နိုင်ငံတစ်နိုင်ငံနှင့် သက်ဆိုင်သော ကိုယ်ပိုင်အမှတ်လက္ခဏာ သို့မဟုတ် သိမြင်မှုကို နိုင်ငံ၏ကိုယ်ပိုင်အမှတ်လက္ခဏာဟု ခေါ်ဆိုခြင်းဖြစ်သည်။ ကွဲပြားခြားနားသော ဓလေ့ထုံးတမ်းများ၊ ယဉ်ကျေးမှုများ၊ ဘာသာစကားများနှင့် နိုင်ငံရေးတို့က ကိုယ်စားပြုလျက် တစ်ခုလုံးကို ပေါင်းစည်းမှုတစ်ရပ်အဖြစ် နိုင်ငံတစ်နိုင်ငံဟု သိမြင်ခြင်းဖြစ်သည်။ လူတစ်ဦး၏ ဥပဒေအရ နိုင်ငံသားဖြစ်မှုနှင့်မဆိုင်ဘဲ နိုင်ငံတစ်နိုင်ငံနှင့် ပတ်သက်၍ လူတစ်ဦးက အခြားလူအုပ်စုတစ်စုနှင့် မျှဝေခံစားသော ဓမ္မဓိဋ္ဌာန်ကျသည့် ခံစားမှုတစ်ရပ်ကို နိုင်ငံ၏ကိုယ်ပိုင် အမှတ်လက္ခဏာဟု ရည်ညွှန်းနိုင်သည်။ စိတ်ပညာဆိုင်ရာအရ နိုင်ငံ၏ကိုယ်ပိုင် အမှတ်လက္ခဏာကို ကွဲပြားခြားနားမှုကို သိမြင်မှုတစ်ရပ်အဖြစ်လည်းကောင်း၊ ‘ကျွန်ုပ်တို့’ နှင့် ‘သူတို့’ ဟူ၍ ခံစားသိမြင်မှု တစ်ရပ်အဖြစ်လည်းကောင်း ရှုမြင်ကြသည်။ လူတစ်ဦး၏ နိုင်ငံကိုယ်ပိုင် အမှတ်လက္ခဏာနှင့် ပတ်သက်၍ ဖော်ထုတ်ပြသမှုကို အကောင်းဘက်မှ ကြည့်မြင်ပါက မျိုးချစ်စိတ်ဟု ခေါ်ဆိုကြသည်။ ယင်းကို မိမိနိုင်ငံနှင့်ပတ်သက်၍ ဂုဏ်ယူခြင်း၊ မိမိနိုင်ငံကို ချစ်မြတ်နိုးမှုနှင့်ပတ်သက်၍ အပြုသဘောဆောင်သည့် ခံစားချက်ရှိခြင်းတို့ဖြင့် သတ်မှတ်နိုင်သည်။ နိုင်ငံကိုယ်ပိုင် အမှတ်လက္ခဏာရပ်ကို လွန်လွန်ကြူးကြူး ဖော်ထုတ်ပြသခြင်းကိုမူ လူမျိုးကြီးဝါဒဟု ခေါ်ဆိုတတ်ကြသည်။ ယင်းကို မိမိ၏ နိုင်ငံသည် ကြီးမြတ်သည်ဟု ပြင်းပြင်းထန်ထန် ယုံကြည်ခြင်း၊ နိုင်ငံကို အလွန်အမင်း သစ္စာထားခြင်းတို့ဖြင့် သတ်မှတ်သည်။

တိုင်းရင်းသားလူမျိုးစုအမျိုးမျိုး၊ တိုင်းရင်းသားလူမျိုးစု ကိုယ်ပိုင်အမှတ်လက္ခဏာ အမျိုးမျိုးနှင့် နိုင်ငံ၏ ကိုယ်ပိုင်အမှတ်လက္ခဏာ အမျိုးမျိုးရှိသည့်နိုင်ငံများတွင် ပဋိပက္ခများ ဖြစ်ပွားနိုင်သည်။ ယင်းပဋိပက္ခများကို တိုင်းရင်းသားလူမျိုးစုနှင့် နိုင်ငံဆိုင်ရာ ပဋိပက္ခများဟု ရည်ညွှန်းခေါ်ဆိုကြသည်။ တိုင်းရင်းသားလူမျိုးစုနှင့် နိုင်ငံဆိုင်ရာ ပဋိပက္ခများအနက် ထင်ရှားသော သာဓကတစ်ရပ်မှာ သြစတြေးလျအစိုးရနှင့် အဘိုရီဂျင်း တိုင်းရင်းသားတို့ အကြား တင်းမာမှုများဖြစ်သည်။ သြစတြေးလျအစိုးရနှင့် အများစုယဉ်ကျေးမှုသည် အများစုက ထောက်ခံသော မူဝါဒများနှင့် မူဘောင်များအတွင်း၌ ရှိသည်။ ယင်းသည် ဥရောပအခြေစိုက် ယဉ်ကျေးမှုစံတန်ဖိုးများဖြစ်ပြီး အင်္ဂလိပ်ဘာသာသည် နိုင်ငံတော် ဘာသာစကားဖြစ်သည်။ အဘိုရီဂျင်းတို့၏ ယဉ်ကျေးမှုနှင့် ဘာသာစကားကို နိုင်ငံတော်က ထောက်ခံခြင်းမရှိဘဲ ၂၀ ရာစုအတွင်း လုံးဝနီးပါး အမြစ်ဖြတ်ခဲ့သည်။ ယင်းပဋိပက္ခများကြောင့် အဘိုရီဂျင်းတို့သည် သြစတြေးလျနိုင်ငံသားဖြစ်ခြင်းဟူသော နိုင်ငံ၏ ကိုယ်ပိုင်အမှတ်လက္ခဏာနှင့် မလျော်ညီဘဲ ၎င်းတို့၏ ကိုယ်ပိုင်အမှတ်လက္ခဏာသည် နိုင်ငံတော်နှင့် ပဋိပက္ခဖြစ်နေသည့် အသွင်ဆောင်နေခဲ့သည်။

