မတ် ၆ ရက်က ပြည်ထောင်စုလွှတ်တော် အစည်းအဝေး မစတင်မီ လွှတ်တော်ကိုယ်စားလှယ်များအား တွေ့ရစဉ်
၂၀၁၈ ခုနှစ် ပြည်ထောင်စု၏ ဘဏ္ဍာငွေ အရအသုံးဆိုင်ရာ ဥပဒေကြမ်းအား ပြည်သူ့ငွေစာရင်းပူးပေါင်းကော်မတီ၏ ပြင်ဆင်အဆိုပြုချက်များအတိုင်း ကျပ်သန်းပေါင်း ၁၃၀,၁၀၄ ဒသမ ၁၃၂ စိစစ်ဖြတ်တောက်ကာ အတည်ပြုခဲ့သည်။
မတ် ၆ ရက်ကပြုလုပ်သည့် ပြည်ထောင်စုလွှတ်တော် အစည်းအဝေးတွင် ၂၀၁၈ ခုနှစ် ပြည်ထောင်စု၏ ဘဏ္ဍာငွေအရအသုံးဆိုင်ရာ ဥပဒေကြမ်းပါ ရငွေသုံးငွေများနှင့်စပ်လျဉ်းပြီး ပြည်သူ့ငွေစာရင်း ပူးပေါင်းကော်မတီ၏ ပြင်ဆင်အဆိုပြုချက်များအတိုင်း တစ်ပိုဒ်ချင်းစီအလိုက် အတည်ပြုခဲ့ခြင်းဖြစ်သည်။
၂၀၁၈ ခုနှစ် ဧပြီမှ စက်တင်ဘာ ၃၀ ရက်အထိ ပြည်ထောင်စုအဆင့်အဖွဲ့များမှ သာမန်နှင့်ငွေလုံးငွေရင်း အသုံးစရိတ် လျာထားချက် ကျပ်သန်းပေါင်း ၁၀,၆၇၇,၆၉၈ ဒသမ ၁၇၄ တောင်းခံထားသည့်အနက် ကျပ်သန်းပေါင်း ၁၃၀,၁၀၄ ဒသမ ၁၃၂ အား ပူးပေါင်းအဖွဲ့များက စိစစ်လျှော့ချထားပြီး ကျန်ငွေ ကျပ်သန်းပေါင်း ၁၀,၅၄၇,၅၉၄ ဒသမ ၀၄၂ ဖြစ်ကြောင်း ပြည်သူ့ငွေစာရင်း ပူးပေါင်းကော်မတီက ဖေဖော်ဝါရီ ၁၆ ရက်ကပြုလုပ်သည့် ပြည်ထောင်စုလွှတ်တော် အစည်းအဝေးသို့ အစီရင်ခံစာ တင်သွင်းခဲ့သည်။
၂၀၁၈ ခုနှစ် ဧပြီလမှ စက်တင်ဘာအထိ ခြောက်လအတွက် ပြည်ထောင်စု၏ အရအသုံးခန့်မှန်းခြေငွေစာရင်းနှင့် ၂၀၁၈ ခုနှစ် ပြည်ထောင်စု၏ ဘဏ္ဍာငွေအရအသုံးဆိုင်ရာ ဥပဒေကြမ်းအပေါ် စိစစ်တွေ့ရှိချက်များအရ သာမန်ရငွေတွင် ကျပ် ၅၀,၆၀၂ ဒသမ ၄၈၀ သန်းတိုးမြှင့်ပြီး သုံးငွေစိစစ်လျှော့ချမှုကြောင့် ရငွေကျပ် ၁၃,၂၁၆ ဒသမ ၃၂၀ သန်းလျော့နည်းခြင်းနှင့် သုံးငွေစိစစ်လျှော့ချမှု ကျပ် ၁၃၀,၁၀၄ ဒသမ ၁၃၂ သန်းတို့ကို အတည်ပြုသင့်ကြောင်း ပြည်သူ့ငွေစာရင်းပူးပေါင်းကော်မတီက သဘောထားမှတ်ချက်ပြုခဲ့သည်။
