ရန်ကုန်မြို့ ကမ်းနားလမ်းရှိ အပြည်ပြည်ဆိုင်ရာဆိပ်ကမ်း တစ်နေရာကို တွေ့ရစဉ်

လက်ရှိအချိန်တွင် မြန်မာ့စီးပွားရေးလုပ်ငန်းများ ကျဆင်းလာခဲ့ရာ လာမည့် ၁၂ လအတွင်း လုပ်ငန်းများ ပြန်လည်ဦးမော့ လာစေရန်အတွက် ငွေကြေးစနစ်အတွက် ငွေကြေးထိန်းချုပ်ရေးမူဝါဒနှင့် ဘဏ္ဍာရေး မူဝါဒများကို တိုးမြှင့်ဆောင်ရွက်ရန် အပါအဝင် အချက် ၁၂ ချက်အား အစိုးရမှ ပြင်ဆင်ဆောင်ရွက်ပေးရန် မြန်မာနိုင်ငံ ကုန်သည်များနှင့် စက်မှု လက်မှု လုပ်ငန်းရှင်များ အသင်းချုပ်မှ ထုတ်ပြန်သည့် First Quarter Report တွင် တင်ပြထားသည်။

အစိုးရထံ ပြင်ဆင်ဆောင်ရွက်ပေးရန် တင်ပြချက်များတွင် Infrastructure မြှင့်တင်ရေးကို ဦးစားပေး ဆောင်ရွက်ရန်၊ တိကျသည့် ငွေကြေးစီမံခန့်ခွဲမှုနှင့် ပွင့်လင်းမြင်သာမှုရှိသည့် ငွေကြေးအရင်းအမြစ် တည်ဆောက်ရန်၊ လူ့စွမ်းအား အရင်းအမြစ် ဖွံ့ဖြိုးတိုးတက်ရေးအတွက် ပညာရေးနှင့် အသက်မွေးဝမ်းကျောင်း ပညာကို မြှင့်တင်ပေးရန်၊ နိုင်ငံပိုင်စီးပွားရေး လုပ်ငန်းများကို တာဝန်ယူမှု တာဝန်ခံမှု အားကောင်းအောင် အပြောင်းအလဲများ ပြုလုပ်ရန် ပြည်တွင်းလုပ်သားများနှင့် ရွှေ့ပြောင်းလုပ်သားများကို ပြန်လည်နေရာချထား ပေးနိုင်မည့် အလုပ်အကိုင် အခွင့်အလမ်းများ ဖန်တီးပေးရန်၊ စိုက်ပျိုးရေးနှင့် မွေးမြူရေးလုပ်ငန်း ကဏ္ဍကို ပိုမိုအားကောင်းအောင် ထောက်ပံ့ပေးရန်တို့ ပါဝင်သည်။

ထို့ပြင် နိုင်ငံခြား ရင်းနှီးမြှုပ်နှံမှုများကို ကြိုဆိုသည့် သီးခြားဥပဒေနှင့် မူဝါဒများ ချမှတ်ရန်၊ ငွေကြေးစနစ်အတွက် ငွေကြေးထိန်းချုပ်ရေး မူဝါဒနှင့် ဘဏ္ဍာရေးမူဝါဒများကို တိုးမြှင့်ဆောင်ရွက်ရန်၊ အခွန်ကောက်ခံရာတွင် အချိန်ငွေကုန် သက်သာသည့် လုပ်ငန်းဆောင်ရွက်မှု စနစ်ဖြစ်ရန်နှင့် နိုင်ငံတော်၏ အခွန်ကဏ္ဍကို ပိုမိုတိုးပွားအောင် ဆောင်ရွက်ရန်၊ မြို့တော်ဖွံ့ဖြိုး တိုးတက်ရေးအတွက် ပြည်သူ့ဝန်ဆောင်မှုများ အများပြည်သူနားနေရာ အပန်းဖြေသည့် နေရာများနှင့် ယဉ်ကျေးမှု၊ အမွေအနှစ်များကို အဆင့်မြှင့်တင် ထိန်းသိမ်းရန်၊ နည်းပညာများ ဆန်းသစ်တီထွင်မှုများ၏ ဉာဏပစ္စည်း မူပိုင်ခွင့်အတွက် ဥပဒေ၊ လုပ်ထုံးလုပ်နည်းဆိုင်ရာ စနစ်တစ်ခု တည်ဆောက်ရန်နှင့် ဒေသတွင်း နိုင်ငံများနှင့်သာမက နိုင်ငံတကာ စီးပွားရေးသို့ ဝင်ရောက်နိုင်အောင် ပြည်တွင်းစီးပွားရေးကဏ္ဍကို မြှင့်တင်ပေးရန်တို့လည်း တင်ပြထားသည်။

