လူကြောင့် ဖြစ်ပွားသော ဘေးအန္တရာယ်များသည် သဘာဝဘေးအန္တရာယ်များနှင့် မတူဘဲ လူတို့၏ ရည်ရွယ်မှု သို့မဟုတ် ပေါ့ဆမှုကြောင့် ဖြစ်ပွားပြီး လူသားတို့ ထိခိုက်ဆုံးရှုံးရမှုနှင့် ပတ်ဝန်းကျင် ထိခိုက်ပျက်စီးမှုတို့ကို ဖြစ်စေသည်။ စီမံခန့်ခွဲမှု မလုံလောက်ခြင်းကြောင့် ဘေးအန္တရာယ်များ ဖြစ်ပွားပြီး လူသားတို့၏ အသက်အိုးအိမ်စည်းစိမ်များ ထိခိုက် ပျက်စီးရခြင်းနှင့် နိုင်ငံ၏ စီးပွားရေးနှင့် ကုန်ထုတ်စွမ်းအားကို ရေရှည်ထိခိုက်စေခြင်းတို့ ဖြစ်ရသည်။ လူကြောင့် ဖြစ်ပွားသော ဘေးအန္တရာယ်များအနက် ရေလှောင်တမံများ ချွတ်ယွင်းမှုသည် တစ်ခုအပါအဝင်ဖြစ်သည်။ ရေလှောင်တမံများ ချွတ်ယွင်းမှု သို့မဟုတ် ရေကာတာများ ကျိုးပေါက်မှုတို့သည် ကြိုတင်သတိပေးနိုင်မှု နည်းပါးပြီး လူအများအပြားကို ထိခိုက်ပျက်စီးစေနိုင်သည်။ ယင်းချွတ်ယွင်းမှုများ ဖြစ်ပွားရခြင်း အကြောင်းရင်းများထဲတွင် ငလျင်နှင့် မိုးသည်းထန်စွာ ရွာသွန်းခြင်းကဲ့သို့သော သဘာဝကြောင့် ဖြစ်ပွားမှုများ ပါဝင်သကဲ့သို့ အင်ဂျင်နီယာတို့၏ ဒီဇိုင်းချွတ်ယွင်းမှုနှင့် ထိန်းသိမ်းရေး ညံ့ဖျင်းမှုကဲ့သို့သော လူကြောင့် ဖြစ်ပွားမှုများလည်း ပါဝင်သည်။
မြန်မာနိုင်ငံတွင် ကြီးမားသော ရေလှောင်တမံ သို့မဟုတ် ဆည်ကြီးများ ၂၀၀ ခန့် ရှိသည်။ ၎င်းတို့ထဲမှ များစွာသည် ချွတ်ယွင်းမှုဖြစ်ပွားပါက လူတို့၏ အသက်အိုးအိမ်စည်းစိမ်ကို ထိခိုက်စေနိုင်သည်။ မကြာသေးမီအကျဆုံး ဖြစ်ပွားသည့် ရေလှောင်တမံ ချွတ်ယွင်းမှုမှာ သြဂုတ် ၂၉ ရက်က ဖြစ်ပွားသော ဆွာချောင်းရေလှောင်တမံမှ ရေမြောင်းလက်တံ ပြိုကျမှုဖြစ်သည်။ ဆွာချောင်းရေလှောင်တမံမှ ရေမြောင်းလက်တံ ပြိုကျခြင်းကြောင့် ဆွာချောင်းတံတား တစ်ပေခွဲခန့် နိမ့်ဆင်းလျက် ရေကြီးမှုကြောင့် ပဲခူးတိုင်း တောင်ငူခရိုင်တွင် တစ်ဦး သေဆုံးကာ ခြောက်ဦး ပျောက်ဆုံးနေပြီး ခြောက်သောင်းကျော် ရေဘေးသင့်ခဲ့ကြောင်း ပဲခူးတိုင်းဒေသကြီး ရေတာရှည်မြို့နယ် တိုင်းဒေသကြီးလွှတ်တော်ကိုယ်စားလှယ် ဒေါက်တာကျော်ကျော်က