာခိုင်နှုန်း၊ အသက် ၇၀ မှ ၇၉ နှစ်တွင် ၇ ဒသမ ၅ ရာခိုင်နှုန်းနှင့် အသက် ၂၀ မှ ၂၉ နှစ်တွင် ၁ ဒသမ ၉ ရာခိုင်နှုန်းတို့ဖြစ်ကြောင်း သိရသည်။
သားအိမ်ခေါင်းကင်ဆာရောဂါနှင့် ပတ်သက်၍ ၂၀၁၄ ခုနှစ်အတွင်းက အမျိုးသမီးမျိုးပွားအင်္ဂါဆိုင်ရာ အထူးကုဆရာဝန်ကြီးများမှ ရန်ကုန်ပြည်သူ့ဆေးရုံကြီး၊ ဗဟိုအမျိုးသမီးဆေးရုံကြီးအပါအဝင် အခြားပြည်နယ်နှင့် တိုင်းဒေသကြီးများရှိ ဆေးရုံကြီးများတွင် ကျန်းမာရေးသုတေသနစစ်တမ်းများ ပြုလုပ်ခဲ့ဖူးကြောင်းနှင့် မြန်မာနိုင်ငံတွင် ၂၀၀၂ ခုနှစ်က မြန်မာ့မျိုးပွားကျန်းမာရေးမူဝါဒကို စတင်ရေးဆွဲလုပ်ဆောင်ခဲ့ပြီး ၂၀၁၄-၂၀၁၈ ခုနှစ် ငါးနှစ်တာမဟာဗျူဟာစီမံကိန်းတွင် မြန်မာနိုင်ငံတွင် အဖြစ်များလာသည့် သားအိမ်ခေါင်းကင်ဆာရောဂါ ကာကွယ်ရေးကိုပါ ထည့်သွင်းလုပ်ဆောင်ခဲ့ကြောင်းနှင့် တစ်နှစ်လျှင် မြန်မာအမျိုးသမီးဦးရေ ငါးသိန်းအထက်မှာ သားအိမ်ခေါင်းကင်ဆာဖြစ်ပွားနေပြီး ရောဂါဖြစ်ပွားမှု၏ ထက်ဝက်ကျော်မှာ သေဆုံးနေကြောင်း သိရသည်။
မြန်မာအမျိုးသမီးများတွင် ဖြစ်ပွားမှုအများဆုံး ကင်ဆာများမှာ ရင်သား၊ သားအိမ်ခေါင်း၊ အစာအိမ်၊ အဆုတ်၊ အူမကြီး၊ အသည်းနှင့် အစာရေမျိုကင်ဆာများဖြစ်ပြီး သေဆုံးမှုအများဆုံး ကင်ဆာများမှာ အဆုတ်၊ အစာအိမ်၊ ရင်သား၊ သားအိမ်ခေါင်း၊ အသည်း၊ အစာရေမျိုနှင့် အူမကြီးကင်ဆာများဖြစ်ကြောင်း၊ သားအိမ်ခေါင်းကင်ဆာသည် မြန်မာနိုင်ငံတွင်သာမက ကမ္ဘာ့နိုင်ငံများတွင်လည်း ဖြစ်ပွားမှုအများဆုံးကင်ဆာများတွင် ပါဝင်နေခြင်းကြောင့် ဖွံ့ဖြိုးပြီးနိုင်ငံများတွင် အသက်ကိုးနှစ်မှ ၁၃ နှစ်အတွင်းရှိ အမျိုးသမီးငယ်ကို ကြွက်နို့ရောဂါကာကွယ်ဆေး (HPV Vaccine) ထိုးပေးခြင်းဖြင့် ကြိုတင်ကာကွယ်ကြကြောင်းနှင့် ဖွံ့ဖြိုးပြီးနိုင်ငံများတွင် အသက်၂၀ မှ ၆၀ အရွယ်ကြား အမျိုးသမီးများကို သုံးနှစ်တစ်ကြိမ် စစ်ဆေးလေ့ရှိကြောင်း သိရသည်။
