ရန်ကုန်မြို့ရှိ နိုင်ငံခြားငွေလဲလှယ်ရောင်းဝယ်ရေး ကောင်တာတစ်ခုတွင် ဒေါ်လာငွေစက္ကူများကို လဲလှယ်ပေးနေစဉ်
ဇူလိုင် ၃၁ ရက်၌ ကမ္ဘာ့ဈေးကွက်တွင် ဒေါ်လာဈေးအညွှန်းကိန်း ပြန်လည်ကျဆင်းလာသော်လည်း ပြည်တွင်ဈေးကွက်တွင် တစ်ဒေါ်လာ ၁၄၄၂ ကျပ်အထိ စံချိန်တင် ဆက်လက်မြင့်တက်ခဲ့ကြောင်း နိုင်ငံခြားငွေကြေး ရောင်းဝယ်သူများထံမှ သိရသည်။
ကမ္ဘာ့ဈေးကွက်တွင် ယူရို၊ ပေါင်နှင့် ယန်းငွေဈေးများ ဇူလိုင် ၃၁ ရက်တွင် ပြန်တက်ခဲ့ပြီး ဒေါ်လာညွှန်းကိန်းမှာ ၉၄ ဒသမ ၀၇ ပွိုင့်အထိ ကျဆင်းခဲ့သည်။ တရုတ်ယွမ်ငွေမှာ ဒေါ်လာနှင့်ယှဉ်လျှင် ဆက်လက်အား ပျော့နေပြီး ဇူလိုင် ၃၁ ရက်တွင် တစ်ဒေါ်လာ ၆ ဒသမ ၈၂ ယွမ်ဝန်းကျင်ဖြစ်နေကာ ကျပ် ၁၀၀ လျှင် ၀ ဒသမ ၄၇ ယွမ်ဝန်းကျင်ဖြစ်သည်။
ဇူလိုင် ၃၀ ရက်တွင် သမိုင်းတစ်လျှောက် အမြင့်ဆုံးနိုင်ငံခြားငွေလဲနှုန်းအဖြစ် တစ်ဒေါ်လာ ကျပ် ၁၄၄၀ အထိရောက်ရှိခဲ့ပြီး ၂၀၁၆ ခုနှစ် ဒီဇင်ဘာ ၁၆ ရက်တွင် ဖြစ်ပေါ်ခဲ့သည့် တစ်ဒေါ်လာ ၁၄၃၈ ကျပ်စံချိန်ကိုချိုးခဲ့ခြင်းဖြစ်ကာ ဇူလိုင် ၃၁ ရက်တွင်လည်း ၁၄၄၂ ကျပ်အထိ စံချိန်တင် ဆက်လက်မြင့်တက်ခဲ့ခြင်း ဖြစ်သည်။ ၂၀၁၈ ခုနှစ် ဇွန်လဒုတိယပတ်မှစတင်ကာ ဒေါ်လာဈေးများ မြင့်တက်ခဲ့ခြင်းဖြစ်ပြီး ဇွန် ၁၁ ရက်မှ ဇူလိုင် ၃၁ ရက် အထိ တစ်ဒေါ်လာ ကျပ် ၉၆ အထိ မြင့်တက်ခဲ့ကာ ယင်းကာလအတွင်း မြန်မာကျပ်ငွေ တန်ဖိုး ၇ ဒသမ ၁၃ ရာခိုင်နှုန်း ကျဆင်းခဲ့သည်။
ပြီးခဲ့သည့် ငါးလအတွင်း အမြင့်ဆုံး ဖြစ်ပေါ်ခဲ့သော ကမ္ဘာ့ဒေါ်လာဈေး အညွှန်းကိန်းများမှာ ဖေဖော်ဝါရီတွင် ၉၀ ဒသမ ၄၃ ပွိုင့်၊ မတ်တွင် ၉၀ ဒသမ ၃၇ ပွိုင့်၊ ဧပြီတွင် ၉၁ ဒသမ ၇၁ ပွိုင့်၊ မေတွင် ၉၄ ဒသမ ၈၃ ပွိုင့်၊ ဇွန်တွင် ၉၅ ဒသမ ၂၁ ပွိုင့်ဖြစ်ပြီး ဇူလိုင် ၃၁ ရက်တွင် ၉၄ ဒသမ ၀၇ ပွိုင့်ဝန်းကျင် ဖြစ်ပေါ်ခဲ့သည်။
