ဇန်နဝါရီ ၃ ရက်က ကိဗ်မြို့တွင် ဂျာမနီနိုင်ငံခြားရေးဝန်ကြီး (ဝဲ)အား နှုတ်ဆက်နေသော ယူကရိန်းနိုင်ငံခြားရေးဝန်ကြီး (Photo: AFP)

ရုရှားတွင် ၂၀၁၈ ခုနှစ် မတ်၌ သမ္မတ ရွေးကောက်ပွဲမကျင်းပမီ ယူကရိန်းအရှေ့ပိုင်းတွင် ကုလသမဂ္ဂ လက်နက်ကိုင်ငြိမ်းချမ်းရေး ထိန်းသိမ်းမှုမစ်ရှင် ချထားနိုင်ရန်အတွက် လိုလားကြောင်း ဂျာမနီနိုင်ငံခြားရေးဝန်ကြီး ဆစ်ဂ်မာဂါဘရီရယ်က ဇန်နဝါရီ ၃ ရက်တွင် ပြောကြားခဲ့သည်။

စစ်ပွဲဒဏ်ခံစားနေရသော ဆိုဗီယက်ယူနီယံမှ ခွဲထွက်နိုင်ငံဟောင်း ယူကရိန်းတွင် ပိုင်နက်တည်တံ့ခိုင်မြဲရေးအတွက် ယင်းကဲ့သို့ တပ်ဖွဲ့ဝင်များသည် အလွန်အမင်းအရေးပါကြောင်း ယူကရိန်းနိုင်ငံခြားရေးဝန်ကြီး ပက်ဗ်လိုကလင်ကင်နှင့် ကိဗ်မြို့တွင် တွေ့ဆုံ ဆွေးနွေးခဲ့ပြီးနောက် ဂါဘရီရယ်က ပြောကြားခဲ့သည်။ ယင်းတပ်ဖွဲ့သည် ပဋိပက္ခဇုန် နယ်မြေတစ်ခုလုံးတွင် ချထားရမည့် အားကောင်းသော လက်နက်ကိုင်မစ်ရှင် ဖြစ်ရမည်ဖြစ်ကြောင်း ၎င်းက ပြောကြားခဲ့သည်။

၂၀၁၄ ခုနှစ် ဧပြီတွင် စတင်ဖြစ်ပွားခဲ့ပြီးနောက်ပိုင်း သေဆုံးသူ ၁၀၀၀၀ ကျော်ရှိလာခဲ့ပြီး မော်စကိုနှင့် အနောက်တိုင်းတို့အကြား စစ်အေးခေတ်နောက်ပိုင်း ဆက်ဆံရေး အဆိုးရွားဆုံး ကျဆင်းခဲ့ရသည့် ယူကရိန်း လက်နက်ကိုင်ပဋိပက္ခ၌ မည်သည့်ပါဝင်ပတ်သက်မှုမျှမရှိဟု ရုရှားက ငြင်းဆိုခဲ့သည်။ သို့သော် ၎င်း၏အနောက်ဘက်အိမ်နီးချင်း ယူကရိန်းတွင် ပြည်ပလက်နက်ကိုင်တပ်များ ချထားမည့်အရေးကို မော်စကိုက ပြင်းပြင်းထန်ထန် ဆန့်ကျင်ခဲ့သည်။

မတ် ၁၈ ရက်တွင်ကျင်းပမည့် သမ္မတ ရွေးကောက်ပွဲ၌ စတုတ္ထမြောက်သက်တမ်း အတွက် အနိုင်ရရန် အခြေအနေကောင်းနေသော ပူတင်က ခွဲထွက်ရေးလိုလားသည့် ယူကရိန်းသူပုန်များ ထိန်းချုပ်ထားသည့်နေရာများနှင့် ယူကရိန်း၏ ကျန်ရှိဒေသများအား ခွဲခြားထားသည့် ရှေ့တန်းနေရာတစ်လျှောက် လက်နက်ကိုင် ငြိမ်းချမ်းရေးထိန်းသိမ်းမှု မစ်ရှင်ကို ဆောင်ရွက်ရန်သာ ထောက်ခံခဲ့သည်။ ထို့ပြင် ကိဗ်၏ထိန်းချုပ်မှုအောက်မရှိသော ယူကရိန်းနှင့် ထိစပ်နေသည့်နယ်စပ်၏ အခြားအစိတ်အပိုင်းများတစ်လျှောက် ကုလသမဂ္ဂ လက်နက်ကိုင်ငြိမ်းချမ်းရေး တပ်ဖွဲ့ဝင်များအား ချထားမှုကိုမူ ပူတင်က ပြတ်ပြတ်သားသား ပယ်ချခဲ့သည်။

သို့သော် ဥရောပတွင် စစ်ပွဲဖြစ်နေသည့် တစ်ခုတည်းသောနိုင်ငံဖြစ်သည့် ယူကရိန်းအတွက် ကာလရှည်ကြာ စွန့်ပစ်ခံထားရသော ၂၀၁၅ ခုနှစ် ငြိမ်းချမ်းရေးအစီအစဉ်ကို စေ့စပ်ညှိနှိုင်းရာတွင် ပြင်သစ်နှင့်အတူ ကူညီနေသည့် ဂါဘရီရယ်က ရုရှားသမ္မတ ရွေးကောက်ပွဲများသည် ယူကရိန်းတွင် ငြိမ်းချမ်းရေးထိန်းသိမ်းမှု မစ်ရှင်ချထားမည့်ကိစ္စ ဆွေးနွေးရာ၌ အကြောင်းအရာတစ်ခု မဖြစ်သင့်ကြောင်း ပြောကြားခဲ့သည်။

ယူကရိန်းထံ ပထမဆုံးအကြိမ်အဖြစ် စွမ်းရည်မြင့် တင့်ကားဖျက်ဒုံးများ ပေးပို့ရန် အမေရိကန်က ဆုံးဖြတ်ချက်ချခဲ့မှုကြောင့် မော်စကို၏ ဒေါသမြင့်တက်နေချိန်တွင် ဂါဘရီရယ်က ယူကရိန်းသို့ သွားခဲ့ခြင်းဖြစ်သည်။ ယင်းလက်နက်များအား ကာကွယ်ရေး အတွက်သာ အသုံးပြုမည်ဖြစ်ပြီး စစ်ပွဲအရှိန် မြင့်တက်စေရန် အသုံးပြုမည်မဟုတ်ကြောင်း ယူကရိန်းက ကတိပြုခဲ့သည်။

Ref: AFP