ကျပ်ငွေတန်ဖိုးကျဆင်းမှုနှင့် ငွေကြေးဖောင်းပွမှုဖြစ်ပွားပြီး ကုန်ဈေးနှုန်းများ မြင့်တက်ပါက ပိုမိုခံစားရသည့် အခြေခံလူတန်းစားအချို့၏ လုပ်ငန်းခွင်တစ်ခုကို တွေ့ရစဉ်
လတ်တလောတွင် မြန်မာကျပ်ငွေတန်ဖိုး ကျဆင်းမှုနှင့် ကုန်ဈေးနှုန်းမြင့်တက်မှုများ ဖြစ်ပေါ်နေသော်လည်း အောက်တိုဘာ ၁ ရက်တွင် စတင်မည့် ၂၀၁၈-၂၀၁၉ ဘဏ္ဍာနှစ်၏ ပျှမ်းမျှငွေကြေးဖောင်းပွမှုနှုန်း ၅ ဒသမ ၉၁ ရာခိုင်နှုန်းသာ ရှိမည်ဟု ခန့်မှန်းထားသည်ဟု စီမံကိန်းနှင့် ဘဏ္ဍာရေးဝန်ကြီးဌာနမှ သိရသည်။
၂၀၁၇-၂၀၁၈ ဘဏ္ဍာနှစ်တွင် ပျမ်းမျှငွေကြေးဖောင်းပွမှု ၇ ဒသမ ၉ ရာခိုင်နှုန်း ဖြစ်ပေါ်နိုင်ကြောင်း ၂၀၁၇-၂၀၁၈ ဘဏ္ဍာနှစ် အမျိုးသားစီမံကိန်းတွင် ခန့်မှန်းထားရာမှ ၂၀၁၈ ခုနှစ် ဘဏ္ဍာနှစ်တို ခြောက်လကာလတွင် ဖြစ်ပေါ်မည့် ပျှမ်းမျှငွေဖောင်းပွမှုနှုန်းကို ၄ ဒသမ ၈၉ ရာခိုင်နှုန်းသာ ဖြစ်ပေါ်မည်ဟု လျှော့ချခန့်မှန်းခဲ့ရာမှ ၂၀၁၈-၂၀၁၉ ဘဏ္ဍာနှစ်၏ ပျှမ်းမျှငွေကြေးဖောင်းပွမှုနှုန်းကို ၅ ဒသမ ၉၁ ရာခိုင်နှုန်းသို့ တိုးမြှင့်ခန့်မှန်းခဲ့ခြင်း ဖြစ်သည်။
“ငွေကြေးဖောင်းပွမှုနှုန်းကို ထိန်းသိမ်းနိုင်ရန် ပြည်သူတို့လိုအပ်နေသည့် ကုန်စည်များ ထုတ်လုပ်မှု၊ စားသုံးမှု၊ ကုန်စည်စီးဆင်းမှုစသည့် နယ်ပယ်အသီးသီးတို့က ပူးပေါင်း ဆောင်ရွက်ခြင်းတို့ကို ဆောင်ရွက်သွားမှာ ဖြစ်ပါတယ်။ ၂၀၁၈-၂၀၁၉ ဘဏ္ဍာရေးနှစ်တွင် ပျှမ်းမျှငွေကြေးဖောင်းပွမှုနှုန်း ၅ ဒသမ ၉၁ ရာခိုင်နှုန်း ရှိမည်ဟု ခန့်မှန်းထားပါတယ်” ဟု စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီးဦးစိုးဝင်းက ပြည်ထောင်စု လွှတ်တော်သို့ ရှင်းလင်းတင်ပြစာတွင် ပြောကြားသည်။
လက်တလောတွင်၂၀၁၈ ခုနှစ် မေလအထိ တစ်နှစ်အတွင်းပျမ်းမျှ ငွေကြေးဖောင်းပွမှုနှုန်းမှာ ၄ ဒသမ ၂၉ ရာခိုင်နှုန်း ဖြစ်နေပြီး ၂၀၁၈ ခုနှစ် ဧပြီလတွင် ငွေကြေးဖောင်းပွမှုနှုန်း ၄ ဒသမ ၁၂ ရာခိုင်နှုန်းနှင့် နှိုင်းယှဉ်ပါကငွေ ကြေးဖောင်းပွမှုနှုန်း အနည်းငယ် ပြန်လည်မြင့်တက်လာကြောင်း ဗဟိုစာရင်းအင်းအဖွဲ့မှ သိရသည်။
လတ်တလောတွင် အခြေခံစားကုန်များမှာ ပျှမ်းမျှ ခုနစ်ရာခိုင်နှုန်းခန့် ဈေးနှုန်းမြင့်တက်နေပြီး မြန်မာကျပ်ငွေတန်ဖိုးမှာလည်း တစ်ဒေါ်လာ ၁၅၆၀ ကျပ်အထိ မြင့်တက်ခဲ့သဖြင့် ၁၃ ရာခိုင်နှုန်းခန့် တန်ဖိုးကျဆင်းမှု ဖြစ်ပေါ်နေကာ ငွေကြေးဖောင်းပွမှုနှုန်းမှာ ၂၀၁၈ ခုနှစ် ဇွန်လအထိ တစ်နှစ်အတွင်းပျှမ်းမျှ ၄ဒသမ ၅၈ရာခိုင်နှုန်း ဖြစ်ပေါ်နေသည်။
တစ်နိုင်ငံလုံးအတွက် ၂၀၁၂ ခုနှစ် အခြေခံနှစ်ဖြင့် စားသုံးသူဈေးဆနှုန်းအပေါ် အခြေခံတွက်ချက်ထားသော ငွေကြေးဖောင်းပွမှုနှုန်းမှာ ၂၀၁၇ ခုနှစ် ဒီဇင်ဘာအထိ တစ်နှစ်ပျမ်းမျှ ၄ ဒသမ ၆၁ ရာခိုင်နှုန်းရှိပြီး ၂၀၁၇ ခုနှစ် ဒီဇင်ဘာနှင့် ၂၀၁၆ ခုနှစ် ဒီဇင်ဘာ၏ နှစ်အလိုက်ပြောင်းလဲမှုကို နှိုင်းယှဉ်ပါက (Year on Year Inflation) မှာ ၄ ဒသမ ၄၅ ရာခိုင်နှုန်းရှိကာ လတ်တလော Year on Year Inflation မှာ ၆ ဒသမ ၄၅ ရာခိုင်နှုန်းနှင့် Annual Rate of Inflation မှာ ၄ ဒသမ ၅၈ ရာခိုင်နှုန်းရှိကြောင်း သိရသည်။
