လီဗာပူးလ်တိုက်စစ်မှူး ဒါဝင်နူးနက်ဇ်က မိမိအနေဖြင့် လူမူကွန်ရက်မှ ဝေဖန်မှုများကို ဂရုမစိုက်ဘဲ အကောင်းဆုံးကြိုးစားနေကြောင်း ပြောကြားခဲ့သည်။
ဥရုဂွေးတိုက်စစ်မှူး ဒါဝင်နူးနက်ဇ် (၂၄ နှစ်)သည် ၂၀၂၂ တွင် ဘင်ဖီကာမှ လီဗာပူးလ်အသင်းထံ Add-ons ကြေးများအပါအဝင် ပေါင် (၈၅)သန်းဖြင့် ပြောင်းရွှေ့လာခဲ့သည်။
ဒါဝင်နူးနက်ဇ်သည် ပြီးခဲ့သည့်ရာသီက ပြိုင်ပွဲစုံ (၄၂) ပွဲတွင် (၁၅) ဂိုးသွင်းယူနိုင်ခဲ့သော်လည်း မန်စီးတီးတိုက်စစ်မှူး ဟော်လန်းနှင့် နှိုင်းယှဉ်ကာ လှောင်ပြောင်ခံခဲ့ရသလို၊ အပိုင်အခွင့်အရေးများကို လွဲချော်ခဲ့ခြင်းကြောင့်လည်း ဝေဖန်မှုများနှင့် ရင်ဆိုင်ခဲ့ရသည်။
ဒါဝင်နူးနက်ဇ်သည် ယခုရာသီတွင် လီဗာပူးလ်အသင်း၌ ပုံမှန်ပွဲထွက်ခွင့်ရရန် ရုန်းကန်နေရသော်လည်း နယူးကာဆယ်နှင့်ပွဲတွင် လူစားဝင်ပြီး (၂) ဂိုးသွင်းယူ ခဲ့ခြင်းကြောင့် ချီးကျူးမှုများခံခဲ့ရသည်။
ဒါဝင်နူးနက်ဇ်က "လူမှုကွန်ရက်တွေကို ကျွန်တော် ကြည့်ခဲပါတယ်။ ဒါက ကျွန်တော့်အတွက် အကျိုးမဖြစ်စေပါဘူး။ လူတွေက ကျွန်တော့်ကို ဝေဖန်ကြတယ်။ ဒါပေမဲ့ သူတို့ကို ကျွန်တော် ဘာမှမပြောပါဘူး။ ကျွန်တော့်အနေနဲ့ တိတ်တိတ်ဆိတ်ဆိတ် အလုပ်ကြိုးစားခဲ့ပြီး ဒါက အလုပ်ဖြစ်ပါတယ်။ လူတွေ ပြောချင်တာပြောကြပါစေ။ ကျွန်တော် အဆင်ပြေပါတယ်။ ကျွန်တော့်အနေနဲ့ တိတ်တဆိတ်အလုပ်လုပ်ပြီး အကောင်းဆုံးစွမ်းဆောင်နိုင်အောင် ကြိုးစားသွားမှာပါ" ဟု ပြောကြားခဲ့သည်။