၂၀၁၈ ခုနှစ် ဧပြီမှ စက်တင်ဘာအထိ တောင်းခံငွေများတွင် ပူးပေါင်းစိစစ်ရေးအဖွဲ့များက စိစစ်ဖြတ်တောက်ခြင်းမရှိခဲ့သည့် ဌာနများအနေဖြင့် နိုင်ငံတော်သမ္မတရုံး၊ နိုင်ငံတော်ဖွဲ့စည်းပုံအခြေခံဥပဒေဆိုင်ရာ ခုံရုံး၊ ပြည်ထောင်စုရွေးကောက်ပွဲကော်မရှင်၊ ပြည်ထောင်စုရှေ့နေချုပ်ရုံး၊ ပြည်ထောင်စုစာရင်းစစ်ချုပ်ရုံး၊ ပြန်ကြားရေး (နိုင်ငံတော်ပိုင်စီးပွားရေးအဖွဲ့အစည်းများ)၊ ပို့ဆောင်ရေးနှင့်ဆက်သွယ်ရေး (နိုင်ငံတော်ပိုင် စီးပွားရေးအဖွဲ့အစည်းများ) ပြည်ထောင်စုဘဏ္ဍာရန်ပုံငွေ ပြင်ပ၊ သယံဇာတနှင့် သဘာဝပတ်ဝန်းကျင်ထိန်းသိမ်းရေး (နိုင်ငံတော်ပိုင် စီးပွားရေးအဖွဲ့အစည်းများ) မိမိဘဏ္ဍာရန်ပုံငွေ၊ လျှပ်စစ်နှင့်စွမ်းအင် (နိုင်ငံတော်ပိုင် စီးပွားရေးအဖွဲ့အစည်းများ) ပြည်ထောင်စုဘဏ္ဍာရန်ပုံငွေ ပြင်ပ ရန်ကုန်နှင့် လျှပ်စစ်ဓာတ်အားပေးကော်ပိုရေးရှင်းများမှ တောင်းခံထားမှုများအား ဖြတ်တောက်ခဲ့ခြင်းမရှိကြောင်း သိရသည်။
ပြည်သူ့ငွေစာရင်းပူးပေါင်းကော်မတီ ဒုတိယဥက္ကဋ္ဌ ဦးအောင်မင်းက “ပျမ်းမျှကတော့ ဘီလျံ ၁၃၀ ကျော်ကျော်လောက် စိစစ်ပြီးတော့ ဖြတ်တောက်တယ်။ အဓိက,ကတော့ ကြားဖြတ် ဘတ်ဂျက်လေးတစ်ခုဖြစ်တဲ့အတွက် ခြောက်လအတွင်းမှာ အမှန်တကယ်ပြီးနိုင်မယ့် အကောင်အထည်ဖော် ဆောင်ရွက်နိုင်မယ့် လုပ်ငန်းတွေကိုပဲ အဓိကထားပြီး စိစစ်ခွင့်ပြုခဲ့ခြင်းပဲ ဖြစ်ပါတယ်။ ဒီနေရာမှာ တွေ့လိမ့်မယ်။ ထောက်ပံ့ငွေအသုံးစရိတ်တို့ အကူအညီရငွေ အသုံးစရိတ်တို့ ဆိုတာကျတော့လည်း အများအမြင်မှာ နိုင်ငံခြားပေးမယ့် ထောက်ပံ့ငွေနဲ့ အကူအညီရငွေတောင် လျှော့တယ်လို့ မြင်ကောင်းမြင်လိမ့်မယ်။ တကယ်တော့ နိုင်ငံခြားကရမယ့် အကူအညီတို့ ထောက်ပံ့ငွေတွေဆိုလို့ရှိရင် ခြောက်လအတွင်းမှာ အမှန်တကယ်ရနိုင်မယ့် ငွေကိုသာ လျာထားဖို့ဆိုတဲ့ ညွှန်ကြားချက်ရှိတယ်။ ဒါ့ကြောင့် ဒီမှာဖြတ်တောက်လိုက်ရတဲ့ ထောက်ပံ့ငွေတို့ အကူအညီရငွေတို့ဟာဆိုရင် ဒီခြောက်လအတွင်းမှာ ဘယ်လိုမှမရနိုင်ဘူး။ မူလကတော့ ရမယ်လို့မျှော်မှန်းထားတယ်။ ညှိနှိုင်းချက်အတွင်းမှာ ခြောက်လအတွင်း မရနိုင်တဲ့အတွက် စိစစ်တဲ့အချိန်မှာ စိစစ်ဖြတ်တောက်လိုက်ခြင်းဖြစ်ပါတယ်။