ပြောကြားခဲ့သည်။ သြဂုတ် ၂၉ ရက် နံနက် ၇ နာရီမှ စတင်၍ ဆွာချောင်းရေလှောင်တမံမှ ရေများအရှိန်ဖြင့် စီးဆင်းလာမှုကြောင့် ရန်ကုန်-မန္တလေး အမြန်လမ်းပေါ်တွင် နှစ်ပေခန့် ရေကျော်မှု ဖြစ်ပွားခဲ့ပြီး ဆွာချောင်းတံတားဘက်ခြမ်း တံတားတိုင် RP 1 သည် တစ်ပေခွဲခန့် နိမ့်ကျခဲ့ကြောင်း၊ ထို့ပြင် ရန်ကုန်-မန္တလေး လမ်းဟောင်း မိုင်တိုင်အမှတ် (၁၉၉/၄) တွင်လည်း ရေနှစ်ပေကျော်လျက်ရှိကြောင်း ဆောက်လုပ်ရေးဝန်ကြီးဌာနက ထုတ်ပြန်သည်။
ထို့ကြောင့် လူတို့အနေဖြင့် မိမိသည် ရေလှောင်တမံတစ်ခု၏ ရေစုန်ပိုင်း၌ နေထိုင်သလား၊ ယင်းရေလှောင်တမံသည် ဘေးအန္တရာယ်ဖြစ်နိုင်ခြေ မြင့်မားသလား ဟူသည်ကို သိရှိရန် လိုအပ်လာသည်။ မိမိအနေဖြင့် ရေလှောင်တမံတစ်ခု၏ အောက်ဘက် ရေစုန်ပိုင်းတွင် နေထိုင်ပြီး ယင်းရေလှောင်တမံသည် ဘေးအန္တရာယ်ဖြစ်နိုင်ခြေ မြင့်မားကြောင်း တွေ့ရှိရပါက အရေးပေါ် စီမံခန့်ခွဲရေးအဖွဲ့များဆီသို့ အသိပေး တိုင်ကြားရန်ပင် လိုအပ်၍လာသည်။ ရေလှောင်တမံ ချွတ်ယွင်းမှု ဖြစ်ပေါ်ခြင်း သို့မဟုတ် ဖြစ်ပေါ်လုဆဲဆဲ အနေအထား၌ရှိခြင်းတို့ ပေါ်ပေါက်သည့်အခါ အန္တရာယ်သက်ရောက်နိုင်ခြေရှိသော နေရာများ၌ နေထိုင်သူများကို ဖယ်ရှားရန် လိုအပ်ပြီး အန္တရာယ်ကင်းစွာ ဖယ်ရှားနိုင်ရေး လမ်းကြောင်းကို တွက်ဆထားရန်လိုသည်။ အထွေထွေသဘောအရ လူများကို ဘေးကင်းလုံခြုံစွာ ဖယ်ရှားရေး အစီအစဉ်နှင့် အကောင်အထည်ဖော်မှုသည် နိုင်ငံတော်အစိုးရနှင့် ဒေသခံအာဏာပိုင်များ၏ တာဝန်ဖြစ်သည်။
မည်သို့ပင်ဆိုစေကာမူ ရေလှောင်တမံ ချွတ်ယွင်းမှု အပါအဝင် လူကြောင့် ဖြစ်ပွားသော ဘေးအန္တရာယ်များသည် ကောင်းမွန်သော စီမံခန့်ခွဲမှုဖြင့် အထိုက်အလျောက် ကာကွယ်နိုင်သည့်ကိစ္စများဖြစ်ပြီး ကြိုတင်စီမံထားမှု ကောင်းမွန်ပါက ထိခိုက်ဆုံးရှုံးရမှု ပမာဏ နည်းပါးနိုင်ပါကြောင်း The Daily Eleven သတင်းစာက ရေးသားအပ်ပါသည်။
သြဂုတ်လ ၃၁ ရက်နေ့ထုတ် The Daily Eleven သတင်းစာ အယ်ဒီတာ့အာဘော်