၂၀၁၈ ခုနှစ် မေလမှစတင်ကာ ကမ္ဘာ့ဒေါ်လာဈေးအညွှန်းကိန်း သိသိသာသာပြန်လည်မြင့်တက်ခဲ့ခြင်းဖြစ်ပြီး ပြည်တွင်းဈေးကွက်၌ ငါးလအတွင်း လအလိုက်ဖြစ်ပေါ်သော နိုင်ငံခြားငွေလဲနှုန်းအနိမ့်ဆုံးနှင့် အမြင့်ဆုံးနှုန်းများမှာ ဇန်နဝါရီတွင် ၁၃၂၃-၁၃၅၄ ကျပ်၊ ဖေဖော်ဝါရီတွင် ၁၃၂၃-၁၃၃၁ ကျပ်၊ မတ်တွင် ၁၃၂၆-၁၃၃၄ ကျပ်၊ ဧပြီတွင် ၁၃၂၄-၁၃၃၂ ကျပ်၊ မေတွင် ၁၃၃၂-၁၃၅၁ ကျပ်၊ ဇွန်တွင် ၁၃၄၅-၁၄၀၇ တို့ဖြစ်ပြီး ဇွန်လတွင် ကွာဟချက်အများဆုံး ဖြစ်ခဲ့သည်။
ပြည်တွင်းဈေးကွက်တွင် ဇွန်လလယ်မှ စ၍ ဒေါ်လာဈေးသိသိသာသာ စတင်လှုပ်ခတ်ခဲ့ခြင်း ဖြစ်သည်။ ဇွန် ၁၁ ရက်တွင် ၁၃၄၆ ကျပ်ဝန်းကျင် ဖြစ်ပေါ်နေသော ဒေါ်လာဈေးသည် ဇွန် ၂၀ ရက်တွင် ၁၃၆၈ ကျပ်၊ ဇွန်၂၈ ရက်တွင် ၁၄၀၇ ကျပ်ဝန်းကျင် ဖြစ်ပေါ်ခဲ့သည်။ ဇူလိုင် ၁ ရက်တွင် ၁၃၈၄ ကျပ်အထိကျဆင်းခဲ့ပြီး ဇူလိုင် ၁၀ ရက်တွင် ကျပ် ၁၄၀၀ ၊ ဇူလိုင် ၁၁ ရက်တွင် ၁၄၀၆ ကျပ်၊ ဇူလိုင် ၁၂ ရက်တွင် ကျပ် ၁၄၁၀၊ ဇူလိုင် ၁၆ ရက်တွင် ၁၄၁၁ ကျပ်၊ ဇူလိုင် ၁၇ ရက်တွင် ၁၄၁၅ ကျပ်၊ ဇူလိုင် ၁၈ ရက်တွင် ၁၄၂၆ ကျပ်၊ ဇူလိုင် ၂၀ ရက်တွင် ၁၄၂၉ ကျပ်၊ ဇူလိုင် ၂၄ ရက်တွင် ၁၄၃၂ ကျပ်၊ ဇူလိုင် ၂၅ ရက်တွင် ၁၄၃၆ ကျပ်၊ ဇူလိုင် ၃၀ ရက်တွင် ကျပ် ၁၄၄၀၊ ဇူလိုင် ၃၁ ရက်တွင် ၁၄၄၂ ကျပ်အထိ မြင့်တက်ခဲ့သည်။ ဇူလိုင် ၃၁ ရက်တွင် သတ်မှတ်ထားသော ဗဟိုဘဏ်ရည်ညွှန်းငွေလဲနှုန်းမှာ ကျပ် ၁၄၂၉ ဖြစ်ကြောင်း သိရသည်။
ပြည်တွင်းဈေးကွက်အတွင်း ဇူလိုင် ၃၁ ရက်တွင်ဖြစ်ပေါ်သော အခြားနိုင်ငံခြားငွေကြေးများ၏ လဲလှယ်မှုနှုန်းထားများမှာ ယူရို ၁၆၇၅ ကျပ်၊ စင်ကာပူဒေါ်လာ ၁၀၆၃ ကျပ်၊ မလေးရှားရင်းဂစ် ၃၅၀ ကျပ်၊ ထိုင်းဘတ် ၄၃ ဒသမ ၇၀ ကျပ်၊ တရုတ်ယွမ် ၂၁၀ ဒသမ ၅ ကျပ်၊ ဂျပန်ယန်း ၁၂ ဒသမ ၉၀ ကျပ်၊ တောင် ကိုရီးယားဝမ် ၁ ဒသမ ၃၈ ကျပ် ဖြစ်သည်။
