ဓမ္မဓိဋ္ဌာန်ကျစွာ ကောင်းမွန်သည့် ကိုယ်ရည်ကိုယ်သွေးရှိခြင်းကဲ့သို့သော အရာမျိုးသည် အမှန်တကယ်၌ မရှိပါ။ လူတိုင်းလူတိုင်းသည် ကွဲပြားခြားနားသည့် လူအမျိုးအစားများကို သဘောကျတတ်ကြသည်။ အဓိကအချက်မှာ မိမိကိုယ်မိမိ ဂုဏ်ယူနိုင်ပြီး ယုံကြည်မှုရှိသည့် ကိုယ်ရည်ကိုယ်သွေးမျိုး တည်ဆောက်ရန်ပင် ဖြစ်သည်။ မိမိသဘောကျသည့်လူမျိုးကို ဆွဲဆောင်နိုင်မည့် ကိုယ်ရည်ကိုယ်သွေးတစ်ရပ်ကို အလိုရှိမည်ဖြစ်သည်။ ကောင်းမွန်သည့် ကိုယ်ရည်ကိုယ်သွေး တည်ဆောက်ရန် အချို့သောအချက်များက အရေးပါသည်။
ပျော်ပျော်ရွှင်ရွှင်နှင့် ပေါ့ပေါ့ပါးပါး ရှိနေပါစေ- ကမ္ဘာလောကကြီး၌ ပျော်ရွှင်မှုကို မြင်နိုင်အောင် ကြိုးစားပါ။ အခြားသူများနှင့်အတူ ရယ်မောပါ။ သို့သော် အခြားသူများကို ရယ်သွမ်းသွေးခြင်း မပြုပါနှင့်။ လူတိုင်းသည် ပျော်ပျော်ရွှင်ရွှင် ရယ်ရယ်မောမော နေတတ်သူများကို သဘောကျကြသည်။ ပြုံးခြင်းနှင့် ရယ်ခြင်းကို များစွာပြုလုပ်ခြင်းသည် ကောင်းမွန်သော ကိုယ်ရည်ကိုယ်သွေးရှိခြင်း၏ ကြီးမားသော အစိတ်အပိုင်းတစ်ရပ် ဖြစ်သည်။
တင်းမာသည့် အခြေအနေရပ်များ၌ တည်ငြိမ်စွာ နေနိုင်အောင် ကြိုးစားပါ- လူအများအပြားကို အရေးပေါ်အနေအထား သို့မဟုတ် တင်းမာသည့် အနေအထားတစ်ရပ်၌ မတွေ့မြင်ရမီအထိ ၎င်းတို့၌ ကောင်းမွန်သော ကိုယ်ရည်ကိုယ်သွေး ရှိသည်ဟု ထင်ရ၏။ သို့သော် ဖော်ပြပါ အနေအထားတို့၌ ၎င်းတို့၏ တည်ငြိမ်အေးဆေးမှု ပျောက်ဆုံး၍ သွားတတ်သည်။ ယင်းကဲ့သို့သောလူမျိုး မဖြစ်ပါစေနှင့်။ တင်းကျပ်သည့် အနေအထားတစ်ရပ်သို့ ရောက်ရှိနေပါက စိတ်ကို ဖြေလျှော့၍ထားပြီး တွေ့ကြုံနေရသည့် အနေအထားကို ဖြေရှင်းနိုင်မည့် နည်းလမ်းကို ရှာဖွေပါ။ တင်းကျပ်သည့် အနေအထားတစ်ရပ်သို့ ရောက်ရှိသွားပါက ဆူပူအော်ဟစ်ခြင်း မပြုပါနှင့်။ ယင်းသည် မည်သည့်အရာကိုမျှ ပြန်လည် နေသားကျစေခြင်း မရှိနိုင်ပါ။ မိမိ၏စိတ်ကို ရှင်းလင်းစွာထားပြီး ပြဿနာကို ဖြေရှင်းရန် အစီအစဉ် ဖွံ့ဖြိုးလာအောင် ပြုလုပ်ပါ။
စိတ်ကို အမြဲဖွင့်ထားပါ- ကောင်းမွန်သော ကိုယ်ရည်ကိုယ်သွေး ရှိခြင်းနှင့် ပတ်သက်၍ အစိတ်အပိုင်းတစ်ရပ်မှာ မိမိ၏ လောကအမြင်ကို ပြောင်းလဲပစ်ရန် ဆန္ဒရှိခြင်းဖြစ်သည်။ အခြားသူများကို နားစွင့်ထားပြီး မိမိစိတ်ကို ပြောင်းလဲရန် အမြဲတမ်း ဆန္ဒရှိနေပါစေ။ အခြားသူများကို အလျင်စလို ဝေဖန်ဆုံးဖြတ်ခြင်း မပြုပါနှင့်။ ၎င်းတို့သည် မိမိနှင့် ကွဲပြားခြားနားသော နည်းလမ်းအားဖြင့် ပြုမူ လုပ်ဆောင်တတ်သောကြောင့် ဖြစ်သည်။ စိတ်ကိုဖွင့်ထားခြင်းသည် မိတ်ဆွေသစ်များ တိုးပွားစေပြီး ပို၍စိတ်ဝင်စားဖွယ်ကောင်းသော ဘဝမျိုးကို ရရှိစေသည်။ ကမ္ဘာကြီး၏ မည်သည့်အစိတ်အပိုင်းကိုမျှ ပိတ်ပစ်ရန် မလိုအပ်ပါ။
ကြွားဝါ ပလွှားခြင်းမပြုဘဲ ရိုးရိုးကုပ်ကုပ်သာ နေထိုင်ပါ- မိမိသည် ကမ္ဘာပေါ်တွင် အစွမ်းအစ အရှိဆုံး၊ အထူးခြားဆုံး လူတစ်ဦး ဖြစ်ကောင်း ဖြစ်နိုင်သော်လည်း ရိုးရိုးကုပ်ကုပ် နေထိုင်ခြင်း မပြုပါက ကောင်းမွန်သည့် ကိုယ်ရည်ကိုယ်သွေး ရရှိလာမည် မဟုတ်ပါ။ အမြဲတမ်း မိမိကိုယ်မိမိ နှိမ့်ချလျက် ထိန်းညှိတတ်ရန် လိုအပ်သည်။ စိတ်ကြီးဝင်နေသူများကို မည်သူမျှ နှစ်သက်မည် မဟုတ်ပါ။
မည်သို့ပင်ဆိုစေကာမူ ဘဝ၌ ကြီးမားသော အောင်မြင်မှုများ ရရှိရန်အတွက် ကောင်းမွန်သော ကိုယ်ရည်ကိုယ်သွေးတစ်ရပ်သည် မဖြစ်မနေ လိုအပ်မည်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။
(ဧပြီ ၇ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)
