သြဂုတ် ၈ ရက်တွင် ကမ္ဘာ့ဒေါ်လာဈေး အညွှန်းကိန်း ၉၅ ပွိုင့်အောက်ဆင်းပြီး နိုင်ငံခြားငွေလဲနှုန်း တစ်ဒေါ်လာ ၁၄၆၈-၁၄၇၃ ကျပ်ကြား အတက်အကျဖြစ်နေကြောင်း နိုင်ငံခြားငွေကြေး ရောင်းဝယ်သူများထံမှ သိရသည်။
ဒေါ်လာသည် ယွမ်နှင့် ယူရိုတို့နှင့်ယှဉ်ပါက ကျဆင်းလာသည်။ တရုတ်ဗဟိုဘဏ်က ပြီးခဲ့သည့်သြဂုတ် ၃ ရက်မှစတင်၍ ယွမ်ငွေအကျကို ထိန်းသိမ်းမှုများ ပြုလုပ်ပြီးနောက် တရုတ်စတော့များ ပြန်တက်ခဲ့ကာ ယွမ်ငွေသည် ဒေါ်လာနှင့်ယှဉ်ပါက တစ်ပတ်တာအတွင်း အမြင့်ဆုံးကို ပြန်ရောက်ခဲ့သည်။ တရုတ်အစိုးရက ၎င်းတို့၏ဘဏ္ဍာရေးဈေးကွက်ကို ထိန်းထိန်းသိမ်းသိမ်း ပိုပြုလုပ်လာမည်ဟု ရင်းနှီးမြှုပ်နှံသူများက မျှော်မှန်းလာခြင်းကြောင့် ကုန်သွယ်ရေး တင်းမာမှုများအပေါ် စိုးရိမ်မှုများ လျော့ကျလာသည်။ တရုတ်ယွမ် ငွေမှာ သြဂုတ် ၈ ရက်တွင် ဒေါ်လာနှင့်ယှဉ်လျှင် တစ်ဒေါ်လာ ၆ ဒသမ ၈၂ ယွမ်ဝန်းကျင်ဖြစ်နေကာ ကျပ် ၁၀၀ လျှင် ၀ ဒသမ ၄၆ ယွမ် ဝန်းကျင်ဖြစ်သည်။
၂၀၁၆ ခုနှစ် ဒီဇင်ဘာ ၁၆ ရက်တွင် ဖြစ်ပေါ်ခဲ့သည့် တစ်ဒေါ်လာ ၁၄၃၈ ကျပ်စံချိန်ကို ဇူလိုင် ၃၀ ရက်တွင် ကျပ် ၁၄၄၀ ဖြင့် ချိုးခဲ့ပြီး ဇူလိုင် ၃၁ ရက်တွင် ၁၄၄၃ ကျပ်၊ သြဂုတ် ၁ ရက်တွင် ၁၄၄၇ ကျပ်၊ သြဂုတ် ၂ ရက်တွင် ၁၄၅၁ ကျပ်၊ သြဂုတ် ၃ ရက်တွင် ၁၄၆၅ ကျပ်၊ သြဂုတ် ၇ ရက်တွင် ၁၄၇၅ ကျပ်အထိ စံချိန်တင် ဆက်လက် မြင့်တက်ခဲ့သည်။
ပြီးခဲ့သည့် ငါးလအတွင်း အမြင့်ဆုံး ဖြစ်ပေါ်ခဲ့သော ကမ္ဘာ့ဒေါ်လာဈေး အညွှန်းကိန်းများမှာ ဖေဖော်ဝါရီတွင် ၉၀ ဒသမ ၄၃ ပွိုင့်၊ မတ်တွင် ၉၀ ဒသမ ၃၇ ပွိုင့်၊ ဧပြီတွင် ၉၁ ဒသမ ၇၁ ပွိုင့်၊ မေတွင် ၉၄ ဒသမ ၈၃ ပွိုင့်၊ ဇွန်တွင် ၉၅ ဒသမ ၂၁ ပွိုင့်ဖြစ်ပြီး ဇူလိုင်တွင် ၉၅ ဒသမ ၃၉ ပွိုင့်ဝန်းကျင် ဖြစ်ပေါ်ခဲ့ကာ သြဂုတ် ၈ ရက်တွင် ၉၅ ပွိုင့်အောက် ကျဆင်းခဲ့သည်။
ပြည်တွင်းဈေးကွက်အတွင်း သြဂုတ် ၈ ရက်တွင် ဖြစ်ပေါ်သော အခြားနိုင်ငံခြားငွေကြေးများ၏ လဲလှယ်မှုနှုန်းထားများမှာ ယူရို ၁၆၈၅ ကျပ်၊ စင်ကာပူဒေါ်လာ ၁၀၇၆ ကျပ်၊ မလေးရှားရင်းဂစ် ၃၅၇ ကျပ်၊ ထိုင်းဘတ် ၄၄ ဒသမ ၃၀ ကျပ်၊ တရုတ်ယွမ် ၂၁၃ ကျပ်၊ ဂျပန် ယန်း ၁၃ ကျပ်၊ တောင်ကိုရီးယားဝမ် ၁ ဒသမ ၄၀ ကျပ်ဖြစ်သည်။
