Photo. U Zaw Aye Mg Facebook

ပြည်​ထောင်စုအတိုင်ပင်ခံ​ကောင်စီရုံးဖွင့်ပွဲအခမ်းအနားပြုလုပ်ခဲ့​ကြောင်း ​ကောင်စီဝင်ဦး​ဇော်​အေး​မောင်က ၎င်း၏ Facebook လူမှုကွန်ရက်စာမျက်နှာတွင် ဓါတ်ပုံများနှင့်တကွ ယ​နေ့(​မေ ၂၀ ရက်)တွင် ​ဖော်ပြချက်အရသိရသည်။

သို့ရာတွင် ကောင်စီဝင်ဦး​ဇော်​အေး​မောင်က ​ယ​နေ့(မေ ၂၀ ရက်)မွန်းလွဲပိုင်းတွင် ​ဖော်ပြခဲ့သည့် ကောင်စီရုံးဖွင့်ပွဲအခမ်းအနား ဓါတ်ပုံများကို ည​နေပိုင်းတွင် ၎င်း၏ Facebook လူမှုကွန်ရက်စာမျက်နှာတွင် ​ပြန်လည်ဖြုတ်ချထားသည်ကို​တွေ့ရသည်။

ဒုတိယဗိုလ်ချုပ်မှူးကြီး(ငြိမ်း) ဦးစိုးဝင်း ဥက္ကဌအဖြစ်တာဝန်ယူသည့်ပြည်​ထောင်စုအတိုင်ပင်ခံ​ကောင်စီကိုဧပြီ ၁၀ ရက်တွင် နိုင်ငံ​တော်သမ္မတဖွဲ့စည်းခဲ့ခြင်းဖြစ်သည်။

ပြည်​ထောင်စုအတိုင်ပင်ခံ​ကောင်စီတွင် ဥက္ကဌအဖြစ် ဒုတိယဗိုလ်ချုပ်မှူးကြီး(ငြိမ်း)ဦးစိုးဝင်း၊ အတွင်း​ရေးမှူးအဖြစ် ဗိုလ်ချုပ်ကြီး(ငြိမ်း)ဦးမောင်မောင်အေး၊ ​ကောင်စီဝင်များအဖြစ် ပြည်​ထောင်စုဝန်ကြီး(ငြိမ်း)ဦးသန်းဆွေ၊ ပြည်​ထောင်စုဝန်ကြီး(ငြိမ်း)ဦးကိုကိုလှိုင်၊ဗိုလ်ချုပ်ကြီး(ငြိမ်း)ဦးမိုးအောင်၊ ဒေါက်တာ ရင်ရင်နွယ်၊ ဒေါ်ချိုချိုကျော်ငြိမ်း၊ ဦးကိုကိုကြီး၊ မန်းငြိမ်းမောင်နှင့် အမျိုးသားလွှတ်​တော်ကိုယ်စားလှယ်​ဒေါ်ဒွဲဘူ၊ ဒုတိယဝန်ကြီး(ငြိမ်း)ဦးဇော်အေးမောင်တို့ပါဝင်သည်။

ပြည်ထောင်စု၏ လုံခြုံရေးနှင့် တရားဥပဒေစိုးမိုးရေးဆိုင်ရာကိစ္စရပ်များ၊ ဆက်ဆံရေးဆိုင်ရာကိစ္စရပ်များ၊ ငြိမ်းချမ်းရေးဆိုင်ရာကိစ္စရပ်များ၊ ဥပဒေပြဋ္ဌာန်းရေးဆိုင်ရာကိစ္စရပ် များကို အကြံပေးခြင်း၊ ညှိနှိုင်းဆောင်ရွက်ခြင်းတို့ ပြုနိုင်ရန်အတွက် ပြည်ထောင်စုအတိုင်ပင်ခံကောင်စီ ဥပဒေပုဒ်မ ၄ ၊ ပုဒ်မ ၅ နှင့် ပုဒ်မ ၆ တို့အရ ပြည်ထောင်စုအတိုင်ပင်ခံကောင်စီကို ဖွဲ့စည်း​​ထားခြင်းဖြစ်သည်။

ပြည်ထောင်စုအတိုင်ပင်ခံကောင်စီဥပ​ဒေကို အမျိုးသားကာကွယ်ရေးနှင့်လုံခြုံရေးကောင်စီက ၂၀၂၆ ခုနှစ်ဖေဖော်ဝါရီ ၃ ရက်တွင် ပြဌာန်းခဲ့ခြင်းဖြစ်ပြီး ကောင်စီ၏ သက်တမ်းသည် နိုင်ငံတော်သမ္မတ၏ သက်တမ်းအတိုင်းဖြစ်​ကြောင်း၊ ကောင်စီ၏ ရုံးလုပ်ငန်းများအတွက် နိုင်ငံတော်သမ္မတရုံးက စီစဉ်ဆောင်ရွက်ပေးရမည်ဖြစ်​ကြောင်းနှင့် နိုင်ငံတော်သမ္မတရုံးသည် ဤဥပဒေပါ ပြဋ္ဌာန်းချက်များကို အကောင်အထည် ဖော်ဆောင် ရွက်နိုင်ရန်အတွက် လိုအပ်သည့် နည်းဥပဒေ၊ အမိန့်၊ အမိန့်ကြော်ငြာစာနှင့် ညွှန်ကြားချက်တို့ကို ထုတ်ပြန်နိုင်​​​ကြောင်း ​ကောင်စီဥပ​ဒေတွင်ပြဌာန်းပါရှိသည်။

See less