ဒီဘက်နှစ်တွေအတွင်း အင်္ဂလန်အသင်းရဲ့ ကွင်းလယ်တိုက်စစ်နဲ့ တောင်ပံနေရာတွေမှာ ကြယ်ပွင့်တွေ မှိုလိုပေါက်နေခဲ့တာပါ။ ဆောက်ဂိတ်အတွက်လည်း ပြိုင်ပွဲတစ်ခုနီးလာတိုင်း ခေါင်းစားရတယ်။ ပြီးခဲ့တဲ့ ယူရို-၂၀၂၀ အင်္ဂလန်လူစာရင်းမှာ စတာလင်၊ ဖိုဒန်၊ ဂရီးလစ်ရှ်၊ မေဆန်မောင့်၊ ဆန်ချို၊ ရပ်ရှ်ဖို့ဒ်၊ ဆာကာတို့လို ကြယ်ပွင့်တွေ အများအပြားမြင်ခဲ့ရတယ်။ မက်ဒီဆန်၊ ဝက်ဒ်ပရောက်၊ စမစ်ရိုး၊ လင်ဂတ်တို့လို နာမည်ရှိတဲ့ ကစားသမားတွေတောင် ကျန်နေခဲ့ရတယ်။ အခုလို စုဖွဲ့မှုတောင့်တင်းတဲ့လူစာရင်းမှာ ရွေးချယ်ခံရဖို့ဆိုတာ ဘိုဝင်အတွက် လွန်ခဲ့တဲ့ (၂)နှစ်လောက်ကဆို အိပ်မက်တောင် မက်မကြည့်ဖူးတဲ့အရာ ဖြစ်နေနိုင်တယ်။