၂၀၁၆ ခုနှစ် စက်တင်ဘာ ၅ ရက်က မင်ဒါနာအိုကျွန်းစု၊ ဆူးလူးပြည်နယ်ရှိ စစ်စခန်းထဲတွင် စောင့်ကြပ်နေသော ဖိလစ်ပိုင်စစ်သားများ (Photo: AFP)

ဖိလစ်ပိုင်နိုင်ငံတောင်ပိုင်း၌ အစ္စလာမ္မစ်စစ်သွေးကြွများ၏ ဖမ်းဆီးခြင်းကို ခံခဲ့ရသော အမျိုးသားသုံးဦးသည် ၎င်းတို့ကိုဖမ်းဆီးထားသူများ ဝတ်ပြုနေစဉ် ထွက်ပြေးနိုင်ခဲ့ကြကြောင်း ရဲတပ်ဖွဲ့က သြဂုတ် ၁၂ ရက်တွင် ထုတ်ပြန်ခဲ့သည်။ ထိုအမျိုးသားများအတွက် တောင်းထားသည့်ပြန်ပေးငွေကို ငွေအတုများဖြင့် ပေးရန်စီစဉ်မှုသည် မအောင်မြင်ခဲ့ပြီးနောက် ယခုကဲ့သို့ ထွက်ပြေးခဲ့ကြခြင်းဖြစ်သည်။ ထိုသုံးဦးအတူ ထွက်ပြေးခဲ့သောလည်း ဆန့်ကျင်ဘက်အရပ်သို့ ပြေးခဲ့သည့် စတုတ္ထမြောက်အမျိုးသားမှာမူ ထွက်ပြေးလွတ်မြောက်သွားခြင်း ရှိ၊ မရှိနှင့် ပြန်အဖမ်းခံခဲ့ရခြင်း ဖြစ်၊ မဖြစ် မသိရသေးပေ။

အဘူဆေယက်စစ်သွေးကြွများသည် လွန်ခဲ့သည့် သီတင်းလေးပတ်က ဆောက်လုပ်ရေးလုပ်သားများကို ပြန်ပေးဆွဲသွားခဲ့ပြီး ဝေးလံခေါင်သီသော တောတွင်းထဲ၌ နိုင်ငံခြားသားအချို့အပါအဝင် အခြားသောဓားစာခံ တစ်ဒါဇင်ကျော်နှင့်အတူ ဖမ်းဆီးထားခဲ့သည်။

အဘူဆေယက်တို့သည် ထိုဆောက်လုပ်ရေး အလုပ်သမားများအတွက် ပြန်ပေးငွေအဖြစ် ငွေအမြောက်အမြားကို သြဂုတ် ၁၀ ရက်ကရရှိခဲ့သည်။ သို့သော်လည်း ထိုပိုက်ဆံများမှာ အတုဖြစ်ကြောင်း သိရှိသွားသည့်အတွက် ဓားစာခံများကို ပြန်လွှတ်ပေးခဲ့ခြင်းမရှိခဲ့ကြောင်း ဒေသဆိုင်ရာ ရဲချုပ်ရူဘင်ဆင်းဒစ်က ပြောကြားခဲ့သည်။ “ပြန်ပေးသမားတွေဟာ နေ့လယ်ပိုင်းဝတ်ပြုနေတဲ့အချိန်မှာ ဓားစာခံတွေဟာ အခွင့်ကောင်းယူပြီး ထွက်ပြေးခဲ့ကြတာဖြစ်ပါတယ်။ ဒါပေမဲ့ ပြန်ပေးဆွဲသူတွေဟာ သေနတ်နဲ့ပစ်ပြီး လိုက်လံဖမ်းဆီးခဲ့ပါတယ်” ဟု ၎င်းကဆိုသည်။ ထွက်ပြေးလာသူသုံးဦးကို သြဂုတ် ၁၁ ရက်အစောပိုင်းတွင် ဂျိုလိုရှိတာလီပါအိုမြို့အနီး၌ ကျေးရွာအရာရှိတစ်ဦးက တွေ့ရှိခဲ့ခြင်းဖြစ်ပြီး တစ်ဦး၏ဦးခေါင်းတွင် သေနတ်ဒဏ်ရာရထားသော်လည်း အသက်အန္တရာယ်မရှိခဲ့ပေ။ ပြန်ပေးသမားတို့ကို မည်သူက ပိုက်ဆံအတုများပေးခဲ့သည်ကိုမသိဟု ရဲချုပ်ဆင်းဒစ်ကဆိုသည်။ ဖိလစ်ပိုင်အစိုးရသည် ပြန်ပေးဆွဲသည့်သူများကို ငွေမပေးရန်မူဝါဒကို ကျင့်သုံးနေပြီး အဘူဆေယက်တို့ကလည်း ဓားစာခံတို့၏ အလုပ်ရှင် သို့မဟုတ် မိသားစုများကို တိုက်ရိုက်ဆက်သွယ်လေ့ရှိသည်။

Ref: AFP