ရန်ကုန်မြို့ မြို့နယ်တစ်ခုအတွင်း ဈေးသည်တို့၏ မြင်ကွင်း (ဓာတ်ပုံ-ကြည်နိုင်)
မြန်မာနိုင်ငံ၏ စီးပွားရေး တိုးတက်မှုတွင် မညီမျှမှုများ အခါအားလျော်စွာ ဖြစ်ပေါ်လေ့ရှိ၍ သတိထား စောင့်ကြည့်ခြင်း၊ ငွေကြေးဖောင်းပွမှုကို ထိန်းချုပ်ခြင်းနှင့် စီးပွားရေး အတက်အကျ မတည်ငြိမ်မှုများအား တုံ့ပြန်နိုင်သည့် မူဝါဒများ ချမှတ်ခြင်း စသည်တို့ကို အလေးထား ဆောင်ရွက်ရန် မြန်မာ့စဉ်ဆက်မပြတ် ဖွံ့ဖြိုးမှုစီမံကိန်း ၂၀၁၈-၂၀၃၀ တွင် ဖော်ပြထားသည်။
မြန်မာနိုင်ငံ၏ ငွေကြေးဖောင်းပွမှုနှုန်းသည် ၂၀၁၈ ခုနှစ်တွင် ခြောက်ရာခိုင်နှုန်း ကျော်အထိ ရှိနေမည်ဖြစ်ပြီး လာမည့်သုံးနှစ်အထိ ယင်းရာခိုင်နှုန်း၏ အထက်တွင်သာ ရှိနေမည်ဖြစ်ကြောင်း “Cost of Doing Business in Myanmar Survey Report 2018 တွင် ဖော်ပြထားသည်။
မြန်မာနိုင်ငံ၏ ငွေကြေးဖောင်းပွမှုနှုန်းသည် ၂၀၁၈ ခုနှစ်တွင် ၆ ဒသမ ၁ ရာခိုင်နှုန်းအထိ ရှိနေမည် ဖြစ်ပြီး ၂၀၁၉ ခုနှစ်တွင် ၆ ဒသမ ၅ ရာခိုင်နှုန်းအထိ ရှိနေမည်ဖြစ်ကြောင်း ဖော်ပြထားသည်။
ငွေလဲလှယ်မှုနှုန်းကို အကောင်းဆုံး သတ်မှတ်ခြင်းနှင့် စီးပွားရေး တည်ငြိမ်မှုကို ကျယ်ပြန့်စွာ ပြန်လည် ဆောင်ကြဉ်းခြင်း တို့အတွက် မဟာဗျူဟာတစ်ခု ရှိလာစေရန် ရည်ရွယ်၍ လုပ်ငန်းစဉ်များ သတ်မှတ် ဆောင်ရွက်သွားမည် ဖြစ်ကြောင်း အဆိုပါ MSDP တွင် ဖော်ပြထားသည်။
မျက်မှောက်ခေတ် မြန်မာနိုင်ငံသည် ငွေကြေးဖောင်းပွမှုနှုန်း အနိမ့်ဆုံးနှင့် ငွေကြေးနှင့် ဘဏ္ဍာရေး တည်ငြိမ်မှုအရှိဆုံး အချိန်ဖြစ်ပြီး ပြည်ပ ကြွေးမြီမှာ ဒေသတွင်း အနည်းဆုံးနိုင်ငံ ဖြစ်နေကြောင်းလည်း ဖော်ပြထားသည်။
နိုင်ငံခြားငွေအရင်းအမြစ်များ အကန့်အသတ်ရှိခြင်းနှင့် ငွေရေးကြေးရေးမူဝါဒ အကောင်အထည်ဖော်မှု လမ်းကြောင်းများ နည်းပါးခြင်းတို့ကြောင့် နိုင်ငံခြားငွေလဲလှယ်မှုနှုန်းထား မတည်ငြိမ်မှုနှင့် အနုတ်ပြသည့် နိုင်ငံခြား ငွေပေးငွေယူ ရှင်းတမ်းများ ဆက်လက်တည်ရှိခဲ့ကြောင်း မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုစီမံကိန်း (Myanmar Sustainable Development Plan – MSDP) တွင် ဖော်ပြထားသည်။
နိုင်ငံခြားငွေလဲနှုန်း အတက်အကျ မြင့်မားခြင်းသည် ပို့ကုန်တိုးတက်မှု၊ နိုင်ငံခြားရင်းနှီးမြှုပ်နှံမှု စီးဝင်မှုနှင့် စီးပွားရေး တိုးတက်မှု တစ်ခုလုံးကို ထိခိုက်စေကြောင်း၊ ထို့နည်းတူစွာပင် စီးပွားရေး၏ ဖွံ့ဖြိုးမှုပြဿနာနှင့် စပ်လျဉ်း၍ ဖော်ထုတ်ရာ၌ ငွေပေးငွေယူ ရှင်းတမ်းများတွင် လိုငွေဆက်တိုက် ဖြစ်ပေါ်နေခြင်းမှာ မေခရိုစီးပွားရေးကို ထိခိုက်စေသည့် ရလဒ်များ ရရှိလာစေကြောင်း သိရသည်။
မြန်မာနိုင်ငံ၏ တံခါးဖွင့်မူဝါဒကြောင့် ရင်းနှီးမြှုပ်နှံမှုနှင့် ကုန်သွယ်မှုများ အရှိန်အဟုန်ဖြင့် တိုးတက်လျက်ရှိကြောင်း၊ ကုန်သွယ်ရေးမူဝါဒများကို လွတ်လပ်သည့် အခြေခံမူဝါဒများ၊ ဒေသတွင်းနှင့် နိုင်ငံတကာ ကတိကဝတ်များနှင့် ကိုက်ညီမှုရှိစေရန် ပြင်ဆင်ခဲ့ပြီး ဆက်လက်၍လည်း ပြင်ဆင်မွမ်းမံ သွားမည်ဖြစ်သည်။
အရှိန်အဟုန်ဖြင့် ဖွံ့ဖြိုးတိုးတက်လာသည်နှင့်အမျှ နိုင်ငံရေးနှင့် စီးပွားရေး တည်ငြိမ်မှုရှိအောင် ဆောင်ရွက်ရန်မှာလည်း အရေးအကြီးဆုံး အချက်ဖြစ်ကြောင်း၊ နိုင်ငံရေး တည်ငြိမ်မှု ရှိစေရန်အတွက် အမျိုးသား ပြန်လည်စည်းလုံးညီညွတ်ရေးနှင့် တည်ငြိမ်အေးချမ်းရေးတို့ကို ဆောင်ရွက်ရမည်ဖြစ်ပြီး စီးပွားရေး တိုးတက်စေရန်အတွက် မေခရိုစီးပွားရေး စီမံခန့်ခွဲမှုစနစ် အားကောင်းစေရန်နှင့် ကောင်းမွန်သော အုပ်ချုပ်မှု ဖြစ်စေရန် ဆောင်ရွက်ရမည်ဖြစ်ကြောင်း မြန်မာ့စဉ်ဆက်မပြတ် ဖွံ့ဖြိုးမှုစီမံကိန်း ၂၀၁၈-၂၀၃၀ တွင် ဖော်ပြထားသည်။