ပြည်ထဲရေးဝန်ကြီးဌာနက တောင်းခံထားသည့် သာမန်အသုံးစရိတ်အား ဖြတ်တောက်ခြင်းမရှိဘဲ ငွေလုံးငွေရင်း တောင်းခံလျာထားသည့် ကျပ်သန်းပေါင်း ၁၄၆,၈၆၂ ဒသမ ၀၆၈ မှ ကျပ်သန်းပေါင်း ၆,၂၂၈ ဒသမ ၂၇၁ အား စိစစ်ဖြတ်တောက်ထားကြောင်း၊ ကာကွယ်ရေးဝန်ကြီးဌာန တောင်းခံထားသည့် သာမန်လျာထားချက် ကျပ်သန်းပေါင်း ၇၂၀,၂၉၅ ဒသမ ၄၄၄ မှ ကျပ်သန်းပေါင်း ၂၀၀၊ ငွေလုံးငွေရင်း ကျပ်သန်းပေါင်း ၆၁၁,၀၈၇ ဒသမ ၃၆၆ မှ ကျပ်သန်းပေါင်း ၈,၅၂၅ စိစစ်ဖြတ်တောက်ထားကြောင်း၊ နယ်စပ်ရေးရာဝန်ကြီးဌာန တောင်းခံထားသည့် ငွေလုံးငွေရင်း ကျပ်သန်းပေါင်း ၄၄,၇၄၉ ဒသမ ၆၁၂ မှ ကျပ်သန်းပေါင်း ၇,၂၈၉ ဒသမ ၆၂၃ ဖြတ်တောက်ထားကြောင်း၊ ပြန်ကြားရေးဝန်ကြီးဌာန (ဦးစီးဌာနများ) ငွေလုံးငွေရင်း ကျပ်သန်းပေါင်း ၁,၁၉၅ ဒသမ ၀၆၈ မှ ကျပ်သန်းပေါင်း ၄၂၀ ဒသမ ၅၈၄ စိစစ်ဖြတ်တောက်ထားကြောင်း၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန တောင်းခံထားသည့် သာမန်ကျပ်သန်းပေါင်း ၁၂၆,၃၃၉ ဒသမ ၃၃၀မှ ကျပ်သန်းပေါင်း ၃,၇၀၄ ဒသမ ၆၅၆ စိစစ်ထားကြောင်း၊ ငွေလုံးငွေရင်း ကျပ်သန်းပေါင်း ၁၄၉,၈၈၈ ဒသမ ၁၀၇ မှ ကျပ်သန်းပေါင်း ၁၉,၉၉၀ ဒသမ ၈၅၃ စိစစ်ဖြတ်တောက်ထားကြောင်း အစီရင်ခံစာအရ သိရသည်။
ပညာရေးဝန်ကြီးဌာနက တောင်းခံထားသည့် သာမန်ကျပ်သန်းပေါင်း ၆၆၃,၈၁၁ ဒသမ ၉၈၉ အား ဖြတ်တောက်ခြင်းမရှိဘဲ ငွေလုံးငွေရင်း ကျပ်သန်းပေါင်း ၁၃၉,၂၈၀ ဒသမ ၆၀၅ မှ ကျပ်သန်းပေါင်း ၅,၁၇၄ ဒသမ ၁၆၉ စိစစ်ဖြတ်တောက်ထားကြောင်း၊ ကျန်းမာရေးနှင့် အားကစားဝန်ကြီးဌာနက တောင်းခံထားသည့် သာမန်ကျပ်သန်းပေါင်း ၂၉၁ ဒသမ ၅၅၀မှ ကျပ်သန်းပေါင်း ၇ ဒသမ ၉၃၁ နှင့် ငွေလုံးငွေရင်း ကျပ်သန်းပေါင်း ၁၂၆,၃၉၈ ဒသမ ၁၃၃ မှ ကျပ်သန်းပေါင်း ၁၀,၇၅၄ ဒသမ ၇၉၃ စသည်ဖြင့် ဝန်ကြီးဌာနအသီးသီးအား စိစစ်ဖြတ်တောက်ထားကြောင်း သိရသည်။
