ပို့ကုန်တင်ပို့မှုမြင့်တက်ခဲ့သဖြင့် လက်ရှိဘဏ္ဍာနှစ် နှစ်လတွင် ကုန်သွယ်မှုလိုငွေ မရှိသည့်အပြင် ကုန်သွယ်မှုပိုငွေ ဒေါ်လာ သန်း ၅၀ ကျော်ရှိခဲ့ပြီး မြန်မာနိုင်ငံ၏ ပြည်ပကုန်သွယ်မှုတွင် ကုန်သွယ်မှုပိုငွေ စတင်ဖြစ်ပေါ်ခဲ့ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက ထုတ်ပြန်ထားသည့် စာရင်းများအရသိရသည်။

ကုန်သွယ်မှုပိုငွေဆိုသည်မှာ ပြည်ပမှ မိမိနိုင်ငံသို့ တင်သွင်းနေရသော သွင်းကုန်တန်ဖိုးပမာဏထက် ကျော်လွန်ကာ ပြည်တွင်းထုတ်ကုန်များ ပြည်ပသို့ ပိုမိုတင်ပို့ထားခြင်းကို ဆိုလိုသည်။ ကုန်သွယ်မှုလိုငွေဆိုသည်မှာ မိမိနိုင်ငံက တင်ပို့သည့်ပို့ကုန်တန် ဖိုးပမာဏထက် ပြည်ပမှ တင်သွင်းသည့် သွင်းကုန်တန်ဖိုးပမာဏ ပိုများနေခြင်းကို ဆိုလိုသည်။

၂၀၁၉-၂၀၂၀ ဘဏ္ဍာနှစ် အောက်တိုဘာ ၁ ရက်မှ နိုဝင်ဘာ ၂၉ ရက်အထိ ပြည်ပသို့ တင်ပို့ထားသည့် ပို့ကုန်တန်ဖိုးပမာဏ အမေရိကန်ဒေါ်လာ ၃ ဒသမ ၁၁၆ ဘီလျံ ရှိသည်။

ပြည်ပမှတင်သွင်းထားသည့် သွင်းကုန်တန်ဖိုးပမာဏမှာ အမေရိကန်ဒေါ်လာ ၃ ဒသမ ၀၆၁ ဘီလျံသာရှိကြောင်း ဝန်ကြီးဌာန၏ ထုတ်ပြန်ချက်အရ သိရသည်။

လက်ရှိဘဏ္ဍာနှစ် နှစ်လတွင် မြန်မာနိုင်ငံအနေဖြင့် ပြည်ပသို့ ပို့ကုန်တင်ပို့မှုပမာဏသည် ပြည်ပမှတင်သွင်းထားသည့် သွင်းကုန်ပမာဏထက် အမေရိကန်ဒေါ်လာ ၅၅ ဒသမ ၆၁၃ သန်းအထိ ပိုမိုတင်ပို့ထားနိုင်ခဲ့ ခြင်းဖြစ်သည်။

ထို့ကြောင့် လက်ရှိဘဏ္ဍာနှစ်တွင် ကုန်သွယ်မှုပိုငွေ အမေရိကန်ဒေါ်လာ ၅၅ ဒသမ ၆၁၃ သန်းအထိ ဖြစ်ပေါ်ခဲ့ခြင်းဖြစ်သည်။ ယခင်နှစ်ကာလတူတွင် ကုန်သွယ်မှုလိုငွေ အမေရိကန်ဒေါ်လာ သန်း ၆၅၀ ကျော် အထိ ရှိခဲ့သည်။

ယင်းကဲ့သို့ မြန်မာနိုင်ငံအနေဖြင့် ကုန်သွယ်မှုပိုငွေဖြစ်ပေါ်ခဲ့ခြင်းက အဆိုပါကာလအတွင်း ပြည်ပသို့ ပို့ကုန်ပိုမိုတင်ပို့နိုင်ခဲ့ခြင်းကြောင့်ဖြစ်သည်။ လက်ရှိဘဏ္ဍာနှစ် နှစ်လတွင် ပြည်ပသို့ ပို့ကုန်တင်ပို့တန်ဖိုးပမာဏ အမေရိကန်ဒေါ်လာ သုံးဘီလျံကျော်ရှိပြီး ယခင်နှစ်ကာလတူထက် ဒေါ်လာသန်း ၈၁၀ ကျော်အထိ ပိုမိုတင်ပို့နိုင်ခဲ့သည်။

လက်ရှိ ၂၀၁၉-၂၀၂၀ ဘဏ္ဍာနှစ်တွင် ယခင်နှစ်နည်းတူ ကုန်သွယ်မှုလိုငွေပမာဏ ဒေါ်လာသန်း ၅၀၀ သာရှိစေရန် မျှော်မှန်းထားသော်လည်း လက်တွေ့လုပ်ကိုင်ရာ၌ အခက်အခဲများရှိနေသေးကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာသန်းမြင့်က ပြောကြားသည်။

“ကုန်သွယ်မှုလိုငွေကတော့ နည်းနည်းလေးလျော့မယ့်သဘောလေးရှိတယ်။ လျာထားချက်ကတော့ ဒေါ်လာ သန်း ၅၀၀ လောက်ပဲရှိအောင်ပေါ့နော်။ ဒါပေမဲ့ တကယ်လက်တွေ့လုပ်တဲ့အခါကျတော့ ကိုယ့်ပြည်တွင်းလည်း စားသုံးမှုအားကောင်းလာတယ်။ ရင်းနှီးမြှုပ်နှံမှုပိုင်းမှာလည်း အထူးသဖြင့် အသေးစား၊ အလတ်စားလုပ်ငန်းတွေမှာ ကုန်ကြမ်းလိုအပ်တော့။ ဥပမာ မွေးမြူရေးက တက်လာတယ်။ ကြက်စာအရမ်းတင်သွင်းဖြစ်တယ်။ ပဲပိစပ်ကြိတ်ဖတ်ဆိုရင် ဟိုတုန်းက တန်ချိန်နှစ်သောင်းလောက် တစ်နှစ်ကို အခုဆို တန်ချိန်ငါးသောင်းအထိ သွင်းလာတဲ့အခါကျတော့ ခွင့်ပြုရတာပဲ။ ဒါမှလည်း ဒီဘက်ကလုပ်ငန်းတွေက တိုးတက်မှာ။ ဒါတွေက လျှော့လို့မရဘူးလေ။ တချို့ကလည်း ခရီးသွားတတ်လာတဲ့အခါမှာ ဒီမှာမထုတ်နိုင်တဲ့ ဝက်အူချောင်းတို့ အကောင်းစားငါးတွေ တင်သွင်းရတာရှိတယ်။ စားအုန်းဆီကလည်း လျှော့မပေးနိုင်ဘူး။ ဒီဇယ်မှာလည်း လျှော့လို့မရဘူး။ ဆေးဝါးကလည်း လျှော့လို့မရဘူးဆိုတော့ အလှကုန်ပစ္စည်းကလည်း လျှော့လို့မရဘူး” ဟု ပြည်ထောင်စုဝန်ကြီး ဒေါက်တာသန်းမြင့်က ပြောကြားသည်။