စပိန်အသင်းနောက်ခံလူ ရာမို့စ်သည် ရိုမေးနီးယားအသင်းအား အနိုင်ရသည့်ပွဲတွင် (၁) ဂိုးသွင်းယူပြီးနောက် အသင်းသမိုင်းတစ်လျှောက် ဂိုးသွင်းအများဆုံးစာရင်းတွင် အဆင့် (၁၀) နေရာသို့ တက်လှမ်းနိုင်ခဲ့ကြောင်း သိရသည်။ 

ရာမို့စ်သည် ပြီးခဲ့သည့် ကြာသပတေးနေ့က ကစားခဲ့သည့် ယူရို-၂၀၂၀ ခြေစစ်ပွဲ ရိုမေးနီးယား (၁-၂) စပိန်ပွဲတွင် စပိန်အသင်းအတွက် အဖွင့်ဂိုးကို ပယ်နယ်တီမှတစ်ဆင့် သွင်းယူပေးခဲ့သည်။ 

ယင်းမှာ ရာမို့စ်အတွက် စပိန်လက်ရွေးစင်ကစားသမားဘဝ (၂၁) ဂိုးမြောက် သွင်းဂိုးဖြစ်ခဲ့ပြီး ဂိုးသွင်းအများဆုံးစာရင်းတွင် အဆင့် (၁၀)၌ ရပ်တည်နေသည့် စပိန်ကွင်းလယ်လူဟောင်း မီချယ်လ်၏ သွင်းဂိုးအရေအတွက်နှင့် တူညီခဲ့ခြင်းလည်း ဖြစ်သည်။  

ထို့ပြင် ရာမို့စ်သည် ရိုမေးနီးယားအသင်းနှင့်ပွဲတွင် စပိန်အသင်းအတွက် ပွဲ (၁၆၆) ပွဲပြည့်မြောက်ခဲ့ပြီး အသင်းသမိုင်းတွင် ပွဲအများဆုံးကစားထားသည့် ဂိုးသမား ကာစီးလက်စ်(၁၆၇ ပွဲ)၏ စံချိန်ကို ကျော်ဖြတ်နိုင်ရန် (၂) ပွဲသာလိုတော့ကြောင်းလည်း သိရသည်။

ရီးယဲလ်မက်ဒရစ်အသင်းခေါင်းဆောင် ရာမို့စ်သည် စပိန်လက်ရွေးစင်အသင်းအတွက် ၂၀၀၅ ခုနှစ်တွင် စတင်ပွဲထွက်ကစားပြီး (၁၅) နှစ်တာကာလအတွင်း (၁၆၆) ပွဲကစားကာ (၂၁) ဂိုး သွင်းယူပေးထားသည်။