အမေရိကန်သမ္မတ ဒေါ်နယ်ထရန့်က အီရန်နိုင်ငံနှင့် ရရှိထားသည့် အပစ်အခတ်ရပ်စဲရေး သဘောတူညီချက် "ပြီးဆုံးသွားပြီ" ဟု ပြောကြားခဲ့ပြီးနောက် ဇူလိုင် ၈ တွင် ဝေါစထရိစတော့စျေးကွက်၌ ရှယ်ယာဈေးများကျဆင်းသွားခဲ့ပြီး ရှေ့အလယ်ပိုင်းဒေသ၌ တိုက်ပွဲများ ပြန်လည်ဖြစ်ပွားလာခြင်းကြောင့် ရေနံစျေးနှုန်းများလည်း မြင့်တက်လာခဲ့သည်။
စတော့စျေးကွက်ဖွင့်လှစ်ပြီး မကြာမီ ဂျုံးစ်စက်မှုအညွှန်းကိန်း (Dow Jones Industrial Average) သည် ၁ ဒသမ ၀ ရာခိုင်နှုန်း ကျဆင်းကာ ၅၂,၄၁၂ .၁၅မှတ်သို့ ရောက်ရှိသွားခဲ့ပြီး S&P 500 ညွှန်းကိန်းသည် ၀ ဒသမ ၅ ရာခိုင်နှုန်း ကျဆင်းကာ ၇,၄၆၅ .၃၈ မှတ်သို့ ရောက်ရှိခဲ့သည်။
ထို့ပြင် နည်းပညာကုမ္ပဏီအများစု ပါဝင်သည့် Nasdaq Composite ညွှန်းကိန်းသည် ၀ ဒသမ ၃ ရာခိုင်နှုန်း ကျဆင်းကာ ၂၅,၇၃၁ .၆၉ မှတ်သို့ လျော့ကျသွားခဲ့သည်။
CFRA မှ ဆမ် စတိုဗာလ်က စစ်ပွဲနှင့်ပတ်သက်၍ သမ္မတထရန့်၏ ပြောကြားမှုများသည် စျေးကွက်အတွင်း ရှယ်ယာများ အကြီးအကျယ် ထုတ်ရောင်းမှုကို ဖြစ်ပေါ်စေခဲ့သည်ဟု ဆိုသည်။
အမေရိကန်ခေါင်းဆောင်က တာဝန်ရှိသူများသည် ဆွေးနွေးညှိနှိုင်းမှုများ ဆက်လက်လုပ်ဆောင်နိုင်ဆဲဖြစ်ကြောင်း၊ပြဿနာကို ဖြေရှင်းနိုင်မည့် လမ်းစရှိနေသေးကြောင်း ပြောကြားခဲ့သော်လည်း ရင်းနှီးမြှုပ်နှံသူများကြားတွင်မူ မြင့်တက်လာနေသည့် ရေနံစျေးနှုန်းများနှင့်ပတ်သက်၍စိုးရိမ်ပူပန်မှုများ လွှမ်းမိုးနေသည်။
ကုန်သည်များက လာမည့်အပတ်တွင် ထွက်ပေါ်လာမည့် မျှော်မှန်းထားသည်ထက် ပိုမိုမြင့်မားနိုင်သော အမေရိကန်၏ ငွေကြေးဖောင်းပွမှု ကိန်းဂဏန်းများကိုလည်း ဆက်လက်စောင့်ကြည့်နေမည်ဖြစ်သည်။
Ref:AFP
AFP photos
