ဘွန်ဒစ်လီဂါချန်ပီယံ ဘိုင်ယန်မြူးနစ်အသင်းသည် ပြီးခဲ့သည့် ၂၀၁၈-၁၉ ရာသီက စံချိန်တင်အမြတ်ငွေရရှိခဲ့ကြောင်း စက်တင်ဘာလ (၄) ရက်နေ့က ထုတ်ပြန်ကြေညာခဲ့သည်။ 

    

ဘိုင်ယန်မြူးနစ်အသင်းသည် ပြီးခဲ့ သည့်ရာသီက စံချိန်တင်ဝင်ငွေတစ်ရပ်ဖြစ် သည့် ယူရို (၇၅၀.၄)သန်းအထိ ရရှိခဲ့ပြီး အခွန်ဆောင်ပြီး အသားတင်အမြတ်ငွေ ယူရို (၅၂.၅) သန်းရရှိခဲ့ကြောင်း သိရသည်။ 

ယင်းမှာ ၂၀၁၇-၁၈ ရာသီ အသားတင်အမြတ်ငွေနှင့် နှိုင်းယှဉ်မည်ဆိုလျှင် (၇၈) ရာခိုင်နှုန်းအထိ မြင့်တက်ခဲ့ခြင်းဖြစ်သည်။ 

ဘိုင်ယန်မြူးနစ်အသင်းဒုဥက္ကဋ္ဌ ယန်ခရစ္စတီယန်ဒရီးဆန်က အခုကဲ့သို့ အမြတ်ငွေရရှိခဲ့ခြင်းမှာ စပွန်ဆာစာချုပ်သစ်များနှင့် ရုပ်သံမှ ဝင်ငွေများမြင့် တက်လာခြင်းကြောင့်ဖြစ်ကြောင်း အသင်းဝက်ဘ်ဆိုက်သို့ ပြောကြားခဲ့သည်။ 

    

ဘိုင်ယန်မြူးနစ်အသင်း၏ ၂၀၁၈-၁၉ ရာသီ ဝင်ငွေ ယူရို (၇၅၀.၄) သန်းမှာ ၂၀၁၇-၁၈ ရာသီနှင့် နှိုင်းယှဉ်မည်ဆိုလျှင် (၁၄.၁၂) ရာခိုင်နှုန်း မြင့်တက်ခဲ့ပြီး အခွန်မဆောင်မီ အမြတ်ငွေမှာလည်း (၆၃) ရာခိုင်နှုန်းအထိ  မြင့်တက်လာခဲ့ကြောင်း သိရသည်။ 

ဂျာမန် နာမည်ကျော်စီးပွားရေးသတင်းစာ Handelsblatt က ဘိုင်ယန်မြူးနစ်အသင်းအနေဖြင့် ချန်ပီယံလိဂ်ပြိုင်ပွဲတွင် ရှုံးထွက် (၁၆) သင်း အဆင့်မှ ထွက်ခွာခဲ့ရသော်လည်း ယခုကဲ့သို့ စံချိန်တင်အမြတ်ငွေရရှိခဲ့ခြင်းမှာ ချီးကျူးစ ရာကောင်းကြောင်း ဖော်ပြခဲ့သည်။ 

    

သို့သော် ဘိုင်ယန်မြူးနစ်အသင်းအနေ ဖြင့် ဝင်ငွေရရှိမှုတွင် စပိန်ထိပ်သီးအသင်း ကြီးများကို လိုက်မမီသေးကြောင်း သိရသည်။  ဘာစီလိုနာအသင်းသည် ပြီးခဲ့သည့်ရာသီက ဝင်ငွေ ယူရို(၁)ဘီလီယံနီးပါးရရှိခဲ့ပြီး ရီးယဲလ်မက်ဒရစ်အသင်းမှာလည်း ဝင်ငွေ ယူရို(၇၅၇) သန်းရရှိခဲ့ကြောင်း သိရသည်။