၎င်းအပြင် ရွှေ့ပြောင်းနေထိုင်မှုများ မြင့်မားလာသောအခါ နိုင်ငံများစွာတို့သည် နိုင်ငံ၏ ကိုယ်ပိုင်အမှတ်လက္ခဏာရပ် တည်ဆောက်ရန်နှင့် ရွှေ့ပြောင်းအခြေချလာသူများနှင့် လိုက်လျောညီထွေရှိရန် စိန်ခေါ်မှုများကို ရင်ဆိုင်လာရသည်။ နိုင်ငံအချို့သည် ရွှေ့ပြောင်းအခြေချလာသူများအား ၎င်းတို့၏ အိမ်ရှင်နိုင်ငံနှင့် သက်ဆိုင်သော သိမြင်မှု ဖွံ့ဖြိုးလာအောင် အားပေးခြင်းဖြင့် ပို၍စည်းရုံးရေး သဘောဆောင်ကြသည်။ ဥပမာအားဖြင့် ကနေဒါနိုင်ငံသည် ကမ္ဘာပေါ်တွင် ရွှေ့ပြောင်းလာသူများ အမြဲတမ်းနေထိုင်မှု အမြင့်ဆုံးနိုင်ငံဖြစ်သည်။ ကနေဒါအစိုးရသည် ရွှွေ့ပြောင်းလာသူများအား ကနေဒါနိုင်ငံနှင့်သက်ဆိုင်သော သိမြင်မှုမျိုး တည်ဆောက်ပေးရန် အားပေးပြီး ကနေဒါနိုင်ငံ၌ မွေးဖွားသူများနှင့် ရွှေ့ပြောင်းအခြေချလာသူများ နှစ်မျိုးစလုံးပါဝင်သည့် နိုင်ငံ၏ ကိုယ်ပိုင်အမှတ်လက္ခဏာရပ် သဘောတရားကို ပိုမိုကျယ်ပြန့်အောင် ထူထောင်ခဲ့သည်။ သို့သော် အချို့သော နိုင်ငံများသည် လိုက်လျောမှုနည်းပါးလှသည်။ ဥပမာအားဖြင့် ရုရှားနိုင်ငံသည် ၁၉၉၀ ပြည့်လွန်နှစ်များ၌ တစ်ကြိမ် ၁၉၉၈ ခုနှစ် နောက်ပိုင်းတစ်ကြိမ် ရွှေ့ပြောင်းအခြေချသူများ အလုံးအရင်း ဝင်ရောက်မှုနှင့် ရင်ဆိုင်ရသည်။ ရွှေ့ပြောင်းအခြေချလာသူများကို ရုရှားများက မကောင်းမြင်ကြပြီး မကြိုဆိုထိုက်သော မဖွယ်ရာသော ဧည့်သည်များအဖြစ် ရှုမြင်ကြသည်။ ရွှေ့ပြောင်းအခြေချလာသူများကို အပြင်လူများအဖြစ် သတ်မှတ်ကာ ရုရှားနှင့် သက်ဆိုင်သော ကိုယ်ပိုင်အမှတ်လက္ခဏာကို မျှဝေခံစားခြင်းမှ ဖယ်ထုတ်ထားခဲ့သည်။

ထို့ကြောင့် နိုင်ငံအသီးသီး၌ မိမိနိုင်ငံ၏ ကိုယ်ပိုင်အမှတ်လက္ခဏာ ကိုယ်စီရှိကြပြီး ရွှေ့ပြောင်းအခြေချမှုဟူသည် နိုင်ငံ၏ကိုယ်ပိုင် အမှတ်လက္ခဏာနှင့်ပတ်သက်၍ ရင်ဆိုင်ရသော စိန်ခေါ်မှုတစ်ရပ်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။

အောက်တိုဘာ ၁၃ ရက်ထုတ် The Daily Eleven သတင်းစာ အယ်ဒီတာ့အာဘော်