မြန်မာနိုင်ငံ၏ စီးပွားရေး အခြေအနေသည် ၂၀၁၆ ခုနှစ်က စတင်ပြီး ကဏ္ဍအားလုံးနီးပါး ကျဆင်းလျက် ရှိသည်ကို တွေ့ရှိရကြောင်း၊ ထိုသို့ကျဆင်းလာခြင်း၏ အကြောင်းရင်းများမှာ ကျပ်ငွေတန်ဖိုး ကျဆင်းခြင်း၊ အခွန်နှင့် သွင်းကုန်စည်းကြပ်ခွန်၊ ငွေကြေးရရှိမှုနှင့် ဘဏ်လုပ်ငန်းများ၊ ကျွမ်းကျင်လုပ်သားမရှိခြင်း၊ ဥပဒေနှင့်မူဝါဒများ မတည်ငြိမ်ခြင်း၊ ပြည်တွင်း အသုံးစရိတ် မြင့်တက်ပြီး ငွေကြေးဖောင်းပွခြင်း၊ နိုင်ငံခြား ကုမ္ပဏီများနှင့် ယှဉ်ပြိုင်နိုင်စွမ်း၊ အခြေခံ အဆောက်အအုံ လိုအပ်ချက်၊ ပို့ကုန်/သွင်းကုန် ရုံးလုပ်ငန်းများကိစ္စနှင့် ဈေးကွက်ဝယ်လိုအား စသည့်အချက် ၁၀ ချက်ဖြင့် တိုင်းတာမေးမြန်းခဲ့ခြင်း ဖြစ်ကြောင်း သိရသည်။

ကုန်သည်စက်မှု အသင်းချုပ်၊ ပြည်တွင်းစီးပွားရေး လုပ်ငန်းများ ဖွံ့ဖြိုးတိုးတက်ရေး ကော်မတီမှ စီးပွားရေး လုပ်ငန်းများ၏ လက်ရှိစီးပွားရေးအခြေအနေ ကောင်း မကောင်း၊ အဘယ်ကြောင့် ကောင်းမွန်ရသည်/မကောင်းမွန်သည်နှင့် လာမည့် ၁၂ လအတွင်း ဖြစ်လာနိုင်သည့် အခြေအနေနှင့် လုပ်ငန်းများ တိုးတက်ရန် လိုအပ်နေသည့် အချက်များကို ပကတိ အနေအထားအတိုင်း သိရှိရန် အခြေအနေများကို စစ်တမ်းကောက်ယူခဲ့ခြင်း ဖြစ်သည်။

မြန်မာနိုင်ငံ၏ စီးပွားရေး ပိုမိုအားကောင်းလာစေရန် ပုဂ္ဂလိကစီးပွားရေး လုပ်ငန်းများ၏ မောင်းနှင်အားသည် အဓိကကျသဖြင့် ကုန်သည်စက်မှု အသင်းချုပ်မှ စီးပွားရေးလုပ်ငန်းများတွင် တွေ့ကြုံနေရသည့် အခက်အခဲများ၊ စိန်ခေါ်မှုများကို ဖြေရှင်းပေးရန် ကူညီဆောင်ရွက်ခဲ့ကြရာ ကိစ္စရပ်အားလုံးကို ဖြေရှင်းရန် တိကျခိုင်လုံသည့် သတင်း၊ အချက်အလက်များ လိုအပ်နေသည်။ ထို့ကြောင့် စီးပွားရေး လုပ်ငန်းများမှ တိကျသည့် သတင်းအချက်အလက်များ တိုက်ရိုက်ရရှိစေရန် B4 B Insights Forum ကို သုံးလလျှင်တစ်ကြိမ် ကျင်းပပြီး စနစ်တကျ စာတမ်းများပြုစု၍ သက်ဆိုင်ရာ အဖွဲ့အစည်းများသို့ အကြံပြုတင်ပြပြီး ပူးပေါင်း အကောင်အထည်ဖော် ဆောင်ရွက်သွားမည်ဖြစ်သည်။